يعيش الفقير وخاطره دائم مكســــــــور=ويطوى الزمان ومات ما حقق أهــــدافه
وصارت رحاة الوجد بين الضلوع تدور=ومن سوء حاله يكشفه كل من شافـــــه
بوسط النهار وناظره ما يشوف النــور=وجور المتاعب والشقاء تتعب أكتافــــه
ولو يشتكي ما قال له واحد معــــــذور=ولو كانت النيران تشعل في أطرافــــــه
ومهما تجاهل ضيق وقته فهو مـجبور=يجامل ويتعايش مع الدهر باوصافـــــه
ومن يسمع العذال عاش العمر مقهور=وتالي زمانه يرفض الشور لو شــافــه
صروف الليالي والمقادير تلعـــــب دور=وحظ الفتى ما هو ب ورث من أسلافـه
تأملت في حال الشقي والذي مســـرور=ولاحظت من يأمن زمانه ومن خافــــه
فكم واحد كانوا هله حالهم معـــــــسور=توسع وجاه الخير من عدة أصنافـــــه
وكم واحد كانوا هله حالهم ميســـــــور=تعسر عليه الرزق والمجتمع عافــــــه
فهذي حياة الناس والوقت يا منصـــور=تلاقي بها شي عظيم وشي تافــــــــــه
فعشها كما هي وانتبه تسمع أهل الزور=وطير المنا ما كل من سابقه طافـــــــه