الحروف العذب وصلت محللها= وأشهــــد أن الكلام الزين شجاني
والقصايد تجمل من يجملها = دام أنا ابغاك يالشاعر وتبغـــاني
عاجل الرد جالك قبل اجلها = ودي القاك يالصاحب وتلقاني
ونفسي اليوم ماودي مجاملها= لأجل قولك احيي كل من جاني
القصيده من اقوالك بكاملها =كالعيار الذهب في وسط ميزاني
شرفتني وأنا مااني مهملها= باجمل ابيات باقراها وتقراني
كل كلمه بعزف العود ادللها =واطرب بها ولو مااني بفناني
لكن ابيات يسلم راس قائلها=من تعنى على شاني وعناني
والتواصل على الساحه نواصلها=والجمايل تجمل كل قحطاني
معرفة خير بابياتك يجللها = ماحسبتك سوى واحد من اخواني
نكثر القول فيها مانقللها = صح لسانك على قولك وللساني