قصيدتين في تداول

[الطائر المهاجر]

هذا تداول او جحور الثعابين= اللي بنفَس واحد تشلّ الضحيّه
هذا تداول او حريق المساكين =وقبور من لا يفتهم بالقضيّه
لعبت حصاني القوم من مدعي الدين =ورحنا طعام جحوش وارخص هديّه
حسبي عليهم بعد خدعه وتطمين = لفّوا هوامير الجشع للبقيّه
ما يرحمون اللي خذا السهم بالدين= واللي رصيده طار لحظه ونيّه
ما دام قانون العداله بلا عين = "كل من ايده ايله" نظام وهويّه
السوسة اللي ابتدت شجرة التين = لابدّ ما ترعى وتزيد الأذيّه
تحرق نخلنا لاخره دون تعيين = ويشمت بنا الحساد وهل الطويّه
اللي يبون اذلالنا بعد تمكين = الحقد لو يخفوه طبع وسجيّه
سمّ الفكر يرسل ويخدع ملايين = ويلقى شواهد مثل هذي الرزيّه
السوق محكومٍ ببعض الغريبين = خلف الستار وكل نفسٍ رديّه
ما همّهم داري ولا همب ولهين = كلٍ يصدّر ما جمع بالعشيّه
ما دام داري طبعها العطف واللين = الاجنبي يلعب على كل هيّه
وين الرجال وين فخر الشياهين = اللي عرف بالعدل بين البريّه
تكفون يارجال على الدار حرصين = هذا زمان المرجله والحميّه

ليت لي قلبٍ مثل قلب الشمالي = ما يفكّر في تداول بالخساره
رمحه اللي ما انحنى قدام عالي= ذيب في الإقدام عن فهم ومهاره
يالله إنك ترزقه طيب الحلالي = وتبعد المشبوه ما ياكل ثماره
كلّمـا قـدّم نصيحه للتوالي = كسب من يسمع وبادر في قراره
ومن تراخى ما كسب حاله بحالي = غير وضعي يختلف لونٍ وشاره
انسجم ما دام في السهم انشغالي = واخذ الميسور وابعد عن قماره
راتبي المضمون يكفي عن سؤالي = والعيال رجـال كلٍ واقتداره
من تقاعد لايدوّر زود مالي = يرتضي المقسوم يكفيه ادخاره
ولا يقابل حرمته مثل الكحالي = جاهزٍ للشرّ عند ادنى شراره
ينشغل في شئ ما يجلب وبالي = ويبتدي يفهم لنفسه عن جداره
يرجع لأصله بعد زيف الجمالي = بعد عمر ضاع يطرد في غباره
يكتشف قدرات في يومٍ محالي = يكتشفها لانشغاله في مساره
ينفع الأجيـال من عذب المقالي = وفكرةٍ منّه لمن فاته قطاره
في زمانٍ كل شيٍّ صار غالي = غير ذلّ النفس في زيف الحضاره
انتهى وقت الكرامه لا جدالي = والفضيله مالها ذكر وإشاره
دام بعضٍ راكض شرق وشمالي = يطلب الدنيا ويسعى للصداره
لو يبيع النفس بدروب الضلالي = ولو سرق اوغش بانواع التجاره
ما يفكّر في حرام ولا حـلالي = المهم إنّه كسب .. ظنّه شطاره
ما حسب للشمس لحظات الزوالي= يترك الدنيا ولا هو باختياره
صاحبي جاوب إذا تفهم سؤالي = كم ثريٍّ ثروته اسباب ناره
صار عبد الفلس ..فكره بانشغالي= ودّه بلحظة سعاده من نهاره
الدراهم كالمراهم لا جدالي = لكن ان زادت غدت هم ومراره

[الريم]

حلوووين مشرفناا

صح لسااانك الف

تسلمويعطييك العاافيه

[أم ريما]

هـذا تـداول او جحـور الثعابيـن اللي بنفَس واحـد تشـلّ الضحيّـه
هذا تـداول او حريـق المساكيـن وقبـور مـن لا يفتهـم بالقضيّـه
لعبت حصاني القوم من مدعي الدين ورحنا طعام جحوش وارخص هديّه
حسبي عليهم بعد خدعه وتطميـن لفّـوا هواميـر الجشـع للبقـيّـه


صح لساااااانك قصيده جميله جدا والله يعين المتداولين


يعطيك العافيه يا مشرفنا

[ابو زياد]

ابو عبدالله جعلي ما اعدمك
والله انك جبتها
الدعوى كلها عصابات والكبير يرقى على الصغير
الله يسلم لسانك وفكرك

كن الذيابه تنهش من جنايبها

[سناعيس]

الله الله يامشرفنا
مادري هالابداع من حر ماجاك والا من مكاسب خياليه

عموما صح لسانك والله لايهينك جزلات وفي وقتهما

تحياتي

[الطائر المهاجر]

هذي قديمة ... من ضربات سابقة ...
الضربة الأخيرة ما بعد صحيت منها حتى اكتب في ها قصيدة..

[المؤذن]

مشكور
على ما افدتنا به
تحياتي

[المورد]

مشكور
على ما افدتنا به
تحياتي

[الحويطي]

بارك الله فيك
كتبت فقرأت فاستفدنا
تحياتي واحترامي