الشعر مبدا

[عبدالعزيز ابراهيم المنصور]

بسم الله الرحمن الرحيم

في الحقيقة أن الشعر قبلنا قد طرق وكما قيل عند العوام ( من سبق لبق ) أو(الأول ماترك للتالي شيء ) ولكن لكل إنسان
الحق في كتابة مايختلج في داخله من مشاعر ومايدور في خاطره أوباله من أفكار فكتبت هذه الكلمات المتواضعة أملاً أن تحوز على رضاكم إليكم الكلمات
][ الشعر مبدا ][






نثرت بوحي في حسين التواصيف=وذكرى ليالي الحب وقصة هيامي
واذكر حبيب ٍ يوم كنا مواليف=ابديت له سري وكثر اهتمامي
اكتب غزل واشكي هموم الصواديف=وعن ماجرالي في دروب الغرامي
واشوف ماقلته كلام وسواليف=ولايطرب اللي يقدرون الكلامي
في رايي ان الشعر مبداوتثقيف=وايضا حدود نصونها بالتزامي
واليوم ابكتب ماطرالي على الكيف=شعر ٍامدوزن فيه قول ونظامي
واقول من قدرك صادق بلا زيف=عزه وخله فوق صدرك وسامي
واللي تحس انه يودك بتكليف=اترك سبيله وانسحب باحترامي
الناس واجد خل عنك الملاقيف=واتبع رجال ٍ وافيين وحشامي
ولاشفت في دنياك حلوالتصانيف=لاتحسب ان الوقت فيه انتظامي
لاتغرك الدنيا تراها تناتيف=والكل.. فيها منتهاه انعدامي
اترك دروب ٍتجلب العاروالحيف=واحذر وخل الآخرة لك مرامي
اتبع طريق الحق وبلا تخاريف=فالدين نور قلوبنا فالظلامي
الدين مثل سراج حوله عواصيف=والى طفى عشنا بوسط العتامي
ودرب الحقيقة واضح ٍ دون تعريف=من يمشي بدربه فلاهو بظامي
حافظ على سنة كريم التواصيف=محمد عليه افضل صلاة وسلامي
من يتبع ربه ومن دون تزييف=يبشر بفضل ٍ منه واعلى مقامي
ياحافظ القرآن من اي تحريف=ياربي ياخالق جميع الانامي
جنبني ادروب الشقى والمحاذيف=وخفف حمول ٍ فوق متني جسامي
واجعلني ممن يشكرك دون تطفيف=وابعدني عن فعل الردى والحرامي
هذا كلام العقل قلته بتصنيف=صغته وطرزته بجزل الكلامي
لي مدة ٍ وانا اشوفه كماالطيف= وله مدة ٍٍ بالصدر يرزم رزامي
كنه بجوفي لاذكرته بتوصيف=خلج ٍ ترازم ثم حامت حيامي
واختم لما الفت باحساس تاليف=من بوح فكر ٍ صاينه لايلامي
واقول باني لما مضى بي تحاسيف=ويالله انا طالبك حسن الختامي


إن أخطأت فمن نفسي وإن أصبت فمن الله
وسلامتكم