العودة   منتديات الفطاحله > منتديات الشعر النبطي/يمنع الفيديو > رواد الشعر النبطي

إضافة رد
 
أدوات الموضوع
قديم 27-09-2007, 02:14 PM   رقم المشاركة : 1
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي من رواد الشعر النبطي:علي بن ظاهر الماجدي


الإسم : علي بن ظاهر ، وينسب لقبيلته الماجدي
فقد تعددت الروايات في تحديد القبيلة الأم التي تضم قبيلة المواجد مع قبائل أخرى كثيرة
فهناك يرى انهم من المزاريع من تميم ، وهناك من يرى انهم من قبيلة بني ياس وهناك من يرى انهم فرع من المطاريش .
من اقدم شعراء النبط في شبه الجزيرة العربية وتحديدا في المناطق الجنوبية الشرقيه حيث عمان والإمارات حاليا

الفترة التي عاش فيها :من الصعب تحديد الفترة الزمنية التي عاصرها هذا الشاعر ولو تأملنا في شعره لوجدنا :
-أنه مدح قبيلة بني هلال ، تلك القبيلة العمانية المعروفة ، و قد ذكر المؤرخون أن ظهورها كان موازيا لسقوط دولة بني نبهان و استيلاء بني هلال على عدة مقاطعات من المدن التي تفرقت إليها دولة عمان في تلك البرهة من الزمن ، مشيرين بذلك إلى أواسط القرن السابع عشر الميلادي، حيث أن سقوط دولة بني نبهان وقع في 1624 م
حيث يقول:

شلاغيف الرجال بني هلال= إذا من البلا شب التهابِ
طفوا نيران حرب المعتدين =و خلو حامي النيران كابي
و اراها اليوم خلية الربوع= من النزلات خالية الكعابِ

- فقد عاصر ابن ظاهر فترة من عهد الدولة اليعربية التي قامت في عمان سنة 1024هـ ومدح سيف بن سلطان اليعربي الملقب ب "قيد الأرض"، والذي تولى الإمامه 1104 هـ وتوفي 1123هـ ( 1711 م)
نرعى القفور بــــــلا سبور ولا لنا =دور يدور وهـــــــو مرد لجامها
في ظل بو سلطان اللي يهين العدا= اللي رقى من العز ذروة سنامها
لي جيت ريت مجالس مفتوحــــــه =وصياني تركض بها خــــــدامها

- ذِكر الماجدي ل " طوفان المعيريض " الذي حدث 1871م و قتل 90000 من أهل رأس الخيمة المسلمين و من الوافدين غير المسلين (القور):
تسعين ألفٍ من المعيرض برهدوا=مشروكةٍ ما بين مسلم و قورها
و إلى نخيل الحيل جتها مسايل=عواوينها قد غرق الماء جذورها

وبالتالي فاراجح انه عاش في نهاية القرن السابع عشر إلى أواسط القرن الثامن العشر الميلادي
وانه توفي حسب اقرب الروايات عام 1123 هجرية

وفي رواية اخرى ولد الشاعر سنة 1532م أي منذ 470 سنة تقريبا نقلا عن أحد الثقات من الرواة ، لقوله إنه قرئت عليه مخطوطة قديمة كل القدم ، تعود إلى أواسط القرن العاشر الهجري ، ويؤكد الكثير من الرواة قدم عصر ابن ظاهر المايدي حينما ذكر بني هلال في أحدى قصائده ، وهو يتأسف عليهم كأنه يراهم .
وعادة لا يتأسف الإنسان إلا على قرب عهده من عهد الذين فقدهم .
وإن اللقاءات التي أجريتها مع الكثير من المعمرين في المناطق التي كان يقطنها المايدي بن ظاهر ، والذين جاوزا مائة عام من العمر وكلما سألنا أحدهم يقول:
إننا في حداثة أعمارنا أدركنا رجالا تزيد أعمارهم على مائة وعشرين عاما فيقولون إنهم أدركوا في حداثة أعمارهم كذلك رجالا بلغوا من العمر عتيا ، يذكرون خير ابن ظاهر عن أجدادهم ، والذين سمعوا عنه ولم يروه كذلك . وإن إسلوب ابن ظاهر المايدي من أحد الدلالات المهمة على قدم عهده ، حيث إنه استخدم البحر الهلالي بنوعيه الطويل والقصير والصخري فقط

مهنته :
إمتهن الشاعر حرفة صيد السمك واللؤلؤ الذي يستخرج من المياه القريبة من الساحل والتي تسمى بالقحه حيث كان الغواصون يذهبون إليها لصيد اللؤلؤ والسمك معاً صباحاً ويعودون ظهراً .. وكانت لابن ظاهر شاشة في منطقة دهان من أعمال رأس الخيمة يستعملها في الكسب على عياله من تلك المهنة المذكورة.
وكان من عادة حاكم رأس الخيمة وتوابعها فرض ضريبة على كل سفينة عاملة في البحر بنسب متراوحة حسب حجم السفينة فلما طولب الشاعر بأداء هذه الضريبة إستاء من ذلك الطلب وامتنع عن أدائها وأنشد هذين البيتين :
مالي في دهان طوال دوم = ولا في الحيل مخضر الخوافي
وراس المال شاشه = من يريد بطبعها وبخلي الكرب غافي
ويقصد الشاعر بأنه رجل فقير لا يملك سفينة كبيرة في دهان وهي التي كنى عنها بقوله (طوال دوم) ولا يملك نخيلاً خضراء في منطقة الحيل يدران عليه كسباً ويضطرانه على البقاء فيهما .. وإنما كل رأس ماله شاشة صغيرة يسهل عليه ان يغرقها في البحر ويرحل عنها إن رأى ما يغضبه .. وتستطرد الرواية بأن الشاعر قد ترك دهان بعد ذلك وذهب إلى جميراء الواقعة غرب بر دبي وأقام فيها مدة قصيرة يمارس فيها نفس مهنته السابقة لكن لم يطل به المقام فرجع بعدها إلى بلاده وفي الجميراء يقول:
ماها ومرعاها قريب لاهلها = وعنها أهلها ما يشومون إل دار


بعض من سماته الشخصية :
تعرفنا علي الكثير من سماته الشخصية من شعره
فهو الشاعر الحكيم والفيلسوف الذي يمتاز بسرعة البداهة

فيروى أن ثلاثة رجال قدموا عليه فاستقبلهم كعادته بالترحاب و الضيافة العربية الأصيلة ، من غير معرفة أسمائهم و لا من أين أتوا ، حتى إذا ما انتهى من اكرامهم بدأ يسألهم الواحد تلو الآخر : ما اسمك؟ ، فأجاب الأول : في يدك اليمنى ، فقال الماجدي بثقة : مرحبا بخاتم، أم الثاني فقال : تمرك العامي ، فرحب به الماجدي قائلا يا هلا بعتيج، أما الثالث فقد قال : من العشر ثلاث، فقال الماجدي على الفور : أهلا بالسبع.

وفي قصة اخرى
أن رجلا امتحنه بأسئلة شعرية عبارة عن شطر من بيت ، فقال :
إيش الفتاة اللي يزاغيها الصبا؟ ، فأجابه ابن ظاهر : سفينة و يديرها سكانها،
قال: إيش الفتاة اللي تجهجل عينها؟ ، فرد الماجدي : هي الرحا و يديرها مطحانها،
قال : إيش الفتاة اللي حسين لونها ؟ فقال شاعرنا : الشمس و الله عالم بزوالها .

قدم نفر الى ابن ظاهر وماكانوا يعرفونه شخصياً وكان الشاعر وقتها صفر اليدين لا يملك من حطام الدنيا ما يستطيع به إكرامهم... فوجدوه يضرب بسوطه شجر الغاف ليطعم ناقته فسلموا عليه ثم سألوه عن ابن ظاهر... فأشارلهم على خيمة كبيرة من خيام الحي قائلاً: تلك هي دار إبن ظاهر... فقصدوها ورحب بهم صاحبها واستضافهم..فلما جهز الطعام أمر صاحب البيت بدعوة ابن ظاهر لتناول العشاء معهم..وعندما جاء ابن ظاهر عرف القوم انه هو الرجل الذي كتم عنهم إسمه و أشار لهم على دار مضيفهم ... فاستغربوا منه هذا الفعل ووجهوا له هذا المثل
(كم صبي ميضخان الميالس.=يميل النبا عنه ولا هو يميل)

ومعناه انك خلاف ما سمعناه عنك من ذكر جميل فأجبهم ابن ظاهر بقوله:

يميل عود الموز لي عاد مورج=ولي عاد عريان فهل جيف يميل
فوالله ما بي من مـــلاقاة غلمه= لـــكن ما بـــين اليـــدين جــليل

اختار قبره بنفسه :

ويقال أنه اختبر تربة الأرض في أماكن متفرقة ليعرف أيها يحسن التعامل مع جسده بعد غيابه، فكان اثناء فترة الإختبار هذه عندما ينزل بمكان يقوم بدفن دريه من الصوف في هذا المكان وبعد مرور حولاً كاملاً عليها يعود ثم ينبشها فيجدها وقد أكلها التراب ...إلا التي دفنها في الخران ( المنطقة التي دفن فيها)وجدها باقية على حالها لم تتغير .. وبذلك أوصى بدفنه فيها.
ومن ما يروى عن هذه الواقعه : انه بعد اختياره للموقع بدأ بحفر قبره ، وفي تلك الأثناء مر به أحد الصبية الذين يلعبون بجواره ، فقال له : ماذا تعمل ؟
فأجابه ابن ظاهر المايدي أني أقوم ببناء بيت لأسكنه ، فالتفت الصبي إلى أصحابه قائلا : تعالوا انظروا العجب إن هذا المسن فرح بقدوم موته ، فهو يستعد لذلك بحفر قبره بنفسه ، فعندها قال في هذا الموقف أبياتا شعرية من قصيدة طويلة :

ما تدري أن المــــوت فرض لازم =مثل الصلاة اللي على الناس وايبه
حي الفقير عام شكى قل شوفـــــــه= يبكي ولا له مــن الملا من يوايبه
وموت الغني على الكبدى حســــرة =الله يزوح الموت ما اكبر مصايبه
يا بنت الأجواد حــــــــــــذايه قربي= قالت أنا بحـــــــــذاك ماني بقاربه
أنته بداك الشيب وأنــــــــــــا صبية= ولالى بشايب يقضي حســـــــايبه
شروات جرد البدو لي من رموا به =يستغفر المعبود والــــــروح ذايبه

وذات مرة ، وهو جالس أمام خيمته المنصوبة في مكان رملي مرتفع ، يطل على هذا القبر ، أنشأ قصيدة طويلة ، ومن خلالها عرفنا انه كان يعرف القراءة ، والقصيدة على حسب ما يقول الرواة أطول من ذلك :
أنا موشك من الموت قلبي خـايف =من سكرة تتلى الوريـد أنسامها
لو ما حروف الترمذي تخــــالفت =ما رمت أفند ميمها عـــن لامها
واسألك يا المعبود حـــرف عالي =ما بين مذهب كفرهــا وإسلامها
متندم من قصــــــــــــــــة سويتها =يعلم بها الباري وأنــــــا كتامها
ركبت خيل إبليس يـــوم جهالتي =باتت تعرص بي وتعلك لجــامها
أرقبت مرقـــــــاب وشفت منازلي= متقاربات جــــــــدادها وقدامها
ما بين سيح وساحل ومساح =مــا هناك ويــــن العين طاب منامها
ذي ديرة مامؤنة وعذيــــــــــــــة= من أربعة لفجوج تهب أنسامها
قامت مجـــــــاديفي تميل سنونها= وكلما حزمناهـــا تقص حزامها
وأن جيت أدور في الجماعة ثيبه= كثرة مناويها وزاد هــــــــدامها
والموت ما تنجيك عنه إنهزامـــه =والروح ما تعدي حــدود أيامها
وصلاة ربي على النبي الهاشمي =عـــد الحروف بكاملات أختامها

وبعد ذلك قام ابن ظاهر ينتظر موته فمكث قرابة خمسة عشر عاما يجاور هذا القبر حتى توفاه الله.

من ناحية اخرى نجد :
ان الماجدي بن ظاهر كان يعرف في امور الفلك وكيف تكون الاحوال الجويه مثل ولو كانت هذه الليله برد او سوف تهب رياح وغيرها... ولكي يمتحن ابنته لو كانت تتكلم أم لا ، فأنتظر ابرد ليله ونفذ خطته .
فكان لدى الماجدي ابن ظاهر نوق مظاير فطلب بن ظاهر من أبنته ان تسهر على هذه النوق المظاير في ذلك الجو الشديد البروده... وما ان زادت البروده حتى سمع ابن ظاهر ابنته تقول:

بيتني يابوي في ليلة خدرسيه= من البرد ما يسري ولو جاع ذيبها
تبات بها عوج العراجيب يثم =ومن البرد يعدي نسلها عن حليبها




متى بدأ يقول الشعر ؟
تشير الدلائل إلى انه لم يقرض الشعر إلا بعدما لاح الشيب في عارضيه ، كما يقول في قصيدة قالها ، ويؤكد الراوبة أنها أول قصيدة قالها ابن ظاهر :

كشفت الغطا عن طوامي بحور =بشعر تهيا على كل بـــــــاب
رجل بلا مال قليل الأجمـــــال =حياة غصيصة وقيس العذاب
دنياك جيفة وصيـــــــــة نكيفه =واقفت عـــــــن علي الأنساب
واقبلت على دني بخيــــــــــــل= شحيح فيها مـــــا يدور ثواب
نظرت فيها بقلب عــــــــروف =وقنعت منها واقفى الشبــــاب
ولا شب قرن الترشي بمحنــة =حناني كما يحني القوس شاب


جاء جميع شعره يحتوي على الحنين إلى الشباب الذي انقضى ويعرج على الغزل البسيط من خلال ذكر أيام الصبا ، ثم يعود إلى النصيحة والحكمة وذلك ديدنه في كل قصائده ، قال في أحد قصائده :

بقوة اكتم العبرات يـــــــــــــــوم= أهلها مقيمين وحيـي مقفيين
وتبعت الأهل من حـــــال ترك كله= لعيناه واسجـــع بالحنين
وأنــــــا عند خلي في المولمات= وعند الناس نحــــن متبلمين
وخدمت الثوب من سبهاي خام= سهيبــــــــي لهيبـــي قطــين
وطرشته لقاعدة النهــــــــــــود =وبه تمشي في عذى برأمين






توقيع الطائر المهاجر
 
  رد مع اقتباس
قديم 27-09-2007, 02:16 PM   رقم المشاركة : 2
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


نقا جوهر غالي في المسام = بالأثمان كم ظال منها الظويل
قماش منقا بقطن موقا = وشي تبقا قليل المثيل
تغالي التجار قماش الغزار = والأزياء ما في شراها حجيل
وأثمار لاشجار حلو وذوق = وفيها رزايا ودوح ظليل
والأنهار تجري بخبث وطيب = عيون تجارى وهذاك غيل
ولفظ الأنام حلو ومر = ولا الشري منها شرى السلسبيل
والناس أجناس بخيل يذم = كريم يحيا ونذل بخيل
والأرض تعرا ويكسى عراها = من الغيث أصناف ثوب جميل
لفاها طروق مشع البروق = تمج الشدوق سحاب هطيل
هروق يروق ويحيى العروق = تولوه أملاك نعم الوكيل
لها الرعد زاوي وشرتا زغاوي = فهاج بكاها رميج الخليل
سرى بيهم هرج بكي وضحك = وشمت المواشي وجهل الخليل
تطيب المفالي من أول وتالي = وطاب الزلال عمار النخيل
وطهى نضالا بشوي وطبخ = مقات الضعاف وطعم السبيل
لذيذ طعامه وحلو جناه = تولوا حصاده بوزن وكيل
ولفوا عراها بقمصان خوص = وعادت إمّاته إلى الدور حول
تنحوا وكل مضى في هواه = عن الدار وانو ولشد الرحيل
تنحيت لي مثل غي السراب = ومذ ضل عقلي تركت الصميل
ويوم دنا الشيب ولى الشباب = أناخ ركاباً وحث الرحيل
دهاني المشيب بدولات حرب = وهجن خطتها ملابيس خيل






توقيع الطائر المهاجر
 
  رد مع اقتباس
قديم 27-09-2007, 02:28 PM   رقم المشاركة : 3
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


ورويت لرض من شرق أو غرب = وأسقت كلما حازت اعماني
من افيوي الينوب إلى الشمال = من الظفره إلى سيفة إدهاني
وروي الرمل مع سيح الغريف = ووادي المكن داناه المداني
على نزوه وما حاز الهباب = ووادي الجرن واسقانا زماني
وأسقت من فلاح إلى العذيب = مجوج الماء ثمان في ثماني
على الصجعه وما حاز العشوش = على البطحاء وتمت روهجاني
على رمل الحويمي والغدير = وسيح اليلح مخضر المثاني
على تاهل وعثمر والغويل = على وادي سلام أو سيهجاني
من غرى ﭼﺪ روح الغالي = فوق حول اسمان لاقيته
بو مضيمر والردف عالي = من ورا لثياب خصّيته
حافظ على تاهل واهاليه = واللي سكن لحليو يفداه
غزلان رينا في مفا ليه = بالحل يا ريم لقفناه
إلى كفا وما حاز الخرير = مشرجة تباحيل الدباني
على المزرع وخطا والهزوع = مهايفة إلى مريال ثاني
على كلبا وما حاز الجبال = من البلدان من قاصي أو داني
وجاد الجود منها في الشمال = على البدوان ساحبة الجناني
وجاه السيل من روس الجبال = وجل إغفاه وامتلت المغاني
وسوت لرض عشب زين لون = يشوج رايده لي جاه عاني
وجابوا حي شوقي من ابعيد = وبنو في مغانيها المباني
وطاب النوم من عقب الهموم = وجابوا صاحبي ملبعدداني
حسين الصور مجلود الخصور = لكنه من ظبي سيح اليماني
سوى عن لكنها عين ريم = وعنق مثلما عنق الدماني
وراس أسمر جاني سبيب = كما الغربيب واجنا منه جاني
وصلوا يا حضور على = الرسول عدد مالاح براق اليماني






توقيع الطائر المهاجر
 
  رد مع اقتباس
قديم 27-09-2007, 02:32 PM   رقم المشاركة : 4
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


يقول الفهيم الماجدي بن ظاهر =مطل على زبيًّ من الطعس نايفه
يشب نقاها من سفا ذاري الصبا = وباقي الهبايب من حواليك رايفه
وهب على ثاري الضبا ناعس الصبا = اذا الزمل في الريدا عيالا خفايفه
تجري مسايلها من العصر وانتهت =سهيلية من مطلع الشمس رايفه
وغنى حمام الدوح وازدى معيّل =يذكر من أحسان النيا عن ولايفه
واسطى مزار الحي وتباعد المدى = وعاد المطايا من ورى الزهم زايفه
بليهية أدما العلابي كواظم = كوصف الزعلا من شتاهم مهايفه
وقادوا عيل الاضعان متباعد الخطا = طويل القراشب عن ملاوي حنايفه
لكن بنات الغيل في كاظماته = يلّوي القذايل والقذل في وصايفه
يوازيل ذوق أو معاصير سكر = تلّييل رزم من مقادة ولايفه
ايونه الى ما البدو شاموا لنيه = يجنون حلوات الجني من حرايفه
شاموا الى شاموا وقاموا الى أنزلوا= سهيل يدارون الويا من وهايفه
وابدوابريش العين ريانة الصبا =حلى ماترى ضيف لفى عند ضايفه
هضوم الحشا مطالة للوفا = من أطلال طالت للعطر دايفه
لها مبسم عذب وعين وشارع = وخد كما ريم اليواري وصايفه
نهاني الناهي في هواها وعصيته =وطاوعت مصروف النيا في حذايفه
..... ..دنى الشيب واحتنى = وعاد النبا بي طايحات وقايفه
....... يعرف الابنشده =ولوكودم الداني وترمر عرايفه
اذا النصح مايا في مدى غاية الصبا = زمان انتهى ياما من النفع عايفه
اذا الزرع وافي لوغشا الما غدوره =ماينفع الما لي نواصيه هايفه
ترى خير لبس الثوب مادام يدد = ولى باد باداه الوبا في كفايفه
والانسان يصبح باهي في مسالم =ويمي فريد عنده الاصقايفه
يتاير الدنيا وهومطمع بها =ويرقد وما يدري متى الموت لايفه
وصلوا على خير البريه محمد = عدد مالعى ورق على عود نايفه






توقيع الطائر المهاجر
 
  رد مع اقتباس
قديم 27-09-2007, 02:45 PM   رقم المشاركة : 5
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


يقول المايـدي أبيـات شعـر = يداد الجيـل عـدلات المبانـي
مـدارات تـكـن للعارفـيـن = عروف الجيل فطن في المعانـي
ولمّا قال لـي فـي الوجـه ذم = هذرني في القفـا لمّـا شنانـي
فلا ذمّيت لي في يـوم صديـج = ولا أشنـي عـدوّ مـا شنانـي
أخاف امن الـروات السامعيـن = وقول الناس شـان الله فلانـي
ولا يافيـت خـلّ لـي مــودّ = ولا صافيـت حـدّ ماهتـوانـي
ولكـنّـي اذا مـنّـي بلـيـت = فلا البلوى يجوز الها التوانـي
انــا والله مـانـا بالعـيـول = على الهذران كود الّـي بلانـي
بخـال مـن مساعيـة النمـوم = يصبـح بالعلـوم أو بالمشانـي
فلا يهـواه لـي يـوم صديـج = ويفرح بي اذا شوقـي لفانـي
اذا ايـوا بالرضـا متواسييـن = ولا من صوبنـا يعنـاه عانـي
اذا رضي الصديج عن الصديج = يموت الواش في ميراه طانـي
وهـذا مثـل قـول الأولـيـن = مع الحفّاظ وصف مـن زمانـي
ويزداد الصديـج ابنـا معـزّه = والى مات العدو قلنـا هوانـي
وخلينا البغيض ايموت غيـض = وييبس مثـل شـنّ الليهبانـي
بلا الله موشـي سـبّ الفـراق = بذايـات يتمّـن لـه زمـانـي
على الحضره يلاجينـي بطيـب = وفي الغيبـات هـذار شنانـي
أظـن أن الكـلام اوزون حـقّ = وجور مـن وزون المسلمانـي
عـلـيّ الله مطّـلـع وكـيـل = ولا غير الآلـه رفيـع شانـي
الـهـي ينتـجـم مظالمـيـن = يبيّن بالعدو مـن ويـن كانـي
فـلا يلـزم علـيّ الاّ اقــول = مقـال بالغـبـا أو بلبيـانـي
فلا لـزم السّفيـن الاّ السّنـاد = ولا لـزم الجـواد الاّ العنانـي
ولا لـزم الحريـم الا الـرّيـال = ولا لـزم الرّيـال الا المعانـي
ولا لزم الطليب عـن الطليـب = بقلّ الطّيب ضـرب بالسّنانـي
الا يا صاحبـي عطنـي نبـاك = تباني اعفّ عنهم مـن اوانـي
واخليهم علـى تبعـي رضـاك = بنـوّ الخيـر مايـا بالبيـانـي
فعلّمنـي بمضـمـون وكـيـد = فرّبت كيف هـذا الأمـر كانـي
انا ويّـاك فـي ولـف جميـع = ويفرّق بيننا صـرف الزمانـي
انـا والله لومـنـت الطلـيـب = وعجّـل بالـذي مينـاه حانـي
ويحفر له جليـب فـي كثيـب = رثيث الحـال مشلّـي الدّفانـي
ولو دوّرت في طـول الزمـان = فـلا يـوم أراك اولا تـرانـي
أنا معسـر ومطلوبـي عليـك = وبيـس بالتّمـادي والتّمـانـي
أبا منـك الوفـا بالـزام حـق = وتوغل لك معي شـيّ ترانـي
يريّـع بالوفـا قـرم طـويـل = الى أنّ القـوي يحنـاه حانـي
ويدني الشّيب من عقب الشباب = فلمّـا بـه دهاكـم مـا دهانـي
تجينـي مـنـك زلات كثـيـر = وغفـران الخطـا أول وثانـي
فلمّـا بـي تغمـض الموشيـن = وتجفاني وتغفل عـن حسانـي
فلمّـا بالمقـال أو بالسّـنـان = وقول منـك بالحسنـى يزانـي
واشوى مـن مجافـات تكـون = وكثر الهجر منك الـيّ سبانـي
فهذا منـك حـال مـا يجـوز = تهزم النّـاس والدّيـره أمانـي
تخلّينـي سهيـر العـيـن دوم = لكن بها شفـا ملـح الذرانـي
وكبـد مالهـا فـالـزّاد نــوّ = وزاد ليـس للمهجـور هانـي
وشربي ماهمـاي او ماغديـر = لكنـه فيـه مـاي الحنظلانـي
سقاني ايّـاه الشـوق المصـدّ = فلا غفرت ذنوب الّـي سقانـي
كسـر قلبـي وخلانـي وجيـع = وينعـت للكسيـر الموميـانـي
وخلانـي كمـا طفـل صغيـر = من الفرقا بكاه ابكـى هوانـي
سقـا الله دار ريّـان الشبـاب = من الغيم الهميـم المسفهانـي
أغرّ المـزن مسـودّ السّنـاح = وتسمع رعدهـا ملبعـد دانـي
ثجيل غيمهـا وشـل السحـاب = وداقلها الصّبـا شرتـاه وآنـي
شعيل البرق من حـدّ المغيـب = وهـبّ الهـا سهيلـيّ يمانـي
يظـلّ السّبـع فيهـا مايسيـر = ولا يسري ايلين الصبح بانـي
لفت والليل منتصـف الوقـوت = وساعة ما حلا نـوم الهدانـي
ورويت لرض من شرق اوغرب = وأشقت كلّما حـازت اعمانـي
من افيوي الينوب الى الشمـال = من الظفره الى سيفـة ادهانـي
وروي الرمل مع سيح الغريـف = ووادي المكـن دانـاه المدانـي
على نزوه ومـا حـاز الهبـاب = ووادي الجرن واسقانا زمانـي
على رمل الحويمـي والغديـر = وسيح اليلح مخضـرّ المبانـي
وأسقت من فلاح الـى العذيـب = مجوج الماء ثمان فـي ثمانـي
على نهـلا وعثمـر والغويـل = على وادي سلام او سيهجانـي
الى كفّـا ومـا حـاز الخريـر = مشرّجّـه تبـا حيـل الدّبانـي
على المزرع وخطّـا والهـزوع = مهايفـة الـى مريـال ثـانـي
على كلبـا ومـا حـاز الجبـال = من البلدان من قاصي اودانـي
وجاد الجود منها فـي الشمـال = على البدوان ساحبـة الجنابـي
وجاه السّيل من روس الجبـال = وجلّ اغفاه وامتلـت المغانـي
وسوّت لرض عشب زين لـون = يشوّق رايده لـي جـاه عانـي
وجابوا حيّ شوقي مـن ابعيـد = وبنّـوا فـي مغانيهـا المبانـي
وطاب النّوم من عقب الهمـوم = وجابوا صاحبـي ملبعـد دانـي
حسين الصّور مجلود الخصـور = لكنه من ظبـي سيـح اليمانـي
سوى عين لكنهـا عيـن ريـم = وعنق مثلمـا عنـق الدّمانـي
وراس أسمـر جانـي سبيـب = كما الغربيب واجنامنـه جانـي
وصلوّا يا حضور على الرسول = عدد مـا لاح بـرّاق اليمانـي






توقيع الطائر المهاجر
 
  رد مع اقتباس
قديم 27-09-2007, 02:46 PM   رقم المشاركة : 6
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


يقول الفهيم المايـدي بـن ظاهـر = والأمثال يجري من لساني مدادهـا
يغوشن على قلبـي نفـوش لكنّهـا = كما غاش من جبل التهاما جرادهـا
من امثالنا لا مـن تماثيـل غيرنـا = قراينهـا محيـوزة عـن تـلادهـا
أباهي بها الّرمّاس لي من تظاولـوا = إذا ظال مرّمّاس ظـول احتشادهـا
جود أنّ في الرّمّـاس قلـب مولّـع = من البعد حفّـاظ لهـا واستفادهـا
يقولون هذا بالهـوى كـان مولـع = بالافنان في روس الذواري نشادهـا
جتيل الهوى عايا على عالم الـدوا = وبـذل الأطبّـا جدّهـا واجتهادهـا
أقول بي من حـول عاميـن ليعـة = أزالت عن العينيـن لـذة ارقادهـا
يهجّ مـوي العيـن منـي بعبـرة = على صفح خدّي نافي الماي زادهـا
مسوح بهـا كفّـي مسـوح لعلهـا = تهوّن وهي من كثرة الماي زادهـا
لكّن غضاها في لظى فيض مرجـل = على نـار سـوّ مايهـون اتّقادهـا
وآهيل من اسباب الشّقا بارد النّقـا = ولاهـوّن اللّيعـات عنّـي برادهـا
وبي علّـة ماهانهـا بـارد الثّـرى = ولا بارد الماء هانها عـن مكادهـا
تداو ابها لاشيـا ولا وآلـم الـدّوا = بها سبب من عاقها عـن مرادهـا
وكيف تمدّ الها بشاشة وهـي لهـا = جميح بهالي عزّ الأضمـاد زادهـا
أرى يا محبّي مـا تبالـي مواصـل = وطاوعت بي شور الملا مع حسادها
إلي حست جبلين الرّجا في جنابـك = تجافي وتمسي ناقـظ لـي جلادهـا
إلى عاد ما وافقتني كيـف حيلتـي = على الحق في طغيانها واجتهادهـا
لي عـدت مديـون ديـون كثيـرة = شكا العسر من كثر التمادي اوعادها
على نوّ هذا مـا يصافيـك صافـي = ولا ذلك الخـلان يصفـي ودادهـا
وأنا كلمـا جتنـي الخطايـا ايلنّـي = أبادر بأنواع الرّضا عـن احقادهـا
أضاهيك وأنا مطلبي منك جد غـدا = ثلاث اسنـوات وافيـات اعدادهـا
ترى إن فات منك اليوم توح فلا أبا = باكر الـى صيّـاد لـرواح صادهـا
إلـى دافـع الله بالبـلا كلمـا دنـا = وجارت الأشيا ما تخاخـا جوادهـا
وكم كان نـار مـا تصـلاّ لهبهـا = حتى اللهب طار الهبها من رمادهـا
وكم حايلت تعدو بـالأرداف سابـج = وتعجز الى جاها العيا عن اشدادهـا
ولا تأمنـن ّالدّهـر يدنـوا مـذلّـه = وقوم عتّا إلا جايـر الدّهـر بادهـا
ولا تيس الأرض الكسوح من الحيا = فكم داثر الوديـان سيّـل عتادهـا
ولاتيّس أرواح المراضا من البـرا = ولا الصّح ينجيها إلى جـا نفادهـا
ولاييّس الرجل الفقير مـن الغنـى = ولا رحمـة المولـى إذا الله رادهـا
ولاتيّس العين الرّمود مـن الكـرى = تسهي ويحلي نومهـا فـي رقادهـا
ولاييّس القنّـاص وإن ذار صيـده = فربّت يجبهـا مستريـح اوصادهـا
ولا تأمننّ الذيب وإن طـال غيبتـه = يجي والوهانا ذايـد النّـوم زادهـا
فللكلـب نومـات وللسّبـع سريـه = على الضّان أخفى وانتقى من مدادها
ألا واشقـا مـن عـذب الله قلبـه = بظعون حيّ زايـد العشـب قادهـا
على بزّل شلّوا من الخـود مابغـوا = وخلّوا من الثلاث جانـي سوادهـا
وقفّوا ابها عنّـي وحلّـوا مياثمـي = ودمـوع عينـي ثنّهـا وافترادهـا
وعيني كأمثال الصّفـات النّواضـح = معا ميلها ما يابهـا الدّمـع يادهـا
وأنا مثل منهو زارع النخل يرتجـي = رجا القيض وابدو يوم جاها همادها
ولا يستوي لي مالـه الله يهتـوي = ولا تنقـص الأشيـا اذا الله زادهـا
ومن كان في الدّنيا معان بمـا يبـا = على عـادة لا يقطـع الله عادهـا
وان شحّت الدّنيـا بنفـس سخيّـه = أثنى لهـا خيـر مـن الله زادهـا
وصلوا على خيـر البرايـا محمـد = عدد ما قرا القاري وتمّـم عدادهـا






توقيع الطائر المهاجر
 
  رد مع اقتباس
قديم 27-09-2007, 02:51 PM   رقم المشاركة : 7
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


يقول ابن ظاهر مقـال عجيـب = تظاهر عليه مـن الصـدر جيـل
كشفت الغطا عن كواكيـب عـد = تيـارا عيونـه خـلاف الدبيـل
أنادي بالأشعـار وانقـا لخيـار = تنقّيتهـا مـا بغيـت الهـزيـل
إلى خمّلـوا بالـوزون الخفـاف = أخمّـل اقماشـي بـوزن ثجيـل
نقا جوهر غاليـة فـي المسـام = بالأثمان كم ظال منهـا الظّويـل
قمـاش امنقـا ابقطـن اموقّـا = وشـي تبقّـا جلـيـل المثـيـل
تغالـي التّيـار قمـاش الغـزار = والأزياء ما في شراهـا حجيـل
وأثمـار لشجـار حلـو او ذوق = وفيهـا رزايــا ودوح ظلـيـل
والأنهار تجري بخبث او طيـب = عيـون تيـارا وهـذاك غـيـل
ولفـظ الأنـام حلـو او مــرّ = ولا الشّري منها شرى السلسبيل
مثل ما تشوف نقّـال السّيـوف = هـواري فـواري ونـرم جليـل
والنـاس أجنـاس بخيـل يـذم = كريـم يحيّـا ونــذل بخـيـل
والأرض تعرا ويكسـي عراهـا = من الغيث بأصناف ثوب جميـل
لفاهـا طـروق مشـع البـروق = تمجّ الشّـدوق سحـاب هطيـل
سرى ملمغيب سحـاب رغيـب = بثنو الخصيـب خصيـب محيـل
هشوش سحابه ومدنـي حيابـه = وإلى هاض مابه فلـه نستخيـل
وهدّ السّـواري وغبّـا لأثـاري = واكسى المياري بخيـر فضيـل
هروق يروق ويحيـي العـروق = تولّـوه أمـلاك نعـم الوكـيـل
بودق هدق الارض شطّف حصاها = رعـود تـداوا وبـرق شعيـل
وسمر المباني وبيـض البـروج = وخرس غشاها كما ثـوب نيـل
بليلـة ثاعـت الـمـاء فــوق = سماكيّـة مـن عطايـا الجليـل
لها الرّعد زاوي وشرتا زغاوي = وهيّض بكاهـا رميـج الخليـل
سرى بينهم هرج بكي وضحـك = وشمت المواشي وجهل الخليـل
تمنّيتهـا ويـن أباهـا ويــات = على وادي الذيذ ضـرب وسيـل
تطيب المفالي مـن أول وتالـي = وطاب ا لزلالي عمـار النخيـل
إلى زلّ من موسم الصيف شهـر = تناسـع ذراهـا بطلـع ثلـيـل
حسين قفا بيـن قلـب وكـرب = ومن لـه نظيـر لقـاح العطيـل
وطهيه نضا لا بشوي ولا طبـخ = مقات الضعافـا وطعـم السبيـل
لذيـذ طعامـه وحـلـو جـنـاه = تولّوا حصـاده بـوزن او كيـل
ولفّوا عراها بقمصـان خـوص = وعادت امّاته إلى الـدور حيـل
تنحّوا وكـل نهـي فـي هـواه = عن الدار وانوو مشـام الرحيـل
وجات الصفاري وزلّ المقيـض = وبانت غبيشه لواضـي سهيـل
وعادت البـدو للمفالـي تشـوم = ودنّـوا الشوقـي عبيّـن ثليـل
حسين التّهادي بالاضعان شـادي = وإلى سمع حادي تعـد المجيـل
مديخ براسـه صليـل اليراسـه = ولا يرخي باسه المـتّ الجديـل
إلى سمـع حـسّ المغنـي وراه = تعلّم من الرّبـد مشـي الهذيـل
يدوس التّعدّي ولـولا المجـدي = يجـي للمنـازل مصـرّ دلـيـل
وحيّ الجمل والـذي يـا عليـه = ولو كان مـا نالنـي منـه نيـل
وقفّوا ونـا كنـت شفـج عليـه = وجوبـه وداوو فـواد علـيـل
تناسـا العظـام وكنـه غـريـر = وبان ابتسامه من أرهاف شيـل
عليـه اشتبـاه بعنـق وعيـن = نهبهن ضحى من غزال السليـل
بخد نشـا بيـن لشبـاه ضـرب = نشا بينهن قـود عـرن جميـل
متيـه بزيـن اولاحـظ ابعيـن = وعيـن يغـذي هدبهـا يمـيـل
وحارب وضارب هوى العاشقين = وحارب ولالي على الحرب حيـل
حسبتـه بأنـه يـداري الالــه = ولا له صـلاح يـوازي الدليـل
تنحّيت له مثـل غـيّ الشـراب = ومن ضلّ عقلي تركت الصّميـل
ومن ترّ ك الما على شـوف لال = فـلا زاده إلا هـلاك السبـيـل
حسبتـك بأنـك صديـج امـود = وثـرك العـدو الـذي مستحيـل
تدوس العنيف وتبلـي الضعيـف = على الدّيه وأنت معـك الجتيـل
وثرك ما تداري عواقـب لمـور = ولا خفت مـن غايـلات تغيـل
إلى عدت مـا تعلـم المجبـلات = ولا سلـت عنهـا ولا تستسيـل
وهي عابـره بيـن هـذا وذاك = ومـرّ تعـادل ومــرّ تمـيـل
وإن كنت سالي عن حسن حالـي = مطـلّ مظـلّ وقلـبـي نحـيـل
وأثمـار لشجـار والـذاريـات = والأطلال من روس النّقايا يهيـل
ويوم دنا الشّيب ولّـى الشبـاب = منوّخ ارجابـه يحـثّ الرّحيـل
دهاني المشيـب بـدولا تحـرب = وهجن خطتهـا ملابيـس خيـل
إذا جيـت باهـوش ذل الربيـع = دخلـن عليـه ركـاب الدخيـل
لجيني خـلاوي عـدا بالسـلاح = بضرب الخناير وسيـف صجيـل
صفى الضرّب فيّه وهو سلّمـوه = وكنّي أنـا إلّـي عليّـه البتيـل
فرح بي ثره يـوم حـق اللحـام = وربعـي غـدو يبلـدون الغليـل
ولآل تصـول بجيـش وضـول = عليك المعـادي بجيـش يصيـل
عسرني التّغاضي تغاضيت غصب = كما رافع الرمـل عينـا العديـل
رفعت الكفوف أبـا زود شـوف = وبانت عدوف المواشـي حجيـل
وعقل رجـا مـن عـدو يعـفّ = أنا أقـول هـذاك عقـل هبيـل
ولكـن للسّبـع غيبـات أســد = شكى الغبن من كان للسبع غيـل
بغيت ماريت من الشّيـب طيـب = واثره العـدو الخصيـم النزيـل
يهدم السّنـون ويـرثّ العيـون = وظهـر تداعـا ومـاذات ريـل
وبيـس بدنيـا وراهـا خـراب = ومـرّ تعـادل ومــرّ تمـيـل
وتزهي وتلهي عـن المحسنـات = وتفـرح وتثنـي فرحهـا بويـل
ونلعب ونتعـب و هـي ماتـدوم = وهي آخر اللعـب ماتـت ابعيـل
وصلو يا حضور على الرسـول = عدد مابها نـاض بـرق شعيـل






توقيع الطائر المهاجر
 
  رد مع اقتباس
قديم 27-09-2007, 02:59 PM   رقم المشاركة : 8
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


يقول الفهيم المايـدي إلّـي بنـا = بـدع تـراه الفاهميـن أمثالهـا
مامونة مـا قلتهـا فـي مذمـة = ونزهه إلى راعي المثايل قالهـا
إلى طرا طاري القصيد نوو لهـا = ولا يطربون الرامسيـن إلا لهـا
الجيل ما بين همـاي او طيـب = ولا الهمـاي المستلـذ إزلالهـا
والناس أجناس خبيـث اوطيـب = ولا يشبهون الخيّريـن أنذالهـا
لنـذال متجرهـا مناقشـة البـلا = ولتثيـب إلا والخبيـث احذالهـا
والخيرين إدّافـع اسبـاب البـلا = تطفي الخبيث بمالهـا واجلالهـا
كرام يهون المال دون اعراضها = ولا تبجّي بالعرض دون أموالهـا
لو تكثر أمـوال البخـالا مابهـا = خير ولا نال الصديـج أنوالهـا
كلعشب يربي في الهشيم كما ترى = حتى يظول اولا يـرى ظوالهـا
ناس حوو دنيا ودين من الهـدى = وفيما عطاهـم ربهـم هنيالهـا
والبعض لا هم هـؤلاء ولا هـم = خلّوا الدّنا والدين مـن أمثالهـا
كذلـك الدنيـا ولـو صافيتـهـا = واتعدّلـت لا بـدّ مـن ميّالهـا
حوشاتها لذات خمـر اوذوقهـا = قشرا تزّهـي للغريـر أخيالهـا
خايلـت بـرّاق وبـرق خـلّـب = ييزيك عن لا تورد الماء لآلهـا
تعمل خطاك ولو عطتـك اللـذه = شروا مهب ويـن دار إحيالهـا
من مشرق الدنيا الـى مغربهـا = متلاطمـات اجنوبهـا واشمالهـا
كـم باتبهيّهـا ممـرّ اسنينهـا = أيامهـا واسبوعهـا ولياليـهـا
والسّرمديّـات الشّهـر معلومـه = لو مـا يفنّدهـا بيـان اهلالهـا
خذ لك مثل مالعارفين او جيلهـم = دنياك ما تدري بكيـف أحوالهـا
لا تستظيم الأمر يجـلاه العلـي = خلّ الأمـور ولا تـرى زوّالهـا
إن الأمور الهـا الآلـه امدبـر = مانت الذي تقدر علـى عدّالهـا
حال رضيت اولا زعلت الاسـوا = ما هيب نشّـاده عنـه زعّالهـا
ترويـك منهـا صحبـة مجفيـه = ولا بد من يـوم يميـل إيلالهـا
ما في صداقتها صلاح اولا بهـا = خيـر تبـدل لامهـا بزوالـهـا
مـكّـارة غــدّارة بصدقـاهـا = ناس دعوها وذخـر واعزّالهـا
لا تستغرّ ابها تراهـا مثـل مـا = غيم الضّباب ولا يـدوم اظلالهـا
لو كحلّت عينك مراودهـا البكـا = لازما تلحـظ بالدمـوع اكحالهـا
الناس تدري المـوت حـق لازم = لكن ما تـدري متـى يوحالهـا
إلا القلوب إلهـا دروب غزيـره = مستوعرات والطريـج اسوالهـا
عنهـا تواكيـد العلـوم لأنـهـا = سحر تماري به ظنيـن اعيالهـا
من شفتها في الأولات عرفتهـا = ومن فيـه زلات ثنـا بامثالهـا
ما دامت ألا لمن يـداوم بالتقـى = دار المقـر او منتهـاك إلا لهـا
والآخـره لازم وخيـر مالـدّنـا = يـوم المـلا مشتغلـة بأموالهـا
شاجين فيها والشقا ضد التقـى = ولا ذاك إلا الصالحـات أبقالهـا
لها مطامـع ظلـم لـذات الغنـا = تدري عصى الميزان من عدّالها
أصبر على البلوى وآمن بالقضا = لا تحسبن الناس ويش انزالهـا
لي ما بنا بيت التّقى قبل الشّقـا = وإلا على الشّطّات مـا واحالهـا
من حمّل البارات يـوم إخواهـر = يتعب نهار الخـبّ فـي نزّالهـا
يوم الخلايج شاخصين أبصارهـا = عري اليبوب احريمها واريالهـا
ما يرتجون إلا الشفيـع محمـد = والعفو من رب يـروف إبحالهـا
إن زلّقت ريلك وحل ابها القضـا = الأخرى احسبها حالها من حالها
تعدّ الظمايا الرّاشين على الظمـا = وإلا فـلا تعـد الـذي يكبالهـا
ما شفت أنعـام غذيـت ابدرّهـا = والباسقـات الزّاهيـه بحمالهـا
ومواشي حلّت عليـك الحومهـا = مفـنّـد حرامـهـا وحلالـهـا
والخيل والهيـن إلتـي زمّلتهـا = ذلّ عواصـي صعبهـا وجمالهـا
بين البلا والروح بـاب صداقـه = تهدي إليه او مرّه يهـدى لهـا
إن كتب الله تربـه فـي جريـة = لازم تزهّـي نـيّـه اويعنالـهـا
وإلى توافق في الحسـاب الأمّـة = مـا تستزيـد إلا وفـا مكيالهـا
فالوصف حبل بين كـفّ الجالـد = تـمّ الجـلاد إذا وقـف ميّالهـا
ثم الصلاة علـى النبـي محمـد = ما هبّ نسناس الغصون او مالها






توقيع الطائر المهاجر
 
  رد مع اقتباس
قديم 27-09-2007, 03:03 PM   رقم المشاركة : 9
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


يقول المايـدي أبيـات شعـر = طـرا بنيانهـا وافـي التّمـام
مثايلهـا تشـوّق الرّامسيـن = الى من ظال ظـول وازدحـام
سقيت وظمّ واردهـا العطيـن = ظماياهـا روو وهيـه حـيـام
تفـزّ الهـا قلـوب الفاهميـن = وخالي البـال خالطـه المنـام
إلى جابو التّجار حـزوف بـزّ = جلبت أجناس غاليـة المسـام
جواهر جوخ لار ومـن خيـار = رقود سلمـيّ أو حمـر شـام
يناعتها الزّبـون لهـا يبـون = زمان البـدو ينـوون المشـام
وقفّـوا منتـويـن مجنبـيـن = تـوارى دونهـم لال الكـتـام
خفاني الشّوق خالفت الكفـوف = وعانق صبعي الوسطى لبهـام
ومـرّوا كالسّفيـن العابـرات = ترس في شرعهن شرتا لولام
على هين يجوز ابفـوز زيـن = صموت الحجل معلول الوشـام
ربـا بـرّ أغـرّ الوجنتـيـن = مكنّ في الخبا من حـول عـام
يدنّا لـه مـن اقفـار الفـلاة = عبيهـن نبـا منـه السّـنـام
عبـنّ مسـتـدنّ المنكبـيـن = صبوغ من ذ فاريـة الزّهـام
يصفون الرقوم او هـو يـزوم = وإلى من لغـز للدّايـات قـام
تناحيه القروف اوهو زفـوف = فلوما الخلوف منتسع الخـزام
إلى منه حـدا الحـادي قفـاه = تيلّـل مثـل مذيـار النّـعـام
ونادوا من يبون اتجـي ويـاه = بلا جهر خفينـا الهـا النّهـام
ويات اتميل بالحـال الجميـل = وتمشي مشي راعبـة الحمـام
توادعهـا الجـران المولهيـن = موادعـة التحيـة والـسّـلام
وأنا محتـار بيـن الشّايتيـن = حيث نّه ماينـا بينـي الكـلام
صديج من بعيـد ابـلا مزيـد = مرافقـة العبيـد أولاد حــام
صديج ما يسرّ كمـا تشـوف = عـدوّ مـا يضـرّك بانتقـام
معيضك من هوى المجفي جليل = معيض الخيل من علج اللّجـام
تباها لي منّـه بريـام صـدر = بـلا نفـع وبيـس بالـرّبـام
وبالمثلا طهايـة بـو نـوّاس = ولا غيـل فشـيّـال الـكـلام
مراوات الـذي صـلاّ وخـلاّ = صـلاة مـا يزكّيهـا صـيـام
إلى عدت موجد وعليك ديـن = علامك عسر ما توفي الذمـام
مراعـات الثّريّـا للرّجـيـب = تعيب اوهو يبيـن خـلاف زام
تحافظ عنك جمـل الحاظريـن = إلى ما طلتنـي ضـاق اللّيـام
أقطع الله مطمع يوزي البغيض = وحال يورث الشّكوى الزهـام
ويدني مـن مغالظـة القلـوب = ويضني مـن مناقلـة الكـلام
ظنا مـا فيـه نفـع للعـروف = ولا هو جـاز لـولاد الحـرام
إلى ربّوه عجزوا عـن ربـاه = احتاجو لـه لدايـات الضّمـام
يباله مـن يوالـي باعتـراف = موالات الجنيـن إلـى الفطـام
ورانا نخـدم الدنيـا ابـلاش = مـدا بيّـن سفرهـا والظـلام
ولا في خدمة الدنيـا صـلاح = سوى ثوب المقـادر والطعـام
واثرهـا هيـه تلّهينـا ايليـن = تنقّـل مـا عنـاهـا لـلأنـام
توادعنـا إلـى حـق الفـراق = بكوز ماء وقطعة ثـوب خـام
ونلقى حفـرة غبـر المجـال = جزى الله من يودي الها السّلام
وحطّـوا فوقهـم متعاتبـيـن = اثنيـن مـا يعرفـون الكـلام
وذا نيشـان حـظ المسلميـن = عن الكفـار كـل لـه سـوام
تجـد بمـا تقـول العارفيـن = سمعت أبيات وصـف للغـلام
إذا طاحت من اليمنى عصـاك = فلا تخطـا يسـارك مالزمـام
انا رايت أربعة ما يصطفـون = ولا يبـقـى لحلـواهـم دوام
معاهـدت النّسـا المطربـات = وكثـرة لـذة المـال الحـرام
وحكم جاير مـن غيـر حـق = ولا يخلو السّمـا مـن الغمـام
سمعت ابهدهد في هـدو ليـل = تحايا بـه اقليـب المستهـام
كشفت الحاف مضفي اللفـاف = نظرته عقب ما طـاب المنـام
شمالي منكس الجـوزا قصـاد = مغيب الشمـس للقبلـة يمـام
ترى هذا امشـعّ او ذا امفـعّ = وساقه مشمـع سـاق الظـلام
إلى من اضربه عصف الرّياح = دنا من رعدها عالـي النّهـام
سرى شروا رفيف المطربيـن = مزاره دار شوقـي كـل عـام
وضربتها عصي برق رفـوف = تخاخا مـن مغاريـه الحـزام
عليك ابتبـع سـتّ اللازمـات = صلاتك والشّهـادة والصّيـام
وحجّ البيـت والـزام الزكـاة = ونطق الصّدق ما فيه إوتهـام
وصلوا يا رسول على الحضور = عدد ما غرّد القمـري وحـام






توقيع الطائر المهاجر
 
  رد مع اقتباس
قديم 27-09-2007, 03:08 PM   رقم المشاركة : 10
الطائر المهاجر
** (عثمان العبدالله) ** المؤسس والمشرف العام
 الصورة الرمزية الطائر المهاجر





معلومات إضافية
  النقاط : 20
  الحالة : الطائر المهاجر متواجد حالياً

 

افتراضي رد: علي بن ظاهر الماجدي


يقول الفهيم المايـدي اللّـي بنـا = بـدع تـراوه الـرّواة أوشــاع
ما قلـت إلا يـوم ظـال اظويلهـا = مـا بيـن شـرّاي و ذا بـيّـاع
أنـا إلـي كـل لـفـا بمتـاعـه = هيهات ما تلقـى الخبيـث إمتـاع
إلاّ ليربـان القصيـد او حييلهـا = ما طاب منها فـي فـم المجـلاع
مثل الذبيح إللّـي تشبّـع بالكـلا = والعجف ماتصبوا الهـا الأسبـاع
وإذا بغيت إنك تصاحـب صاحـب = لا تصحـب إلاّ جـيّـد الطّـبـاع
حتّى إذا ضـاق المجـال ايثيبـك = بمـدافـع وامنـافـع وافــزاع
لنّك تكن في قلص لي بحـر طمـا = في المغرجات أوصغر كل اشـراع
مالك حميد فـي الطريـق السّـي = الحمد سمت الثّقل فـي المطـلاع
لآل تواصل فـي الحيـاه ابنفعـك = عنـد الممـات فلسـت بالنّفـاع
والموت عنّي ماتفـوت مصايبـه = وان يا الحساب افغيـرك الشّفّـاع
يا خـادم الدنيـا بنصـح تاعـب = لا تستـغـرّ فـإنّـك المبـتـاع
لو ذقت في الدنيا لذيذ إرضاعهـا = لا بد ما تفطمـك عقـب إرضـاع
لا تجفـي إلاّ مـن عناهـا خالـي = لزوم الخلا مـن باطـن المجـلاع
لي ييت بالبيـت الكبيـر الواسـع = لك بيـت حـق مـا يزيـد اذراع
لانسان يفرح عند هبطـت بيتـه = وإذا هبط بيـت التّـراب ارتـاع
ما دمت في دنياك جدّم لـك تقـى = قبل الشقا ما دمت فـي الأوسـاع
والطير يـوم ايطيـر يومـه كلـه = في الليل ما يـازم ابغيـر اوقـاع
وانظر ايلنّ الطير سعـده ريشـه = وان قـصّ مابـه حيلـه وارفـاع
إن تستغيـث الله حـيّ حـاضـر = وان ييت باتسرق تشوف الواعـي
عـلام لشيـا جهرهـا وخفيّـهـا = والغيب بيـن اجوانـح الأضـلاع
وان يسّر الله في يديك فـلا تكـن = ابخيـل ذميـم للعـطـا مـنّـاع
مـدّ الأرامـل واليتامـا والــذي = إبـن السّبيـل إن العطـا نـفّـاع
ما يدفع المقدور لكـنّ مـا يضـر = مثـل الكمـود ايكمّـد الأوجــاع
عزّ النّجيب أو لـو زرا ملبوسـه = لا تنتظـر إلصنـعـة الصّـنّـاع
واتعاف حرّ مـن غياثـه ريشـه = مـا الـرّزج إلا جنحـة القعقـاع
في النّاس ناس لا مـزاد ابقربهـم = وان ماسحـوك اتفقّـد الأصبـاع
وعدّل حسابك في الرّوايـب كلهـا = جـود أن شـي مرّوايـب ضـاع
واحذر جليس فيه ساس ابغاضـه = نطفـة حـرام للخبيـث إمسـاع
يحّـاد سالفـت اليميـل امنـاكـر = فيه لحسـان الأوّلـي جـد ضـاع
مذمـوم بيّـاع الثّنـا بالمـزاهـد = يشري الخبيث إمنين مـا يبتـاع
يدقّ عنـد الذيـب فـي غفلاتـه = وان سمع حس صاح عند الـرّاع
متوقّـف للضّيـف فـي فضلاتـه = يفرح إلى من سمع حـسّ الـدّاع
يبغضك إن سوّى الوليمه غيـرك = واييك لو مـا يـاه منـك الـدّاع
لو الـرّزج دون الله يوخـذ قـوّه = ما يـاع سبـع والكـلاب إشبـاع
في الناس من يمنيك منوى امداهن = ويروغ شروى روغـة الدعـداع
ينبحك مثل نبحة الكلب من بدناتـه = والأسـد فـي غيباتهـن أجنـاع
يعاهـدك مثـل امعاهـدت النّسـا = المطربـات اوعهدهـن اضـيـاع
مثل الأوانـي إن تزايـد حمشهـا = يطفحـن فيمـا يغفـل الـجـدّاع
كذا عصاة الخيـل لـولا الجامهـا = تطرحك إن تمهل لهـا المصـراع
إيّاك لـو لانـت ملاميـس العفـا = لـتـكـون إلاّ مستـكـيـن واع
لا تستغرّ ابهـا أو نغـم اينوبهـا = السّم يظهـر فـي لغـوب الفـاع
وفي الناس أجناس بخيـل اوجيّـد = ومنهم ذليل أومن يكـون اشجـاع
والمشجعه نوعين ولـم أو فالـع = والسّفن فيهـا مستمـر او فـاع
واليسر بعد العسر في قول العلـي = والمحـل يثنـي بعـده المربـاع
رؤيا البروق ايموج راس إرهامها = منـه او ينفحهـا نسيـم الـزّاع
ان زعزعت لرياح روس امزونها = الـودق بيـن احضونهـا نشّـاع
غطّا إينوب البيـد طامـي سيلهـا = وفي الليل جمهـور المـلا هجّـاع
طشّ ايطشّ الأرض بشّ ابربعهـا = عشـب تصانيفـه علـى أنـواع
فيهـا مـن المستامنيـن ثـلاثـة = رعد او بـرق اومغربـي ذعـذاع
يوله عليها او يستزيد ابها البكـا = مـدري متـى حداهـن المطـلاع
هزّاع روس النّايفـات الـى لفـا = والنخـل زور اغدورهـن مـدّاع
أو ناعشات في هـوى زيّ الغنـا = يلعبـن كاشفـات ابغيـر اجنـاع
من ذات حمل مثل غربـان الفـلا = مـا بيـن منشـول وذا منسـاع
ياما قفيـت أولا شفيـت غلايلـي = وانكفت لو كـان القلـوب اهـلاع
من شفت لاح الشّيب جنّي شايـف = ملح الذيـاب الموحشـات ابقـاع
وايقنت أنّ الشّيـب سبـر للفنـا = وامّا الصّبـا مالـه يميـل ايـراع
قفّـا ولا بينـي وبيـنـه زلّــه = ما واجـب منّـي عليـه انـزاع
شـرع عليـه الاّ نهارامسـيـره = مـا يـازت الفرقـا ابغيـر أوداع
ليمن ذكرت الماضيـات اتزيدنـي = ولـه وذكّرنـي حـمـام الــلاّع
وش بك اتنوح أنا حذاك امرضتني = لا حلـك الله يـا حمـام الـقـاع
متخالف الألحـان جـنّ اعويلـه = من راعبـي او قنطـري وقفـاع
شام الصّبا عنّي أويا مـن لا أبـا = حثايـث منهـا يــرن أدمــاع
كانت ملابيس الشّبـاب ضوافـي = خذهن اوعوّضني ابيـرد إسبـاع
صاب العيون مع السّنون اوغيرهن = وايـلا بغيتـه ينجلـي مـا طـاع
والنـاس تختـال الهـلال إلاّ أنـا = ما عدت أعـرف العـدل ملمـدّاع
ثم الصـلاة علـى النّبـي محمـد = عدّ البذور أو مـا رمـى الـزّراع






توقيع الطائر المهاجر
 
  رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 12 ( الأعضاء 0 والزوار 12)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
دراسه في الشعر النبطي عبد ربه القيسي حكم وامثال 15 16-12-2010 06:50 AM
مقارنات بين الشعر القديم والشعر الحر وقصيدة النثر مازن حجازي مرآة الأدب العربي 15 16-12-2010 06:50 AM
¨°o مــوسـوعـة شـامـلــة لـشـعــركـِ O°¨ الأموره قسم المرأه 15 16-12-2010 06:50 AM
الخلطة السرية لعلاج بعض الأمراض التي تصيب الشعر بارقةأمل قسم المرأه 19 15-12-2010 12:00 PM
الشعر الحر ( لمن أراد ان يتعلم الشعر الحر ) مازن حجازي مرآة الأدب العربي 17 15-12-2010 11:58 AM


الساعة الآن 04:54 PM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لمنتديات الفطاحلة