أبيات كتبتها من ذو زمنٍ غير قريب في مكانٍ ما وهي تعبر عن نفسها أرجو أن تحوز على جزء من إستحسانكم
أنتبه ياسيـدي واسمـع كلامـي=ماأبي لك شكر أو حتـى إشـاده
ودي بس (ا)تكون في التفكير سامي=ودي تسعى (ا)لكل مافيـه استفـاده
خذها من إنسان في نهجه عصامي=له من دروس الزمن خبرة وشهـاده
ماتشيل المنتـدى كثـرة أسامـي=ملونـه أحمـر ولا فيـهـا إراده
تمرنا إذا اشتهـت مـرّ الغمامـي=وباقي أيام الشهر فـوق الوسـاده
لكتبت موضوع كل الكون قامـي=وكل مشرف علّق (ا)بجيـده قـلاده
بعدها يمشي مثل مشـي الحمامـي=يتبختر كنّ راس الذيـب صـاده
ولايشيل المنتدى عضـوٍ حرامـي=يسرق افكار البشر فن و أجـاده
ثمّ ينسجها علـى نحـوٍ نظامـي=كنها من وحي فكـره واجتهـاده
صار متميز علـى كـل الأنامـي=و لاسلم شخصٍ من سهام انتقـاده
عنجهـيٍ نرجسـيٍ إنفصـامـي=لو يجيه الضيف مايكـرم وفـاده
أخرسٍ لا لـه كـلامٍ أو سلامـي=في جـدار الحقـد دوّن إعتمـاده
من حشمته راح يلهـث لاتهامـي=وهْوَ ذم الناس في شرعـه عبـاده
منتدانا آسف اشعلـت اهتمامـي=كنت احسب اني على راس القياده
اشتكيتـك ميـر مابيّـن ملامـي=والخفوق اليوم ينـزف مـن وداده
بين خلاني ولا لـي مـن محامـي=والحصاني صار له كـل السيـاده
طاح توقيعي على الصفحات دامي=ولا فزع لله واحـد مـن عبـاده
والتزمت الصمت ولانـي إنهزامـي=بس ابعْرف من هو ينصف في مداده
احتويت الجرح في داخل عظامـي=والألم لا هـاج ماينفـع ضمـاده
والله لو سلّيت من غمدي حسامي=كان اخليها مثل حـرب الإبـاده
بس انا إنسان و احساسي إمامـي=حتى لو صوتي تسربل من حـداده
منتدانا لـك أكاليـل احترامـي=وكل صبحٍ لي على صـدرك ولاده
وان لفاني الليل شلتك في منامـي=مثل ماضم الطفـل دافـي مهـاده
منتدانا لك وصيـه فـي ختامـي=كون عادل كان تطمـح للريـاده