بعد مافقدت الأمل في الحياة [قصة حصلت لي ]

[وجدان القلوب]

أبكتب قصتي وأحكي مآسي كلها مره
على صدر الورق بكتب وجع آخر معاناتي

قصتي اللي بحكيها لكم كانت من أصعب أيام حياتي ..(قصتي هذي نهايتها تعتبر لي كعوده للحياة من جديد) "إن الله على كل شي قدير"
البداية..القصه هذي حصلتلي وأنا في 2/ث (قبل سنتين)..
لمن كنت في امتحانات الصف 3/م أمي تم تعيينها كمعلمه في مدرسة تبعد عنا مسافة 45 كلم تقريبا..وأنا مدرستي اللي كنت أدرس فيها (الأبناء) كانت قريبه من البيت (يعني تقريبا 5 دقايق) المهم يوم جاء الفصل الثاني قلت لأمي أبغى أدرس في المدرسه اللي تدرسين فيها ,,يعني كنت أتمنى أجرب مدارس القرى وافقت أمي وصرت أروح أدرس معها..وتخرجت من المتوسطه.. (وعلى بالي بس أخذ ذيك السنه مع أمي وأرجع السنه الثانيه اللي هي 1/ث بس حبيت البنات ,,وعلى الشي ذا طلبوني أدرس معهم كمان الثانوي .......قلت خلاص)بس الثانويه اللي بدرسها هناك مو في مدرسة أمي لإن أمي في مدرسة المتوسطه,,يعني لمن أكمل معهم الثانوي بتكون في مدرسه لكن قريبه من مدرسة أمي..
درست الثانوي وكانت أحسن أيام حياتي وناسه وسعة صدر واجتهاد طبعا في نفس الوقت.. معلومه المدرسه الثانويه هذي فيها أجانب بكثره يعني(مصاريه وسودانيين)
المهم جاء 2/ث وطبعا دخلت علمي وصار فيه اجتهاد بقوه بعد من البنات ككل..
وأنا كالعاده مجتهده في دروسي بس هالمره الفرق إني صرت منظمه وقتي بالمره بحيث إني حطيت لكل شي في حياتي حقه,,ومن هذا التنظيم صرت انتهي من مذاكرة الأمتحان في البيت بدري واراجع في الصباح وفي المدرسه ماأخذ معي ولا كتاب ولادفتر ولاشي بس المحفظه..(طبعا الكلام هذا في امتحانات الترم الأول والبنات يستغربون هذي تضحك وتسولف ولامعها أي كتاب ولا كأن عليه امتحان) جو بنات من الأدبي قالو لي وجدان حاولي تاخذين أي كتاب في يدك حتى لو ماتبين تذاكرين بس كذا قدامهم قلت ليه قالو بس كذا أفضل لك..ماأعطيت هذا الكلا م اهتمام المهم انتهينا الأمتحان وأخذنا شهادات الترم الأول والحمد لله كانت درجاتي كامله ماعدا الكيمياء نقصت نصف درجه... وكانو معلقين النسب والمجموع يعني أي وحده تشوف نسبة ومجموع الثانية....مشت الأيام على خيرودخلنا الترم الثاني وطبعا نظرات الأجانب اللي معي ماكنت أرتاحلها على إنا كنا نسولف مع بعض ونضحك بس يعني مايبون أحد يغلبهم..........(الدعوه كلها إني اجتهدت ولا مو ذكاء مني زياده عنهم وربي الموفق) والبنات يقولون لي: تدرين وجدان بنات ثالث يقولون وجدان اشلون تاخذ الدرجات هذي وهي تسولف وماهي مهتمه وتتملل من الحصص ومانشوفها تقعد مع البنات في الفصل تكتب وتسأل المعلمات مثل اللي معاها في الفصل ........ردو عليهم صديقاتي اللي قالولهم قالو بالعكس وجدان بالمره تهتم وتذاكر وحريصه بس انتو تفكرون إنها مو مهتمه بس قولو ماشاء الله..
وجات الأمتحانات ونفس الحكايه كانت كل مذاكرتي بالبيت والمراجعه كمان.. امتحنت السبت مادتين والأحدمادة والإثنين كيمياء(ذكرت هذي الماده لسبب لإن بعدها صارت السالفه) ويوم الأثنين قعدت أذاكر لإمتحان الثلاثاء(فقه) بس يوم جاء الساعه 6 المغرب تقريبا صرت أحس في جسمي خمول قلت لأمي: أمي أحس إني منا قادره أكمل المذاكره قالت أمي أكيد بداية انفلونزا قلت يمكن ..أعطتني دواء..وقعدت تحاول تحفظني الماده اللين خلصته .ونمت بعدها وقمت الصباح والتعب فيني أعطتني أمي دواء وبعدها رحت المدرسه كنت أقول لصديقتي أميره ماابي أمتحن قالت ليش .سكت...المهم دخلت الأمتحان وحليت ولمن صرت عند أخر سؤال في الورقه الأولى حسيت يدي بدت تثقل نمت على الطاوله وصرت أشهق من البكاء بس بصوت منخفض,,ماأحد انتبه كانت المعلمه اللي تدور علينا جالسه شافتني بس فكرت إني انتهيت من الحل وحطيت رأسي على الطاوله ,,واشوي جات معلمة الفقه تشوف أحد عنده سؤال وشافتني جت عندي وسمعت صوتي وأنا أبكي وجت المعلمه الثانيه كمان ورفعو راسي وشافوني أبكي ويدي متحجره ماهي راضيه تتحرك تجمعو المعلمات والأداريات ومسكو يدي وصارو يقرون المعوذات,,,اللين تحركت اشوي وكانت معلمة الفيزياء تحضني وتقولي ها تكملين الأمتحان قلت لا لا لا بس طلعوني من القاعه شالوني ونزلوني تحت في غرفة الأداره وجابو لي مويه قرو عليها الطالبات في ذاك الوقت وحطوها على يدي والحمدلله تحسنت أكثر.. بس لمن رجعت البيت الساعة 10 طبعا أمي ماتدري ولا أبوي يدري رفضت إن المدرسه تكلمهم وتقولهم ,,لإن أمي باقي في المدرسه ماراح تجي الاالساعه 2 لإنها قاعده تصحح للبنات وأبوي في العمل ماكان في البيت الا الشغاله وأخوي الصغير ..
سألتني الشغاله ايشفيك قلت مافيني شي لأنها شافتني أبكي وجسمي يادوب أحركه المهم جات وحده الله يهديها أم طالبه في المدرسه كلمت أمي على المدرسه وقالت ايش في بنتك قالت أمي ليه اشفيها وخاصه إن أمي كانت قلقانه علي والحرمه ماقصرت أعطتها السالفه]الحمدلله ماصار لأمي شي[ ....كلمت أبوي ورجعو البيت شافوني نايمه ودموعي على خدي من الوجع ...قومتني أمي قالت اشفيك قلت أمي يدي يدي يدي منا قادره أحركها ....قالت أمي لا أكيد ارهاق بس (تبي تهون علي) قامت أكلتني وأبوي قاعد يقرأعلي ..المهم كنت أقول في نفسي لا مافيني شي وأحاول أتشجع وأقوم من الفراش لإني كمان ابي أذاكر امتحان الأربعاء وكان أحياء والمنهج دقيق..
بس للأسف حسيت إني ماراح أقدر أكمل أي امتحان لإن حالتي صارت تتطور أكثر. من يدي لجسمي كله وكأن دولاب بكبره فوقي.,,,أحس جسمي ثقيل ثقيل,,,وقعدت أمي معي في البيت ,والمدرسه دقت على أمي وين وجدان ليه ماجات قالت أمي :ماتقدر تمتحن ..قالوا لا لازم هذا امتحان نهائي وإن كان عشان يدها خلاص احنا نكتب لها ,,قالت أمي وجدان صارت تعبانه مرره..المهم أبوي حالته مو طبيعيه يوم شافني بالحاله هذي ..بحياتي ماشوفت أبوي ضعيف أويبكي بالدرجه هذي مثل ذيك الأيام..(الله لايحرمني منه ومن حنانه هو وأمي) والله إنه كان يبوس رجولي ويدعيلي اللهم اشفي بنتي وكان كل يوم يقوم الليل ويبكي ويتوسل لربي بشفائي ,,,حتى أكرمكم الله ماصرت أقدر أتحكم بنفسي ..أمي اللي توديني دورة المياه وهي اللي تروشني بالمويه المقريه ..لإني خلاص صرت كل يوم عند الشيخ يقرأعلي ..والمواد الخمسه الباقيه مارحت امتحنها...وصديقاتي الله يعافيهم ماقصرو معي بذلو المستحيل عشاني لو بذكر أفضالهم ماانتهيت..حلو إن الواحد يتوفق بأصدقاء..والنوم صرت أنام بجنب أبوي وأمي وطبعا نومهم متقطع كل اشوي يقومون عشاني المهم كنت ذاك اليوم ابي دورة المياه أكرمكم الله بس ماحبيت أقوم أمي عشان أبيها تكمل نومها ورحت أمسك الجدار بكتفي وأمشي حتى وصلت الحمام وأغمى علي في الحمام وماقمت إلا بعد ساعتين تقريبا وصرخت قامت أمي وشالتني وبعدها تنومت في المستشفى وعلى المغذيه عايشه لإن الأكل ماكان يدخل بطني أبدا..على إني كنت أحس بالجوع واشتهي أكل بس منا قادره أكل ولا لقمه..حتى مره اشتهيت أكله لا ومن مطعم معين مابي إلا منه والمطعم هذا بعيد ... راح أبوي بيجيبه بس قلت لا ..لإني لمن اشتهي ابيه في وقته ولا خلاص ..(طبعا غصبن عني). حتى الصلاة كنت أصليها نايمه ولا جالسه على حسب حالتي وقتها..والشيخ كان يجي يقرأ علي في المستشفى ..ويقولي لوماكنتي تداومين على الأذكار كان جاك أكثر من كذا ..الحمدلله .. ويوم الأحد زارني معلمتين بالمستشفى ويوم شافوني بالحاله هذي قالو لي خلاص لا لا لا لاتجي تمتحني وباسوني على راسي وبكو....بعد ماكانو يقولون لا لازم تجي تمتحن (فكرو إن تعبي هذا كله عشان يدي بس ..مادرو إنه جسمي ككل ) والله يجزاهم خير جابولي جركلين مويه: واحد قروا وغسلو فيه الطالبات والمعلمات والأداريات والثاني جركل فيه فوطه ماسحين فيها الطاولات والأرض (عشان أتروش فيه)..وكانت أمي تروشني منه في المستشفى ..سبحان الله ماتوقعت أحد راح يشوفني بس الإنسان ضعيف..
ومن باب الطرافه]طبعا من جده أبوي[ أبوي قال لي أنا بروشك صحت قلت لا ..قال عادي أنا أبوك وانتي بنتي ..قلت لا..بس في الأخير أمي روشتني.. والحمدلله صرت أتحسن شيئا فشي وخلال الفتره هذي تحلمت في وحده سودانيه معي في الفصل ..وبعدها قال لي الشيخ إذا تحلمتي في أحد قوليلي مين قلت له ايه تحلمت في وحده وعلمته قال خلاص جيبو أي شي منها ..وفعلا أمي طلبت صديقتي أميره طرحة البنت وماقصرت جابتها غسلة أمي الطرحه وروشتني بمويتها ورجعنا الطرحه بدون ماتحس..]صاروا أبوي وأمي يسون أي شي عشان ترجع وجدان مثل ماكانت[ حتى الشغاله والله صارت تشوفني وتبكي(ياعمري)....
وصرت أحس كل مره بتحسن وطلعت من المستشفى بعد اسبوع تقريبا وبـــــــــــعد شهرين صرت طبيعيه مثل أول وأحسن الحمدلله ...وهذي منه من رب العامين ...وبالنسبه للأمتحان أخذت دور ثاني ونجحت الحمدلله..وبعدها رجعني أبوي المدرسه الأولى>الأبناء< عشان أبعد عن المنطقه هذيك..
وبعدها ماتتوقعون ايش الفرحه اللي صارت فيني بعد مايئست من الحياة ..

وأنا قاعده أكتبها لكم ماصرت أشوف من الدموع اللي في عيوني]دموع الفرحه[ إني رجعت سليمه مافيني ولا شي ..
بس إلى الآن لمن أحس يدي أو أي شي يوجعني أخاف وأبكي ...أخاف يرجع المرض...>طبعا وسوسه من اللي جاني<............

لكــــــــــــــــــــــــــــ ـــــــــــــــــــــــن الحمــــــــــــــــــــ لله ـــــــــــــــــــــــــــد.
طولت عليكم.

[ابو زياد]

الحمد لله على سلامتك والعين حق
ولكن خلى ايمانك بالله قوي واصري على تجاوز هذه المحنة
وان تكون دافعآ لك لمزيد من النجاح
والحرص واجب ((استعينوا على قضاء حوائجكم بالكتمان))
والله يخلي لك والديك
اختي قصة مؤثره جدآ
صغتيها بأسلوب يقطع القلب

ياعمري عليك عليك ياوجدان "قل لن يصيبنا الا ماكتب الله لنا"هذا ابتلاء من رب العالمين والانسان ضعيف لكن ربك ماينسى احد الله هو الي ابتلاك وهو الي شفاك.....والله يخلي لك امك وابوك ويطول في اعمارهم ويفرحون فيك الللله ياوجدان ما اعظم رحمة الوالدين ....اشلون بس نقدر نرد ولو جزء بسيط من افضالهم علينا....ياوجدان الحين الناس ما صارو يعطون خير...... مو كل من يتقرب لك يحبك ولا كل من ضحك لك يتمنى لك الخير وصاروا الناس يخافون من بعض ...وهذا ابتلاءواختبار من ربي يختبر فيه قوة ايمانك واكيد انك تعلمت والحمد الله السالفة هذي لها فترة وانشاالله مارح تتكرر لك وهذي الافكار الي تجيك مجرد هواجيس لانك للحين متذكرة معاناتك وسبحان الله ما ضاقت عليك الا وانفرجت والله يبتلي من يحب من عباده.......

على فكرة تراك كسبت ذنب فيني يو م قريت الموضوع ارتعت من جد لاني تذكرت انك غايبة اليوم ففكرت ان فيك شي بس الحمد الله اطمنت عليك..........................

تحيااااااااااااااااااااااااتي, ,,الهنووووووووووووووف

[وجدان القلوب]

المشاركة الأصلية كتبت بواسطة ابو زياد

الحمد لله على سلامتك والعين حق

الله يسلمك ومشكور.

[وجدان القلوب]

المشاركة الأصلية كتبت بواسطة الهنوف

على فكرة تراك كسبت ذنب فيني يو م قريت الموضوع ارتعت من جد لاني تذكرت انك غايبة اليوم ففكرت ان فيك شي بس الحمد الله اطمنت عليك..........................

تحيااااااااااااااااااااااااتي, ,,الهنووووووووووووووف

ياحبي لك تسلمين ياعسل انتي....

وكلامك اللي قلتيه كله درر....مشكوره

[أم ريما]

الحمدلله على السلامه

واعوذ بالله من العين والحسد والله قصه مؤثره

بس اهم شي انك قمتي بالسلامه والحمدلله

تحياااتي لك

[الريم]

مره تأثرت ...

بس الحمدالله الحمدالله الحمدالله على سلامتك حبيبتي

ما تشوفيين شرر ,,

والله هالناس ما يعطوون خيير ابد انتبهي مره ثانيه يا قلبي وخلك احرص وحطي ببالك اي شي ممكن يصير

لا حول و لا قوة الا بالله..

الحمدلله على سلامتك اختي وجدان...

بس و الله العين و الحسد مشكلة...يعني الحين صار الواحد اذا كان متميز بشي لازم يخفيه خوفا من العين >__<

[الطائر المهاجر]

بعضاً من ما ذكرتيه:
"تاخذين أي كتاب في يدك حتى لو ماتبين تذاكرين بس كذا قدامهم قلت ليه قالو بس كذا أفضل لك..ماأعطيت هذا الكلا م اهتمام المهم
صرت أحس في جسمي خمول قلت لأمي: أمي أحس إني منا قادره أكمل المذاكره قالت أمي أكيد بداية انفلونزا قلت يمكن ..أعطتني دواء..وقعدت تحاول تحفظني الماده اللين خلصته .ونمت بعدها وقمت الصباح والتعب فيني أعطتني أمي دواء وبعدها رحت المدرسه كنت أقول لصديقتي أميره ماابي أمتحن قالت ليش .سكت...
قومتني أمي قالت اشفيك قلت أمي يدي يدي يدي منا قادره أحركها
لإن حالتي صارت تتطور أكثر. من يدي لجسمي كله وكأن دولاب بكبره فوقي.,,,أحس جسمي ثقيل ثقيل
حتى أكرمكم الله ماصرت أقدر أتحكم بنفسي ..أمي اللي توديني دورة المياه وهي اللي تروشني بالمويه المقريه ..لإني خلاص صرت كل يوم عند الشيخ يقرأعلي
والنوم صرت أنام بجنب أبوي وأمي وطبعا نومهم متقطع كل اشوي يقومون عشاني المهم كنت ذاك اليوم ابي دورة المياه أكرمكم الله بس ماحبيت أقوم أمي عشان أبيها تكمل نومها ورحت أمسك الجدار بكتفي وأمشي حتى وصلت الحمام وأغمى علي في الحمام وماقمت إلا بعد ساعتين تقريبا وصرخت قامت أمي وشالتني وبعدها تنومت في المستشفى وعلى المغذيه عايشه لإن الأكل ماكان يدخل بطني أبد
والشيخ كان يجي يقرأ علي في المستشفى ..ويقولي لوماكنتي تداومين على الأذكار كان جاك أكثر من كذا ..الحمدلله ..
جابولي جركلين مويه: واحد قروا وغسلو فيه الطالبات والمعلمات والأداريات والثاني جركل فيه فوطه ماسحين فيها الطاولات والأرض (عشان أتروش فيه)..وكانت أمي تروشني منه في المستشفى ..سبحان الله ماتوقعت أحد راح يشوفني بس الإنسان ضعيف
هذي تحلمت في وحده سودانيه معي في الفصل ..وبعدها قال لي الشيخ إذا تحلمتي في أحد قوليلي مين قلت له ايه تحلمت في وحده وعلمته قال خلاص جيبو أي شي منها ..وفعلا أمي طلبت صديقتي أميره طرحة البنت وماقصرت جابتها غسلة أمي الطرحه وروشتني بمويتها ورجعنا الطرحه بدون ماتحس..]"

الحمد لله على السلامة
لكن ابيك تفهمين حاجة وحدة ، ما تعرضتي له ، اجهاد للجهاز العصبي ، صاحبه بعض الإضطرابات الجسمية النفسية المنشأ ، وأي متخصص ، يستطيع أن يعالجك منها في خلال اسبوع إلى اسبوعين فقط . فقد عالجت الكثير
من مثل حالتك حينما كنت في العيادة . وبالتالي شيلي من فكرك أي تفسيرات اخرى ..
تحياتي

سلامتك والله ياوجدان ياضعيفة الله أثرتس عانيتي بسم الله عليتس والله قطعتي قلبي ,,,

والحمد الله جت على كذا ماجت أكثر ,,,,