العودة   منتديات الفطاحله > المنتديات العامة/يمنع الفيديو > سفر وسياحه ومعلومات جغرافيه

إضافة رد
 
أدوات الموضوع
قديم 22-12-2005, 12:21 AM   رقم المشاركة : 1
ابو ياسر




معلومات إضافية
  النقاط :
  الحالة :

 

افتراضي


السلام عليكم ورحمة الله



رحلة 15 يوم إلي أجمل مدينة في العالم


فانكوفر الكندية







أول ما تقرؤون عنوان الموضوع بعضكم بيقول على إي أساس أقول إن فانكوفر أجمل مدينة في العالم ، البعض بيقول وين راحت جنيف و باريس و باقي دول العالم المشهورة.

صحيح فانكوفر مدينة مجهولة و غير معروفه للكثير من المسافرون العرب ، و إلي فتره قريبة كان الكثير من المسافرون العرب ما عمرهم سمعو اسمها.

لكن خذوها مني ، خذو العلم من شخص سافر للمدينة هذي 10 مرات متتالية ، و في كل مره يروح لها يلقاها أكثر جمال و جاذبية من المرة اللي قبل.

كل شخص سألني عنها و راح لها بناً على كلامي ، رجع و قال إن اللي ذكرته عنها ما يجي ولا 10% من جمالها الحقيقي.

ابعطيكم في الموضوع هذا تفاصيل دقيقه إلي أقصي درجة ممكنه عن رحلة لمدة 15 يوم ، ممكن تكون شهر عسل للمتزوجين الجدد و ممكن تكون رحلة رومانسية لزوجين حبو أنهم يعيشون جو فانكوفر الرومانسي ، و طبعاً ممكن تكون رحلة استكشافية لمن يرغب في رؤية مدينة الأحلام فانكوفر.

الرحلة هذي بتكون مبنية على السفر إلي فانكوفر في شهر 5 ميلادي .

__________________


الحصول على تأشيرة الزيارة إلي كندا:


إنا طبعاً ما عمري سافرت إلي كندا بتأشيره لأنه و بكل بساطه إلي قبل سنتين ما كانوا الكنديين يطلبون تأشيره زيارة من السعوديين ، لذلك معرفتي الشخصية باجرات الحصول على التأشيرة محصورة في معلومات أخذتها من السفارة الكندية و من الانترنت.

-) رقم تلفون السفارة الكندية في الرياض هو 4882288


متطلبات التقديم على تأشيرة الزيارة إلي كندا:

-) تعبيه النموذج الخاص بطلب التأشيرة.
-) صورتين ملونه لطالب التأشيرة.
-) كشف حساب بنكي لطالب التأشيرة.
-) تعريف من عمل طالب التأشيرة.
-) إن يكون جواز طالب التأشيرة صالح إلي ما بعد تاريخ العودة من كندا.

المدة المتوقعة للحصول على التأشيرة في حدود 7 إلي 15 يوم و ممكن أطول من كذا و بالذات للسعوديين كما هو مذكور في الموقع الرسمي للخارجية الكندية.


__________________


الطيران إلي فانكوفر:


1) الخطوط البريطانية:

-) تقلع الطيارة من الرياض الساعة 0150 يوم السبت و الثلاثاء و الخميس ( أيضا تقلع من الدمام و جده لكن في مواعيد مختلفة).
-) الوصول إلي لندن حدود الساعة 0600 بتوقيت لندن.
-) مدت الرحلة في حدود 6 ساعات ( لا تنسون فارق التوقيت بين السعودية و بريطانيا ناقص ساعتين).
-) الانتظار في مطار لندن حدود 10 ساعات ( ترى مطار لندن ما ينمل و الوقت بيمشي بسرعة) ، و اللي وده ممكن يمر صالة الواحة ( Oases Lounge ) المخصصة لمسافر الشرق الأوسط و الاسترخاء فيها مع تناول مختلف المشروبات مع المأكولات الخفيفة المجانية ، الصالة مزوده بفرش لمن يرغب بالنوم و غرف استحمام لمن يرغب يأخذ له دش يساعده على الاسترخاء. و ممكن للي يبغى يأخذ له غرفة في فندق المطار و يريح فيها.
-) تقلع الرحلة من لندن إلي فانكوفر حدود الساعة 1600 بتوقيت لندن بعد انتظار 10 ساعات في المطار.
-) و تصل الطيارة إلي فانكوفر حدود الساعة 1800 من نفس اليوم بتوقيت فانكوفر .
-) مدت الرحلة حدود 9 ساعات ( فارق الوقت بين فانكوفر و لندن هو ناقص 8 ساعات).
-) مع العلم بأنه فيه رحله يوميه بين لندن و فانكوفر و أحيانا رحلتين ، يعني اللي وده ممكن يجلس في لندن كم يوم قبل ما يكمل إلي فانكوفر.
-) الخطوط البريطانية عندها شراكة مع الخطوط الكندية ، و ممكن تكون رحلتك من لندن إلي فانكوفر على الخطوط الكندية.
-) تكلفة التذكرة حسب الموسم في حدود 4000 إلي 5000 ريال للشخص.

ملحوظة:

إنا سامع إن الخطوط البريطانية ناوية تلغي خطها بين السعودية و لندن مع بداية شهر 3 ميلادي القادم ، في الحالة هذي ممكن تطلعون من الرياض إلي لندن على الخطوط السعودية.
و ممكن تشترون تذكرتكم على الخطوط الكندية مباشره ، و تطلعون من السعودية إلي لندن أو فرانكفورت على السعودية و بعدين على الكندية.


2) الخطوط الألمانية (لوفتهانزا):

-) الإقلاع من الرياض أيام السبت و الثلاثاء و الخميس الساعة 0225 .
-) مدة الرحلة إلي فرانكفورت الألمانية 6 ساعات و 5 دقائق
-) الوصول إلي فرانكفورت الساعة 0730 بتوقيت فرانكفورت.
-) الانتظار في مطار فرانكفورت لمدة 6 ساعات.
-) الإقلاع من فرانكفورت إلي فانكوفر الساعة 1315 بتوقيت فرانكفورت.
-) مدت الرحلة إلي فانكوفر من فرانكفورت 9 ساعات و 45 دقيقة.
-) الوصول إلي فانكوفر الساعة 1400 بتوقيت فانكوفر.
-) تكلفة الرحلة أيضا في حدود 4000 إلي 5000 ريال.


3) فيه أيضا الخطوط الفرنسية و الدنمركية ( KLM) بس ما عندي فكره عن مواعيدهم لأني ما عمري سافرت معهم ، و اعتقد مواعيدهم ما تناسب المسافر من الشرق الأوسط.

4) الطيران عبر دول شرق أسيا عن طريق الكاثي باسفيك أو السنغافورية أو الماليزية أو حتى الصينية، طبعاً المشوار أطول لان الرحلة من السعودية إلي شرق أسيا في حدود 9 ساعات و من ثم 14 ساعة أخرا إلي فانكوفر ، السعر طبعاً ارخص بس الفرق بس في حدود 500 ريال للتذكرة الوحدة.


______________________


في الطيارة من لندن إلي فانكوفر:


حاولو تقعدون جنب الشباك عشان تستمتعون برؤية المناظر من فوق ايسيلندا و شمال كندا ثم وسط كندا.
المناظر بالذات فوق كندا خيال و روعة ما لها وصف ، بتشوفون في البداية جزر الثلج المتحركة و ثلوج على مدا النظر ، و أول ما تنتصفون فوق كندا بتبدون تشوفون الغابات الكثيفة و البحيرات المتناثرة في كل محل و الأنهار الطويلة ، و أول ما تقربون من المقاطعات الكندية الغربية يتشوفون سلسلة جبال الروكي الكندية بجبالها الشاهقة و الثلوج اللي تغطي قمم الجبال.

و إذا قربتو من حدود مدينة فانكوفر بتندهشون من كبرها و جمالها و في نفس الوقت بتلاحظون تناسق العمران و تداخله مع لطبيعة الخلابة.

في الطيارة بيعطونكم المضيفين كروت تعبونها عشان الجوازات الكندية ، إذا كان عندكم مشكلة في تعبئة الكروت اطلبوا من المضيفين يساعدونكم و صدقوني بيطيرون فيكم و يخدمونكم بعيونهم بالذات على الخطوط البريطانية و الكندية ، إما الألمان فيعتمد على مزاج المضيف.

الكرت بيكون فيه الأسئلة التالية:

-) سبب الزيارة و مدتها.
-) إذا كنت تعرف احد في كندا.
-) كمية الدخان و المشروبات الروحية اللي معك ( ما يسمحون بدخول أكثر من كمية محدودة من الدخان الأجنبي ، اللي يدخن الله يعينه لان دخانهم مخيس.
-) إذا كان معك إهدائيا لحد ( إذا معك هدية سعرها فوق 150 دولار بيأخذون عليك ضريبة).
-) المكان اللي بتسكن فيه.


_______________________


الوصول إلي مطار فانكوفر:

أول ما تنزل من الطيارة بتمشي حدود 5 دقائق الين توصل إلي كاونتر الجوازات ، إذا خفت انك تضيع امش بس ورا الركاب الثانين و هم يدلونك الطريق.

على كاونتر الجوازات بيسألونك عن سبب زيارتك و بيراجعون قائمه معهم عن أسماء أشخاص ممنوعين من دخول كندا و بيطلبون منك تعطيهم تذكرتك عشان يتأكدون من موعد العودة حقك.

أيضا بيطلبون منك تعطيهم الكرت اللي أنت عبيته في الطيارة ، بعد ما يخلص موظف الجوازات من سؤالك و مراجعة تذكرتك بيحط علامة على الكرت اللي معك و يرجعه لك و يسمح لك بالدخول إلي منطقة استلام العفش.

بعد ما تستلم عفشك و تتوجه للباب اللي يطلعك من صالة الوصول بيقابلك موظف عند الباب و يطلب منك الكرت اللي أنت عبيته في الطيارة ، و هنا مربط الفرس ، إذا كان موظف الجوازات حط لك علامة مرور ( علاماتهم مدري وش تعني) فهذا يوم سعدك و بيأخذون منك الكرت و يخلونك تطلع من الصالة ، إما إذا العلامة اللي على كرتك ماهي علامة المرور فهم بيرجعون لك الكرت و يدخلونك مع باب ثاني إلي غرفه كبيره فيها مجموعة أخرا من موظفي الجوازات ، الموظفين هذول بيستجوبونك من جديد و يفتشون عفشك. ( يعني باختصار لا تكذب في الكرت اللي أنت عبيته لأنهم ممكن يصيدونك) ، طبعاً إذا صادوك الموضوع سهل ، بيصادرون اللي معك أو يأخذون عليها ضرائب و بعدين يسمحون لك بمغادرة المطار.


____________________


الخروج من المطار:

قبل ما تطلعون من المطار بدلو الفلوس اللي معكم إلي دولارات كندية ، و إذا كان معكم ريالات سعودية يفضل إنكم تبدلونها و انتم في أوربا .

أول ما تطلعون من المطار منتم لاقين تكاسي قدامكم ، بيصير فيه واحد موجود و على ملابسه كتابه انه مسئول عن التكاسي ، اطلبوا منه التكسي أو إذا بغيتو لموزين طويل ، و قولول له إنكم بتروحون إلي فندق الهيلتون ميترو تاون ( Metro town Hilton ) ، التكسي تكلفته في حدود 30 دولار كندي ، و مدت المشوار حدود 25 دقيقة إذا ما فيه زحمة.




و الخريطة التالية بتوضيح لكم الخط من المطار إلي الفندق ، الفندق هو اللي عنده النجمة الحمرا و الخط الأزرق المتعرج هو الطريق اللي بيمشي فيه التكسي من المطار.




و هذا الخريطة توضح لكم الفندق بشكل أوضح ، موقع الفندق هو النجمة الحمرا.


إنا أتوقع إنكم بتكونون طلعتو من المطار و في طريقكم للفندق حدود الساعة 1600 بتوقيت فانكوفر ، و يكون باقي على غرور الشمس حدود ساعتين إلي ثلاث ، لذلك احرصوا إنكم تتفرجون على الطريق اللي بيمشي فيه التكسي لأنه بيمر جنب بعض الغابات و نهر الفريزر ، و قبل الوصول للفندق بتلاحظون إن التكسي بدا يطلع ما يشبه طريق جبلي ، و السبب هو إن منطقة الفندق فوق هضبه مرتفعة عن باقي برنبي و فانكوفر. و انشاءالله ما يكون الجو ممطر عشان ما يفوتكم ولو جزء بسيط من جمال فانكوفر.

أول ما توصولون للفندق و تستلمون الغرفة حقتكم ، أكيد بتريحون شوي من مشوار الطريق و بتأخذون لكم دش و بتتعرفون على غرفتكم و تتفرجون على المناظر اللي تطل عليها شبابيك غرفتكم.




هذي صوره خارجية للفندق.



إنا تعمدت اختار لكم هذا الفندق لأنه أولا جديد ( مبنى من حوالي 4 سنوات ) ، و لأنه يقع في منطقه حلوه و هادية و إستراتيجية ، الفندق جنبه كل شي ممكن يحتاج له الشخص.
الفندق 4 نجوم و يكلف حدود 400 ريال سعودي في اليوم.


بعد ما تريحون لكم حدود 3 ساعات في غرفة الفندق ، أكيد بتكونو جايعين و ودكم تأكلون شي زين.
إنا أرشح لكم مطعم تايلندي ( إنا ناسي اسمه ) ، لان أكله جداً لذيذ و لأنه أول مطعم أكلت فيه أول مره زرت فانكوفر عام 1994 ، و ميزت المطعم انه خلف الفندق مباشره على شارع كنقز وي ( Kings Way ) ولا يأخذ منكم أكثر من 3 دقائق مشي.




الخريطة توضح الطريق للمطعم ، اتبعوا الخط الأزرق ، و النجمة الحمرا هي الفندق.


رغم إن شهر 5 في فانكوفر هو منتصف فصل الربيع إلا إن الجو يكون في بعض الأحيان شوي بارد ، عشان كذا خذو معكم من ديرتكم جكيت واحد خفيف و يفضل يكون مقاوم للموية عشان المطر.
في المطعم أوصيكم تأخذون كمقبيلات لحم تايلندي مشوي زى الكباب و يجي على عصيان صغيره و يكون معه صحن صغير من زبدت الفول السوداني و المطبوخ بطريقة خاصة كمقدمة للأكل ( ابتايزر) ، بعد كذا اطلبوا لكم شوربة الربيان الحارة التوم يوم قوونق ( Tom Yum Goong ) ، و إذا تحبون الأكل الحار اطلبوا منهم ما يحطون فيها فلفل.

بعد كذا اطلبوا الطبق الرئيسي المفضل عندهم و اللي ما تلقونه عند احد غيرهم و هو طبق مشكل من المأكولات البحرية بالخضار ( Seafood platter ) ، شي يجنن شي خطير ، طبعاً الأكلة تجي حارة بالفلفل ، بس انتم ممكن تقولون لهم يقللون كمية الفلفل أو ما يحطونه بالمرة. و اطلبوا مع الأكلة اطلبو رز ابيض أو رز مقلي مع الخضار ( فرايد رايس).

و إذا ما تحبون الأكل البحري ، عندهم تشكيله كبيره من الأكلات الثانية.

العشاء بيكلف حدود 50 دولار كندي لشخصين.


بعد ما تخلصون من العشاء و تشبعون ارجعوا للفندق و نامو لأنكم أكيد تعبانين من المشوار.

إما إذا فيكم بعد بعض النشاط ، ممكن إنكم تمشون للسوبر ماركت الكبير اللي جنب الفندق و تشوفون إذا انتم محتاجين بعض الإغراض لغرفتكم أو لكم في الفندق (تراني نسيت اسم السوبر ماركت).

طبعاً إنا حرصت إنكم تروحون للسوبر ماركت و تشوفونه عشان تشوفون الفرق بينها و بين اللي عندنا في السعودية ، بس يا خوفي معاد تطبون سوبرماركتات السعودية عقب ما تمرون هذي.

قبل ما أنساء ترى السوبر ماركت هذا اللي قلت لكم عليه صغير بالمقارنة بواحد ثاني كبير في مجمع الأسواق اللي جنب الفندق.




الخريطة توضح طريقة الوصول للسوبرماركت من المطعم التايلندي ، الشارع اللي يودي للسوبر ماركت من المطعم التايلندي ما يظهر على الخريطة ، انتم امشوا مع الخط الأزرق و أول شي بتشوفونه هو مطعم الريد روبن ( Red Robin )
و هو المربع الأزرق في الخريطة ، وجنب المطعم ممر للمشي بعدين يجي محل ستار بكس (المربع الأخضر) و جنب الستاربكس يجي مطعم يوناني صغير يبيع الشاورمة و بعض المشويان ( المربع البنفسجي) و بعده يجي كم محل صغير ، بعدين يجيكم السوبر ماركت ( المربع الاسود) ، و جنب السوبر ماركت فيه مطعم الأكلات السريعة اي اند دبليو ( A & W ).

مع العم انه للمطعم التايلندي باب خلفي يطلع مباشرة على مواقف السيارات المقابلة للسوبرماركت.

اليوم الثاني من الوصول لفانكوفر:

أول ما تصبحون إما افطرو في مطعم الفندق أو اطلبوا فطور في غرفتكم ، و احرصوا إنكم تقولون لهم إنكم ما تبون لحم خنزير في الأكل ( قولو لهم : نو بورك اور هام).

بعد كذا إذا تبون تستأجرون سيارة اتصلوا على احد شركات تأجير السيارات التالية و قولو لهم إنكم ساكنين في فندق الميترو تاون هيلتون ( Metro Town Hilton )في مدينة برنبي ( Burnaby ).

أسعار السيارات تختلف حسب النوع و مدت التأجير ، لكن إذا أخذتم مثلن سيارة فورد توريس بالنضام الاسبوعي ( تأجير السيارات يومي أو أسبوعي أو شهري ) بيكون السعر بدون الضريبة و التامين في حدود 250 دولار ، يضاف إليها 14% ضريبة و 10% تامين شامل ( طبعاً السيارات تعرض عليك بدون تامين لان الكنديين و حسب وثيقة التامين الخاصة بسياراتهم ممكن يغطون تامين سيارة الاتجار تحت وثيقة التامين الخاصة بسياراتهم الشخصية ).

يعني السيارة بتطلع بحدود 300 دولار كندي في الأسبوع ( حدود 900 ريال سعودي).
طبعاً عشان تستأجرون سيارة لازم يكون معكم بطاقة ائتمان و تكون معكم إما رخصة دولية أو تكون رخصتكم مترجمة باللغة الانجليزية.

و هذي أرقام تلفون بعض الشركات:

-) ناشونال لتاجير السيارات ( National ) : رقم تلفونهم ( 8002277368 ).
-) ثرفتي لتاجير السيارات ( Thrifty ) : رقم تلفونهم ( 8008474389 ).
-) بدجت لتاجير السيارات ( Budget ) : رقم تلفونهم ( 8002688900 ).
-) ديسكاونت لتاجير السيارات ( Discount ) : رقم تلفونهم ( 8777428787 ).

حقين شركة التأجير بيجون الين عندكم و يأخذونكم إلي مكتب التأجير و يخلصون أجراءة التأجير و يعطونكم السيارة ، طبعاً المشكلة ألان هي في رجعتكم إلي الفندق من مكتب التأجير ، اللي منكم يقول انه دلوله و يقدر يعرف طريق الرجعة من التركيز على الطرق اللي هو يمشي معها إلي مكتب التأجير او بإمكانه يطلب من مكتب التأجير يبيعه خريطة للمدينة أو يشتريها من احد محطات البنزين اللي يمر عليها.

و اللي من النوع القلق و يخاف انه يضيع ، يفضل انه يؤجل موضوع استئجار السيارة إلي بعد المرور على مجمع أسواق الميترو تاون اللي جنب الفندق ، لأنه في المجمع ببلقاء محل يبيع خرائط و ممكن يشتري منه خريطة.

إذا جت الساعة 10 الصباح و كنتم قررتو ما تستأجرون السيارة إلا بعد ما تشترون الخريطة من سوق الميترو تاون ( إنا أفضل إنكم ما تستأجرون السيارة إلا بعد ما تشترون الخريطة) ، فغيرو ملابسكم و البسو جزم مناسبة للمشي و توكلو على الله وروح لم السوق.




الخريطة توضح طريقة الوصول إلي المدخل الأول للسوق ، إذا طلعتو من باب الفندق لفو يسار مع الخط الأزرق الين توصلون إلي تقاطع الطرق ، بعدين لفو يمين من عند المطعم التايلندي و امشو على طول ، بيجيكم مطعم الريد روبن على يمينكم و بعده بيجيكم مطعم بوسطن بيزا و جنبة بيجيكم محل أو مطعم ( المحل هذا تغير أكثر من مره ولا ادري وشو الجين) ، بعد ما تعدون المحل هذا بيجيكم درجة صغيره ، اطلعوا معها و بيجيكم مبني طويل على اليمين امشو جنبة الين يجيكم مدخل السوق. الممشى كله من الفندق الين مدخل السوق بيأخذ منكم حدود 5 دقائق.




من الخريطة أول ما تدخلون السوق بيجيكم محل أدوات رياضية على اليسار و سوبر ماركت كبير على اليمين ، السوبر ماركت اسمه ذا كنيديان سوبر ستور ( The Canadian Super Store ) مقابل السوبر ماركت فيه زي البقالة الصغيرة و عندهم جميع أنواع و إشكال الخرائط لمدينة فانكوفر و لكل كندا ، احرصوا إنكم تشترون الخريطة اللي على شكل كتاب اللي أوراقه بحجم أوراق التصوير A4.

جنب البقالة هذي بتحصلون بنك و مكائن صرف إذا كنتم محتاجين تسحبون من حسابكم في السعودية.

بعد ما تشترون الخريطة تمشو في السوق بس انتبهو لا تضيعون ، ولا أقول أكيد بتضيعون عشان كذا تذكرو إنكم دخلتو مع الباب اللي جنب سوبر ماركت الكنيديان سوبر ستور ( إذا بغيتو تقولون اسم السوبر ماركت قولو سوبر ستور مندون ما تقولون كلمة كنيديا) طبعاً هذا إذا ضعتو و احتجتو ترجعون لم الباب اللي دخلتم معه.

سوق الميترو تاون ( Metro Town ) هذا هو اكبر سوق في فانكوفر و في مقاطعة برتش كلومبيا ، فيه حوالي 460 محل من كل شكل و نوع ، فيه محلات ماركات عالمية مثل:

Swatch
Avanti
Bentley Leather
Mayfair
Gap Kids
Jacob Jr.
Sears
The Bay
Zellers
The Body Shop
GNC General Nutrition
Aldo
Bata Shoes
Nine West
Club Monaco
Costa Blanca
Danier Leather
Esprit
Gap
Guess?
Roots
Tommy Hilfiger
Zara
La Senza
Fairweather
Mariposa


إنا أشور عليكم إنكم ما تتقضون أو تشترون شي غير ضروري من السوق ، لأنها بتثقل عليكم من غير داعي ، إلا إذا كنتم بتشترون جكيتات خفيفة عشان البرد الخفيف و المطر.

بعد ما تخلصون من الدوران في السوق ممكن إنكم تتغدون في صالة المطاعم ( الفود كورت ) الموجود في السوق ( ترى فيه 2 فود كورت) أو إنكم تتغدون في احد مطاعم السوق الكثرة أو إذا بتأخدون شورى ، تغدو في مطعم الريد روبن ( Red Robn ) اللي كان في الطريق من الفندق إلي السوق.

إذا قررتو تتغدون في مطعم الريد روبن انا اشور عليكم بالأكل التالي:

مزمزو لكم كمقبلات على أجنحة دجاج حارة اسمها بزرد وينقز ( BUZZARD WINGS ) ، الأجنحة يقدمونها مع صحن صغير من الجينة الزرقاء ( ترا الجبن ماهو ازرق اسمه بس كذا) و بتدعون للي لأنها اخطر أجنحة ذقتها في حياتي.

بعد كذا إذا تحبون البرقرات ( المطعم عنده تشكيله واسعة من البرقرات الخطيرة) و كنتم جوعانين اطلبوالمونستير برقر ( MONSTER BURGER ) ، و هي مكونه من طبقتين من لحم البقر المفروم مع الجبنة الذائبه و الخس و الطمامط و الخيار المخلل بالإضافة للميونيز .

أو جربو شرائح فيلية الدجاج مع البطاطس و ركزو على البطاطس حقهم ياهو بطاطس ولا في الأحلام ، اسم الاكلة كلوكس اند فرايز ( CLUCKS & FRIES ) ، و قولو لهم إنكم تبون الوجبة و ليس الابتايزر.

و إذا تبون شوربه جربو شوربة الكلام شاودر ( CLAM CHOWDER ).

و إذا تبون سلطة لا تفوتكم سلطة السيزر حقتهم.

سعر الأكلات هذي لشخصين في حدود 40 دولار كندي.


بعد ما تخلصون من الأكل ارجعوا للفندق ، بعد كذا إما ريحو و اتصلو على شركات تأجير السيارات أو اجلو الموضوع إلي ثاني يوم ، لان اليوم هذا قرب ينتهي و حرام يأخذون منكم اجأر سيارة على اليوم و هو ما كمل .
إذا قررتو ما تستأجرون السيارة إنا اشور عليكم تمشون للحديقة القريبة من الفندق و اسمها السنترل بارك ( Central Park ).






الخريطة توضح طريقة الوصول للحديقة من الفندق ، انتم اتبعوا الخط الأزرق.


الحديقة هي احد اكبر الحدائق في فانكوفر ، هي عبارة عن غابه فيها بحيرات و أشجار و ورود من مختلف الإشكال ، فيها أيضا ملاعب تنس و سلة.

و انتم في الحديقة لا تستحون تقطفون الكرز الأحمر أو الأزرق من أشجار الكرز الموجودة في الحديقة بكثرة.
المشوار من الفندق إلي الحديقة في حدود 10 دقائق.

التمشية في الحديقة و التمتع بطبيعتها الخلابة بيأخذ منكم حدود ساعتين ، بعدها ارجعوا للفندق قبل ما تغرب الشمس ( الشمس تغرب في شهر خمسه حدود الساعة 6 أو 7 مساءً).

إذا رجعتو للفندق ممكن إنكم تقضون باقي اليوم في الفندق تتفرجون على التلفزيون أو ممكن تسوون زيي و ترجعون للسينما حقه السوق و تشوفون لكم فلم.

السوق فيه مجمعين للسينما ، الأول مقابل الفندق على طول بس السينما هذي صغيره و قديمة ، أو ممكن تروحون للسينما الكبيرة و الجديدة و اسمها سلفر ستي ( Silver City ).




الخريطة توضح موقع السينما الصغيرة ، اتبعوا الخط الأزرق ، و في النهائية بيجيكم مدخلين على شكل درج حديدية طويلة توديكم للدور الثاني.


جنب السينما الصغيرة فيه محل كبير للالكترونيات أسمة ذي فيوتشر شوب ( The Future Shop )، إذا كنتم من محبي التجهيزات و الأجهزة الالكترونية ، لا يفوتكم المحل هذا لان فيه أشياء ما عمركم شفتوها.




الخريطة توضح طريقة الوصول للسينما الكبيرة الموجودة جوا السوق ، انتم اتبعوا الخط الأزرق ، أول ما تدخلون مع الباب و اصعدوا مع الدرج اللي تجيكم على اليمين للدور الثاني ، إذا وصلتوا للدور الثاني لفو يمين و بيجيكم مطعم تي جي اي فرايديز ( T.G.I. Friday`s ) قدام المطعم على طول درج متحركة توديكم للدور الثالث و للسينما .

تنقو الفلم اللي تبونه و اشتروا التذكرة حقته ، إذا كان باقي على الفلم وقت قبل ما يبدأ ممكن تنزلون للدور الثاني و تخلون مطعم فرايديز على يمينكم و تمشون قدام الين يجيكم محل العاب الكترونية ( اركيد ) ، اسم المحل بليديوم ( Pladeom ) ، المحل هذا فيه العاب الكترونية من كل شكل و نوع ، إنا ما عمري شفت اركيد فيه العاب يكثر المحل هذا ، هو مكون من دورين و كل دور فيه العاب ، إذا تبون تلعبون بالألعاب اشتروا من عند الكاونترات اللي في المدخل كرت يسمح لكم بالعب ، طبعاً سعر الكرت يعتمد على عدد المرات اللي بتلعبون فيها.

و لا تقولون إنكم منتم بزران و إن الألعاب ماهي جائزه لكم ، انتم ادخلوا المحل و إذا شفتو الألعاب بتحسدون البزران و بتصيرون زيهم.

عقب ما تخلصون من الفلم أكيد بتكونون جوعانين ، مرو على مطعم فرايديز و كلو اللي انتم تبونه ، و ترى لحم الستيك البقري عندهم زين و ما يفوت.

و إذا تبون رائي في وش تأكلون :




عشان ما تختلفون على نوع المقبلات خذولكم صحن مقبلات مشكل سمه ثري فور ال ( THREE-FOR-ALL ) ، و يتكون من البطاطس و جبنه الموزريلا المقلية و أجنحة الدجاج الحارة .





و إذا تبون سلطة جربو سلطة دجاج سانتا في ( SANTA FE CHICKEN SALAD ).


إما بالنسبة للوجبة الرئيسية فيعتمد على رغبتكم.




فيه باستا (مكرونة) كاجونا الدجاج و الربيان ( CAJUN SHRIMP & CHICKEN PASTA ).




و فيه الربيان المشوي ( SIZZLING SHRIMP ).




و فيه المفضل بالنسبة للي الجاك دانيلز ستيك ( JACK DANIEL'S STEAK ).


بعد كذا عاد ارجعوا للفندق و ناموا نومه العوافي.


( يتبـــــــــــع )



اليوم الثالث من الوصول لفانكوفر



إذا اصبحتو الصبح و بعد ما تخلصون من موضوع سيارة التأجير ، ممكن إنكم ترجعون للسوق حق الميترو تاون و تتقضون لكم شوي ، لان السيارة معكم ولا عندكم مشكله في شيل الإغراض.

و عشان ما تتوهقون مع الشرطة في ما يخص نضام و قوانين قيادة السيارات في فانكوفر هذي بعض المعلومات العامة:

- اغلب شوارع فانكوفر لازم تدفع فلوس مقابل الوقوف فيها. وسعر الوقوف يختلف من شارع إلي أخر.

- ما بين الساعة 6 إلي 9 الصباح و ما بين الساعة 3 إلي 6 بعد الظهر من يوم الاثنين إلي يوم الجمعة من كل أسبوع يكون وقوف السيارات ممنوع في اغلب الشوارع و بالذات في وسط المدينة حتى لو كنت دافع فلوس مقابل الوقوف ، و إذا نسيت توخر سيارتك من الطريق اللي فية الوقوف ممنوع في الأوقات هذي الله يعينك على المخالفة والله يعينك تروح لم الشركة إلي سحبت سيارتك و تدفع لهم قيمة السحب.

- في مواقف السيارات الجانبية اللي ما تكون على الطرق الرئيسية يمنع الوقوف فيها بعد الساعة 12 بالليل إلي الساعة 6 الصباح.

- قبل ما توقف سيارتك في إي مكان إقراء اللوحات وتأكد انه ممكن توقف سيارتك و الأوقات إلي ممكن توقف فيها.

- في وسط المدينة من الصعب جداً انك تحصل موقف للسيارة و إذا حصلت موقف فهو في العادة غالي.

- لازم تعرف إن الدوران للخلف بالسيارة ممنوع منع بات وإذا ديورت ممكن تأخذ مخالفة ، إذا احتجت تديور ادخل احد الحارات وديور و ارجع للخط إلي أنت تبية.

- إذا و وصلت إلي تقاطع رئيسي أو فرعي ولا فيه إشارة فعرف إن أول واحد يوصل للتقاطع هو أول واحد يعدي التقاطع.

- إذا كنت تمشي في خط مكون من أكثر من مسار وفجأة واحد من المسارات كان مسدود وحبيت تغير مسارك بعد ما توقف فعرف ان السيارات تبي توقف لك عشان تعدي ونت لازم تسوي زيهم.

- أقصي سرعة للسيارة في الشوارع اللي ما فيها لوحات تحدد السرعة هو 50 كم في الساعة ، و إذا تعديت السرعة هذي بتأخذ مخالفة وقيمة المخالفة تعتمد على سرعتك عندما يصيدونك.

- أقصي سرعة للسيارة في المناطق إلي تكون حول المدارس هي 30 كم في الساعة أوقات الدراسة الرسمية.


إما بالنسبة للفطور فنتم ممكن تفطرون في الفندق.
أو روحو لمطعم الفطور المفضل بالنسبة لي و هو مطعم اي هوب ( I HOP ).
قائمة الفطور عندهم طويلة بس أفضل ما عندهم هو البان كيك بجميع أنواعه بالإضافة إلي تشكيلة واسعة من بيض الاومليت.




اتبعوا الخط الأزرق من الفندق و بيوديكم مباشرة إلي المطعم


بعد ما تخلصون من الفطور جهزوا أموركم و خذو معكم الكميرة حقتكم و توجهو إلي حديقة بحيرة الغزال ، دير ليك ( Deer Lake )




اتبعوا الخط الأزرق من الفندق.


الحديقة لها مدخلين الأول كما هو موضح في الخريطة يؤدي إلي المدخل الرئيسي للحديقة ، عند المدخل الرئيسي هذا بتحصلون مبني فيه صور و معلومات كاملة عن الحديقة.
ممكن تتجولون في المنطقة المحيطة بالمبني أو تتجهون إلي البحيرة عبر الممرات التي تمر بين اشجارالحديقة.



هذي صوره للمدخل الرئيسي للحديقة.




هذي صورة المبني الموجود في الحديقة.





هذا الممر المؤدي للبحيرة.


او ممكن تركبون سيارتكم و تروحون مباشرة الي البحيرة.




اتبعوا الخط الأزرق للبحيرة.


المدخل المؤدي للبحيرة يمر عبر حي سكني ، عشان كذا لا تستغربون رؤية البيوت قطع الشارع من البحيرة.





هذي صور من البحيرة.


في الحديقة بتستمتعون بمشاهدة أشجار من كل شكل ولون بالإضافة إلي الحيوانات الصغيرة ، و الطيور مثل البط و الإوز في البحيرة.

عند البحيرة نفسها ممكن تستأجرون لكم قارب صغير و تجدفون عليه في إنحاء البحيرة.
طبعاً ممكن تصيدون سمك اذا حبيتو بس لازم يكون عندكم تصريح لصيد السمك من بلدية فانكوفر.
و ممكن إنكم تجيبون معكم فحم و بعض اللحوم و تشوون عند طرف البحيرة.

بعد ما تخلصون من التجول في المنتزه ارجعوا لم سيارتكم و توجهو إلي حديقة بحيرة برنبي ( Burnaby Leek ).





اتبعوا الخط الأزرق و بيوديكم من منتزه الدير ليك إلي منتزه نهر برنبي.






هذي صور من منتزه نهر برنبي.

المنتزه اكبر بكثير من منتزه الدير ليك ، البحيرة فيها على شكل نهر طويل ، ممكن تتمشون بين الأشجار و على ضفاف البحيرة عبر الممرات المخصصة للمشي ، مسافة الممشى عبر الممرات و حول البحيرة في حدود 4 كم ، في المنتزه ممكن تستأجرون قارب و تجدفون علية داخل البحيرة أو ممكن تستأجرون لكم خيول و تتمشون عليها في المنتزه ، و ممكن طبعاً تشوون في المنتزه.

في بعض أيام نهاية الأسبوع يكون فيه سباقات تجديف قوارب بين فرق مختلفة في مدينة فانكوفر ، المنتزه بتلقون فيه المقر الرئيسي لنادي التجديف في مدينة برنبي.


بعد ما تتمشون في المنتزهين و تتمتعون بطبيعتها الخلابة أكيد بتكونون جعتو من كثر المشي ، تعالوا معي ألان خلوني أعشيكم على حسابكم في واحد من أفضل المطاعم الايطالية في مدينة فانكوفر ، المطعم أسمة انتونز ( Anton’s )، و يقع على شارع هيستنق الشرقي مقابل المرفأ البحري لمدينة فانكوفر.






اتبعوا الخط الأزرق من منتزه بحيرة برنبي للمطعم.


المطعم بيجيكم على اليسار أول ما تاصلون عند أخر ملف يسار ، طبعاً لأنه ممنوع تديورون في وسط الخط دور لكم على حارة على اليمين أو اليسار و ديورو معها و ارجعوا للخط اللي علية المطعم ، الشارع اللي علية المطعم ممنوع الوقوف فيه أيام الأسبوع من الاثنين إلي الجمعة ما بين الساعة 1500 الي 1800 ، فا إذا رحتو للمطعم في الأوقات المذكورة وقفو سيارتكم في الحارة اللي خلف المطعم و ادخلوا مع باب المطعم الخلفي.

المطعم فيه قائمة طويلة من كل ما لذ و طاب من المأكولات الايطالية.

و إذا بتأخذون شوري في الأكل، فخذو التالي:

أول ما تجلسون في المطعم بيجيبون لكم خبز ايطالي حار و طازج مع ألزبده ، و هذا يكون بالمجان.

خذو لكم سلطة سيزر أو سلطة انتونز (سعر السلطة الوحدة 7 دولار).

و إذا تبون شوربة اطلبوا شوربة المينستروني ( Minestrone )، و هي عبارة عن شوربة خضار خفيفة ( سعر الشوربة 5 دولار)


إما بالنسبة للطبق الرئيسي فيعتمد على نوع الصلصة اللي تحبونها.

إذا تحبون الصلصة الحمرا بقطع لحم البقر المفروم ، اطلبوا لنقويني بولانيز ( Linguine Bolognese ).
( سعر الطبق 9 دولار).

إما إذا تحبون صلصة الأكلات البحرية فطلبو الفوتاتشينو فروتي دي ماري ( Fettuccine Frutti di Mare )
وهي خليط من ثمار البحر مع الفطر.
( سعر الطبق 10 دولار)

و إذا تحبون الصلصة البيضا فطلبو الفوتاتشينو الفريدو ( Fettuccine Alfredo ).
لكن اطلبوا منهم يبدلون لكم الهام (لحم الخنزير) بالدجاج أو لحم البقر أو حتي بربيان اذا بغيتو.
الطبق مكون من صلصة جبنه البرميزان البيضاء مع اللحم اللي تختارونه.
( سعر الطبق 9 دولار)

احرصوا إذا رحتو للمطعم تروحون له قبل الساعة 1800 لانه بعد كذا بيكون مليان و بتضطرون تمسكون سرا الين تفضا طاولة ، مع العلم إن المطعم ما يستقبل الحجز المسبق.

إذا خلصتو من المطعم ارجعوا للفندق و عاد إما نامو او روحو للسينما أو مرو السوق و تسوقو.



الخط الأزرق هو الطريق من المطعم للفندق ، مع العلم بأنكم تتجهون جنوب ، و إذا ما عرفتو وين الجنوب ، فالجبل الكبير هو في شمال فانكوفر ، يعني خلو الجبل خلفكم و انتم تمشون.



( يتبــــــــع )
[/color][/align][/SIZE][/FONT]







توقيع ابو ياسر
 
آخر تعديل ابو ياسر يوم 03-03-2006 في 12:45 PM.
  رد مع اقتباس
قديم 22-12-2005, 12:13 PM   رقم المشاركة : 2
ثار التميميه
V.I.P مؤسس
 الصورة الرمزية ثار التميميه





معلومات إضافية
  النقاط : 20
  الحالة :ثار التميميه غير متواجد حالياً

 

افتراضي


وننتظر البقيه

والله لايخلي من مواضيعك اللي توسع الصدر







توقيع ثار التميميه
 
  رد مع اقتباس
قديم 27-12-2005, 07:27 PM   رقم المشاركة : 3
ابو ياسر




معلومات إضافية
  النقاط :
  الحالة :

 

افتراضي


ثار التميميه

البقية في الطريق

و اشكرك على مشاركتك و متابعتك للموضوع.







توقيع ابو ياسر
 
  رد مع اقتباس
قديم 27-12-2005, 07:28 PM   رقم المشاركة : 4
ابو ياسر




معلومات إضافية
  النقاط :
  الحالة :

 

افتراضي





اليوم الرابع من الوصول الي فانكوفير:


الفطور اليوم هو من اختياركم ، يعني ممكن ترجعون الي مطعم اي هوب او تفطرون في الفندق او ما تفطرون بالمره.

المهم بعد ما تقررون وش بتسوون في الفطور جهزو حالكم و خذو معكم كميرتكم و لاتنسون تلبيون ملابس مريحة و جزم مريحة للمشي.

اباخذكم اليوم الي اجمل و اروع حديقة ( منتزة ) في مدينة فانكوفير ، اباخذكم الي حديقة الملكة الزبيث ( Queen Elizabeth Park ).




اتبعو الخط الازرق من الفندق الي المنتزة.


و لان الطريق من الفندق الي المنتزة طويل ، هذا وصف تفصيلي للطريق:

-) لين طلعتو من مواقف الفندق الموجوده تحته لفو يمين على شارع كنقز بوروه ( Kingsborough St )

-) بعد ما تلفون يمين على الشارع السابق و بعد حوالي 100 متر بيجيكم شارع ولنقدون ( Willingdon Ave )
لفو يسار مع الشارع ، اول ما تلفون مع الشارع بيجيكم اشارة تحت الجسر الخاص بالقطار الكهربائي ، بعد ما تتعدون الاشارة المرورية بحوالي 3 كيلومتر بيجيكم اشاره ثانية ، لفو معها يمين على شارع امبيريال ( Imperial St ) ( بتلاحضون عند التقاطع على يمينكم نهائة حديقة السنترال)

-) اثنا مشيكم على شارع امبيريال بتلاحضون حديقة السنترال ، بعد كذا بتجيكم اشارة مرورية ، تعدو الاشارة و خلوكم ماشين في طريقكم نفسة ، شارع الامبيريال اللي انتم علية بيتغير اسمه الي شارع 49 شرق ( E 49 St ).
و انتم على الشارع بتلاحضون انه ينحني بشكل بسيط نحو اليمين ، استمرو في المشي علية.

-) استمرو في مشيكم على الشارع نفسة الين تجيكم اشارة مرورية على تقاطع شارع 49 شرق مع شارع مين
( Main St ). قبل ما توصولون للتقاطع هذا بتكونون تجاوزتو حوالي 5 اشارات مرورية من اخر اشارة ذكرتها لكم ( طبعاً هذا ما يشمل الاشارات المرورية الخاصة بالمشاة.
عند اشارة شارع مين لفو يمين.

-) امشو على شارع مين الين تجيكم اشارة مرورية على تقاطع شارع 41 شرق ، تعدو الاشارة هذي الين تجيكم اشارة شارع 33 شرق ، عند الاشارة هذي لفو يسار ، و بكذا تكونون وصلتو لمنتزة الملكة الزبيث.




هذي خريطة المنتزة.


اذا دخلتو المنتزة امشو الين تجيكم مواقف السيارات ، في داخل المنتزة بتطير عقولكم من جمالة الخلاب ، فية حدايق زهور منتم شايفين زيها في عمركم كله ، و بحيرة ماء مليانة طيور من كل الاشكال و الانواع.
في قلب المنتزة جبل عالي مليان اشجار من كل شكل ، اذا حبيتو امشو مع الممرات الخاصة بالمشاة و اصعدو الجبل الي قمته ، الجبل هو اعلى نقطه في الجزء الغربي و الشرقي لمدينة فانكوفير ، اذا صعدتو الي قمة الجبل بتقدرون تشوفون اغلب اجزاء فانكوفير.













هذي بعض الصور للمنتزة.



المنتزة فيه كل انواع الاشجار و النبتات و الزهور اللي تنمو في جميع ارجاء كندا.

لا تنسون تصورون كثر ما تقدرون لاني متاكد انكم منتم ناسين اي شي تشوفونه.

ايضاً في داخل المنتزه يوجد مبني كبير على شكل قبة زجاجية ، روحو للقبة و ادفعو دولار واحد للشخص و تمشو بين الاشجار و الطيور ، القبة هذب في داخلها اشجار و نباتات و زهور ما تنمو الا في المناطق الاستوائة ، عشان كذا بتلاحضون الرطوبة و الحراره العالية شوي داخل المبني هذا.

عند باب المبني الزجاجي و حوالية بتلقون ناس يبيعون التحف المنوعة و بتلقون ناس قاعدين اذا حبيتو ممكن يرسمون لكم اشكالكم بالاقلام الرصاصية في خلال 10 دقايق.

التمشية داخل المنتزة بتاخذ منكم حدود 4 ساعات ، بعد كذا ممكن تروحون للمطعم الموجود في المنتزه و تستريحون و اذا كنتم جوعانين ممكن تتغدون فية.
اذا كان الجو زين ولا فيه امطار احرصو انكم في المطعم تجلسون في البلكونة اللي تطل على المنتزة ، بتدخلون في جو رومنسي ما فية زيه و بتدعون للي.

بعد كل التمشية هذي اكيد بتكونون تعبتو ، ممكن ترجعون للفندق و ترتاحون.

اما اذا فيكم حيل تتمشون زود ممكن تروحون لم سوق اوكريج ( Oakridge Centre ).




اتبعو الخط الازرق من المنتزة للسوق ، المسافة ما تتعدا كم دقيقة.



السوق يتكون من دورين و فيه حدود 150 محل ، السوق صغير مقارنه بالمترو تاون ، لكن فيه شي ماهو في سوق الميترو تاون ، فيه محلات مجهورات و تحف من البلور تاخذ العقل ، انا ما عمري شفت على كثر ما ادور اسواق المجوهرات شي زي الي شفته في السوق هذا. يا ناس عندهم مجوهرات خيال ولا في الاحلام ، ولا تحف البلور و الزجاج يافيها تفنن ماهو في الدنيا هذي.

اهم شي و انتم في السوق لا تنسون تشترون الفشار اللي بمذاقات مختلفة ، و ركزو على الفشار الحار.





هذي صوره للسوق من الجو.




و هذي صوره ثانية للسوق من الجو ، و لاحضو منتزة الملكة الزبيث في الزاوية اليمين فوق.


( يتبــــــــع )







توقيع ابو ياسر
 
آخر تعديل ابو ياسر يوم 03-01-2006 في 01:28 PM.
  رد مع اقتباس
قديم 01-01-2006, 09:22 AM   رقم المشاركة : 5
ذيب السنافي




معلومات إضافية
  النقاط :
  الحالة :

 

افتراضي


أستاذي // أسبرانزا

عندي كذا كم سؤال يابعدحيي:
1-الي ماعنده لغة أنجليزيه ألا كيف الحال وشلونك وأبي مويه,,, تمشيه هناك ولا لا؟؟
2-كم تكلف الرحلة لمدة مثلاً خلنا نقول شهر نصه في لندن مثلاً ونصه في فانكوفر؟؟
3-هل عندهم أمان يعني تطلع بالليل بالنهار مافي مشاكل ولا مثل الأمريكان مشاكل؟؟؟

وشكراً لك على الوصف الدقيق ماشاء الله عليك الله لايضرك ذاكرة قوية,,







توقيع ذيب السنافي
 
  رد مع اقتباس
قديم 01-01-2006, 09:29 AM   رقم المشاركة : 6
ذيب السنافي




معلومات إضافية
  النقاط :
  الحالة :

 

افتراضي


على فكرة أستفساري السابق بناءً على إذا كنت بتقضي شهرعسل ياسنايدي يعني بتصير الأمور متبحبحه نوعاً ما ,.,

وشكراً لك







توقيع ذيب السنافي
 
  رد مع اقتباس
قديم 03-01-2006, 03:30 AM   رقم المشاركة : 7
ثار التميميه
V.I.P مؤسس
 الصورة الرمزية ثار التميميه





معلومات إضافية
  النقاط : 20
  الحالة :ثار التميميه غير متواجد حالياً

 

افتراضي


ماشاء الله عليك

مخطط للرحله مضبوط

وش رايك تسافر عني







توقيع ثار التميميه
 
  رد مع اقتباس
قديم 03-01-2006, 09:47 AM   رقم المشاركة : 8
الــذاهبه
شاعره
 الصورة الرمزية الــذاهبه





معلومات إضافية
  النقاط : 10
  الحالة :الــذاهبه غير متواجد حالياً

 

افتراضي


ماشاء الله

أسبرانزا

لاحرمنا الله مواضيعك الطيبه


لك ودي وتقديري







توقيع الــذاهبه
 






  رد مع اقتباس
قديم 03-01-2006, 01:36 PM   رقم المشاركة : 9
ابو ياسر




معلومات إضافية
  النقاط :
  الحالة :

 

افتراضي


ذيب السنافي

هلا والله بالذيب

اقتباس:
1-الي ماعنده لغة أنجليزيه ألا كيف الحال وشلونك وأبي مويه,,, تمشيه هناك ولا لا؟؟


انت تعتقد انك ما تعرف انجليزي زين ، لكن صدقني اول ما تنزنق بتلاحض ان الانجليزية طلعت و صرت بلبل ، و هذا غير ان المدينة فيها عرب كثير ، يعني انشاءالله امورك بتيسر.



اقتباس:
2-كم تكلف الرحلة لمدة مثلاً خلنا نقول شهر نصه في لندن مثلاً ونصه في فانكوفر؟؟


بالنسبة لفانكوفر اذا كنت بتروح شهر عسل و الامور الماية زينة فنشاءالله مبلغ 30000 ريال بتكفيح بالراحة لمدة 3 اسابيع.



اقتباس:
3-هل عندهم أمان يعني تطلع بالليل بالنهار مافي مشاكل ولا مثل الأمريكان مشاكل؟؟؟


المدينة امنة بشكل كبير و انشاءالله ما عندك مشاكل بالليل.


و اذا نويت على السفرة بساعدك بكل اللي اقدرعليه من معلومات.

لك الحية






توقيع ابو ياسر
 
  رد مع اقتباس
قديم 03-01-2006, 01:38 PM   رقم المشاركة : 10
ابو ياسر




معلومات إضافية
  النقاط :
  الحالة :

 

افتراضي


ثار التميميه


ما يحتاج اسافر عنك لان المدينة انا مقطعها تقطيع ولا تركت مكان فيها الا ورحت له.



الــذاهبه

حياكى ربي


لكم الشكر و التحية







توقيع ابو ياسر
 
  رد مع اقتباس
إضافة رد

مواقع النشر (المفضلة)


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 02:01 AM.


Powered by vBulletin® Version 3.8.7
Copyright ©2000 - 2024, Jelsoft Enterprises Ltd.
جميع الحقوق محفوظة لمنتديات الفطاحلة