فلجه بنت مطلب .. الشمريه

[الطائر المهاجر]

فلجه بنت مطلب الفهيديه الشمريه وتلقب ام شيحان شاعره سنجاريه من شمر طاعنه في السن تسكن في مدينة جبه امضت فترة الطفوله والشباب في الباديه عايشت الصحرا وعاصرت حياة الحل والترحال متنقله بين ارجا المنطقه الشماليه ليصطبغ شعرها بألوان الحياة البدويه وهو في مجمله رصد دقيق وتسجيل واع لبعض ملامح التغير في القيم والمفاهيم الاجتماعيه التي عايشتها الشاعره وبالاضافه الى المواضيع الاجتماعيه يتناول شعرها علاقتها مع ابنيها(شيحان و مزلوه) ومع بلدة جبه واهالي جبه ويتميز اسلوبها الشعري بخفة الاوزان وسلالة العبارة ودقة التصوير ولا يخلو من الاشارات اللاذعه واللمحات الفنيه البارعه
وجدت لها تسجيل بصوتها لبعض ابياتها وقمت باضافتها إلى دواووين الفطاحله الصوتيه
تحت عنوان كبار الشعراء ، فهي بحق شاعره لا يشق لها غبار لا تتكلم إلا شعراً .

مقتطفات من اشعارها :


تقول في شخص مسن لايجيد القياده حينما اصطدم باحد الجسور واسعفه شخص يدعى راشد:
جابه لنا راشدٍ عبري= مطراش ينصد عن ريحه
وقت الضحى يدعس الكبري= خربت وضاعت مفاتيحه
يسوق وسواقته جبري=عود يتحدى على الطيحه
يسوق وهو مهو مختبري=صطوغه شف به تقل كيحه

وتقول محرضه شباب الباديه على عدم الانشغال بالسيارات والاسفار وعدم التخلي عن واجباتهم الاجتماعيه والعائليه:
ياهيه ياعيال يالطرقان=من هس كثرة عذاريبه
من لايفسر عن الذرعان=ماتدري الناس عن طيبه
الجيب مايعشي الجيعان= يبي عشا الجيب من جيبه

ولها تنصح ابنها:

ترى العفن مالقو له طب=لو دورت كل الاقطاري
ترى الولد يابغى ينصب= يتعب على شبة الناري
حازب على شبتك لاتشب=لاياخذونه هل الكاري
ارضيك ببهارها والحب= لو كل حبه بديناري
تلقاه حين الضحى منكب=المرجله مالها طاري
الصبح يطني وهو مادب=ولاهو بما يلزمه داري
مايفرق المدح هو والسب=يركض بدرب الردى جهاري
العفن ياطاش مابه طب= هويشة انجس من الفاري

ولها قصيده تمدح بها الشيخ/طلال بن غضبان بن رمال:

راكب اللي ماعسفوها بالنجيره=مانهج حدار ولا سايق رواوي
عليه اللي مارسنها بالمريره=شارب التنباك مابسوقه يلاوي
يوم ركبه ماتونت من مطيره=مع طواريق الهوى ماهو مراوي
نفضّ الفرشات وبهر بالكبيره= والبريق مخدره ريف المقاوي
ليا ثنا الفنجال علّم بالسريره=خبّره يجيت في كل الدعاوي
انت ياطير السعد نفسك صغيره= حشت كل الفود يالصقر النداوي
انت زيزوم النشاما وانت اميره=انت شيخ (ن)يابعد خطو السواوي
انت شيخ من شيوخٍ من عميره= كابرٍ عن كابرٍ كله مهاوي
بعد لونك عن لها ناسٍ كثيره= مثل مفلى الطرش عن مفلى الشواوي

وتقول في قصيده لها تقارن بين الماضي والحاضر:

شيءٍ بقلبي مهو مقلول=كبر ام سنمان مطبوقه
واقلبي اللي مني منتول=تنتيلة الطير بسبوقه
من باع شياهه وباع الشول=مثل الجرو صار بربوقه
تراه تدندن عليه سطول= تقضي عتاريه وشدوقه
ياحلو قولة نبي نحول= تقليطة الزمل وعلوقه
ياما حلى شدة الذلول=يازين زول الولد فوقه

ولها في نفس المعنى:

كلٍ يسوقه مير وين الستادي= لي قلت ماتعرف ينطط عيونه
اول بداة ولا على الله بادي= البل ياهل البل لايضيعونه
خلك مع البدوان في كل وادي= دربه عزيز وكل قفرن يجونه
واحلو ياجن مقرشات التوادي= واحلو ياوردت تراعج سنونه
وكربت خطو الصيعري بالشدادي= ماقالو البترون يقضي يخونه
ترود من (الخنفه)لحد(العرادي)= وترد الحفر ياعل تكثر مزونه
اللي هله ماهم بكل البوادي= ياجتهم العيّال مايعاشرونه

وتقول في ابنها شيحان الذي لاتتيح ضروف الحياة والكفاح في سبيل لقمة العيش ان يبقى بجانبها طويلا:

عز الله اني تحريته= ابطيت ياطيب الفالي
ياما من الدمع هليته= مثل المطر سال ماسالي
بي عبرتن مير كنيته = صارت على الكبد سلالي
قشر الضنا ياتباطيته = الغيض مايعزي الغالي
ياما من العوج مضيته =مضى على عوج وطوالي

وقولها:

اسهر يما كوكب الرقيب = يما سهيلٍ تعداني
شيّبت وهذا محل الشيب = اللي ابلشن بعد شيحان
قلبي صفق مثل باب الجيب=هكاللي راعيه زعلاني

وقالت بعدما ودعها على جيب له اشهب اللون:

سهجت يم الطعس مالي بحاجه = وعزي لمن مثلي تجذت بالارقاب
عزي لمن مثلي ونيسه سراجه = ياما قمر خمسة عشر ليلةٍ غاب
شيحان زوّع حال دونه زراجه = دونه رهاريهٍ تبنّت بلا حساب
فوق اشهبٍ ماتفرقه من عجاجه= يشدي طخاةٍ حادره ريح ذلعاب

وحينما وصلها خطاب مكتوب منه قالت:

خطك وصل يانور عيني فهمناه =قرطاس والقرطاس مابه رغابه
قرطاس والقرطاس لانا ولااياه = اصبح كما قاعٍ تزارق سرابه
يوم اقضب القرطاس ثم اتحلاه = القلب هيّض عبرتن جاب مابه
تفتحت شينان راسي من اقصاه = وهاضت علي الجن جت له ضبابه
ياعين لاتبكين من لابغى بكاه = القلب ماهو داريٍ وش جرى به
البارحه يالقرم والله والله = ياعبرتن بالصدر ماحدن درابه
ياعبرتن بالصدر لولا اني اكماهلا = ماضبتن جبه ولا من ربا به

مع بداية ظهور السيارت حينما كان الاتصال بين الكويت وجبه شبه معدوم حدث ان اتفقت مع أناس سيغادرون الى الكويت ان ترسل معهم هديه عباره عن تنكة تمر الى ابنها شيحان الذي كان انذاك يقيم في الكويت وحينما ذهبت الى المكان حسب الموعد وجدت انهم غادروا المكان فجلست الى جانب المكان تندب حظها وتبكي اثنا ذلك مر بها شخص يدعى سعود الصعيدي على سيارته في طريقه من جبه الى حائل ولمل رآها تبكي سألها الخبر فلما اخبرته بحالها تحركت في نفسه النخوه والأريحيه وقرر ان يذهب الى الكويت لا لشي الا ليوصل التمر الى شيحان فقالت فيه ام شيحان:

راكب اللي لاشرود ولا عزوم = عليه اللي لاركبها ماينام
خشمها مابه نفس كود الرقوم = زاهياتن مثل بالبنت الوشام
حلو زوله مع رهاريه الحزوم = مخها زيت ولا خلق له عظام
الصعيدي جامعن كل السلوم = خف نفس وطيب قلب واحترام
الصعيدي منوة اللي له لزوم = منوة المقصر ومنوة من يضام
ابو صالح ماينبه بمعلوم = ياخذ المفتاح ويركب به شمام
يجعلك تلحق هواها كل يوم = ويجعلك عمرك جديدن كل عام
من رجال مع مواجيبه تقوم = ولا يطول القصر ياساسه هدام
ابشر ان المرجله قود العزوم = للي يبيه مثل لمبات الظلام
الولد ماينومسه زين الهدوم = مايتنومس كود بفعلٍ ياسلام

ولها العديد من القصائد =لتي تمدح بها جبه واهالي جبه منها قولها:

عسى الحيا يم اهل جبه = اللي على الكود صباره
ديرة هل الكيف والشبه= من جيت يعجبك مسياره
سلمه على السلم يهزب به = ماحطوا الهيل بتجاره
واهني من نوبةٍ طبه = قبل يجي العمر سفاره

ولها قصيده في امير جبه عبد اللع الغالب:

نهجت يم ابو نواف = يما احلرجه لي بتكميله
به الكفى والله الكافي = يامنها قلت الحيله
رجل رجاجيل وسنافي = والشر ماقيل يمشي له

ولها قصيده في مبارك العبيكه:

ابن عبيكه كل ماحل طاريه = انشهد انه من رجالٍ مهاوي
انشهد انه قاضبن سلم اهاليه = وانه على كل المراجل قصاوي
ذولا يعشيهم وذولا يغديه = وهذا منه طالع وهذاك هاوي
وليا حكيت الصدق ماني مداريه = واللي يقول الصدق مابه حكاوي
الصدق مثل الصبح كلن يراعيه =والكذب مانومس خطاة السواوي

ولها قصيدة تعبر بها عن نفسها :

ياربي اني ماغتني عن مراعاك=لنته خبير الحال وانته دبيره
اني على عهدك ووعدك وتقواك=مانوبتن حطيت دونك ذخيره
بعزمي وقلبي لانسيتك ولا نساك=اما لساني به صنوجٍ كثيره

فليجة الشمرية.. المشهورة (بأم شيحان) لها قصائد كثيرة.. ومتنوعة في شتى جوانب الشعر، ويغلب على أشعارها الطرق الهجيني نختار من قصائدها مايلي:

من قصيدةٍ قالتها الشاعرة توضح بها اشتياقها لابنها - شيحان نختار قولها:

الرجل يم مذلق الطعـس ساجـه=سجنا وسوهجنا ولاخاطري طاب
نهجت يم الطعس ماني بحاجـه=عسى لمن مثلي بدا راس مرقاب
شيحان زوع حال دونه زراجـه=دونه رهاريه تقـرب للاجنـاب
فوق اشهب ياما سمك من عجاج=هراعيه ماحسب للآفات بحسـاب
عزي لمن مثلي ونيسه سراجـه=لما قمر خمس من الليل كد غاب

عزي لمن مثلي ونيسه سراجـه=لما قمر خمس من الليل كد غاب
هذا البيت هو مطلع قصيدة ردعه فهل فليجه استعارته ام انها هي نفسها

ومن قصيدة تتمنى هطول الأمطار لبلدها (جبه) وتوضح مكارم اهلها حيث تقول:-

عسى الحيا ضابطٍ جبـه=اللي على الضيف صباره
ديرة هل الكيف والشبـه=من جيت يعجبك مسياره
سلمه على السلم يهزبـه=ماحطوا المـال بتجـاره
هني مـن نوبـةٍ طبـه=قبل يجى العمر سبـاره

ومن قصيدة اخرى تقول فيها:

طير السعد لاقنص راعيه=الحـر يعجبـك بدلاتـه
والتبع نقصٍ على قانيـه=يحـط خشمـه بمقفاتـه

ومن قصيدة اخرى تقول:-

الولد مانومسه كثر الهدوم=ماينوس كود من فعله تمام

ومن قصيدة أخرى تتمنى بها الحج وزيارة بيت الله العتيق حيث تقول:-

يالله ياخـلاق سبـع السمـاواه=وارضٍ تحمل اللي على ظاهريه
اللي فرض للخلق خمس الصلواه=اللي يغفر الذنب هـو والخطيـه
تامـر لـنـا بالـحـج يالله يالله=ازور بيتـك قبـل زور المنيـه
يارب هذا مطلبي وانـت تقـواه=هذا مـرادي ياجزيـل العطيـه
الخاسر اللي بـاع دينـه بدنيـاه=واخانـت الدنيـا تبـور بخويـه
ياحظ من عبـدٍ يخافـه ويـدراه=يمشي لطوع الله وطاعـة نبيـه

ومن قصيدة أخرى نختار قولها:-

الطيب ودك يصير شمام=واليا مدح زاد معروفه
والعفن لو تمدحه ماقام=لو يسهج العيب مايشوفه

ومن قصائد المداعبة ماجرى بينها وبين أخيها محسن.. حيث عندما شاهدها ذاهبه إلى الشؤون الاجتماعية أنشد أبياتاً يقول فيها:-

يوم انها روحت للشون=تولـمـت للهجينـيـه
تفتح لفمها تقل جالون=تقول هاذي مزوحيـه

فقد اجابته بهذه الابيات:-

عز الله اني نحرت الشون=نحرت فضـل السعوديـه
اللي الا واعـدوا يوفـون=من زارهم جاب خرجيـة
والا انت من طلعتك مفتون=اول شبـابـك وتـالـيـه

[سناعيس]

الله يعطيك العافيه يا أبو عبدالله
على هذا الجهد الرائع
وشكلنا بنسميك جامع الروائع

تحياتي

[عبدالرحمن الصباح]

مشكور يادكتور على الجهد الرائع بارك الله فيك وبيض الله وجهك

[ابومياس]

ابو عبدالله

مو بس جامع الروائع

الا وجامع النوادر

عافاك الله يالذيب

سلمت ودمت على المجهود الكبير

دمت بخير وعافية

[محمد بن عبدالله السلمان]

جهد متميز
بارك الله فيك
عسى ربي يجعلها موسوعه لتوثيق الشعر والشعراء
الله يوفقك لكل خير

[خيال واسع]

شكرى شكرى .. على المجهوود الرائع
بس ملاحضه على عنوان الموضوع وقد تكون معلومه تستفيدون منه جميع القراء
كتبت فلجه بنت مطلب الشمريه
بما أنك كتبت اسم الأب فتقول الشمري لان النسب يعود لمطلب
لكن اذا قلت فلجه وعلى طول تذكر العائله تكون الشمريه لأن النسب يعود لها ولم يذكر والدها فالأسم
وشكرى لك ..

[الطائر المهاجر]

هلا بك اخي الكريم
المقصود توضيح قبيلتها فقط
شكرا
تحياتي

[الطامي]

الطائر
شكرا لك ولجهودك الجباره
لاهنت اخي

[زهرة اللوتس]

الطائر المهاجر
مجهودات تشكر
عليها
تسلم ايدك
تحية طيبة

زهرة

[صعبة المنال]

يعطيك العااافية

لا بد من عودة للقمم
صعوووووووب