الذيب هزلات الغنم ما تعشيه

[احمد الجريفاني]

ماهو غريب انك تقولين شايب=ابوك قبلي يوم شيّب حقرتيه
قولي: ماني رجال ناقص وخايب=اما الشََعر مليون مره صبغتيه
من حطلك يا بنت شقر الذوايب=(كوفير)والا شخص متوحمه فيه
رخيص مكياجك مسوي مصايب=اكيد مع شغالتك واستلفتيه
والا برحله واعزموك القرايب=من (شاينا تاون)(برنقت) شريتيه
متخوفه يا بنت دفع الضرايب=مكياج لقطه ربنا يسعدك فيه
تبينه يغطي خدود(ن) خرايب=وجهك يبيله شد يابنت شديه
شايب : ولي في كل ديره حبايب=حظيظ منهو جملة الناس تغليه
من (شمّر )الي متعبين الركايب=الشمري حتى خصيمه يحييه
متعلم وشاعر..بوقت النوايب=آقف بجنب الي نخاني والبيه
ولي قلب(ن) ابيض من عنا الهم ذايب=يمكن لو انه في ضلوعك رميتيه
ترفقي يا بنت ماهي طلايب=لا طالبن يدك وشرواك ما بيه
ولا جيت عانن لك ولا بالغصايب=امرك ابوك وقال غصب اقبلي فيه
ولا صارت جروحي من اجلك عطايب=ولا خفوقي فز لك واتهمتيه
العقل نعمه من عظيم الوهايب=لو هو معك موجود قمتي لبستيه
لا من بغيت القرب اعرف النجايب=الخط عنوانه دليل(ن) لقاريه
ما روح ادور عن رخاص الجلايب=الذيب هزلات الغنم ما تعشيه