كل اجاويد
قال الذي زين المعاني قطفها=أمثال مبداهن عن الشك مفرود
امثال عنهن قاصر العرف يفها=من حيث درب العرف طلعات وصعود
لو كل من قال المثايل عسفها=ماصار نقص(ن) بالمعاني ولا زود
والبندق العوجا تجنب هدفها=لا صار منظرها عن القطر مصدود
وغاية جميع الخلق محد(ن) عرفها=رضا جميع الخلق ماهو بموجود
لاشك تدي كل نفس(ن) نصفها=وترى كلام العدل يظهر له اشهود
من رابع العقال نفسه صرفها=عن تيهة(ن) يشقى بها مابها فود
اسمح عن اللي تيهته ماعرفها=يمكن يرد ليا لقى الدرب مسدود
لومي على اللي تيهته قيل شفها=من العيا كنه عن الرشد مطرود
نفسه على شين المماشي حذفها=اصبح ذميم(ن) لوه من نسل محمود
لايفتخر بافعال ناس(ن) وصفها=له الفخر كانه وقف ماقف العود
ماكل اجاويد(ن) تبعها خلفها=لابد مايخلف حمد سيرة احمود
كم واحد(ن) يمة جدوده نسفها=على الشمال ورد مع دربه اردود
درع بأمور(ن) مانشد عن كلفها=وكدّر سماه وصار بالجهل مزيود
نفسه غضب غيره لعب في شرفها=اصبح بخيت(ن) لابس(ن) ثوب مقرود
كم واحد(ن) ربعه يعدل عجفها=من حشمته صاروا مشاكيل وفهود
عنهم مهمات الأفاعي كتفها= محد(ن) يجيهم بطش والحق مريود
لومي على راعي مماش(ن) حرفها=عن سلم ابوه وسلم جده هل الجود
أقول له دنيا بلا مدح عفها=ترى بقايا العمر للقاع والدود
أنتم بثر ناس(ن) تقدم سلفها=مرحانها تقها خلايا من الرود
هاذي مبانيها وهاذي اغرفها=بقى العمار وباني القصر مفقود
وغيره بيوت(ن) للفداوي ارففها=مثل الجبال السمر والوانها سود
محلى حللها عقب سيرة صلفها=في خايع(ن) نبته له ارقاب واعضود
كم فيضة(ن) زين المباني كنفها=يابونها للخيل عن مرتع الذود
قب(ن) مطاليب المقفي نحفها=ياما نضح منها العرق نضحة الجود
لامن كسّاب الزعيمه خطفها=صاح الصياح وجاوبه حس بارود
كل(ن) ركبها مانشد عن كلفها=جنك على الداعي مع الحزم جلحود
كم أبلج(ن) عنه الجبانه كشفها=خلاّ بجيش القوم حاوي ومردود
وكم أبلج(ن) روحه حياها قصفها=اصبح فؤاد أمه من الحزن ملهود
هاذي وصوف اللي تقافت اصففها=يوم الهوى عدل(ن) لركابة القود
واليوم ترحم حالها من ضعفها=ماكنهم شيفوا بمرباع واعدود
مضما البكار اللي تنفّض اشعفها=لو تنحره عينت به ريد وهنود
قلّي علام الوقت هذا صدفها=وأقول لك هذا آخر الوقت مشهود
محد(ن) تصريف الزمان أكتشفها=تغيرت سلم(ن) على الخلق مقدود
دنياك بالغفلات يضرب طخفها=لمحة بصر ماله سنا برق وارعود
غدارة(ن) لو ضحكتك بطرفها=تراك عقب الضحك ببكاك ماعود
ان اقبلت قامت تمشط ازلفها=هنوف عرس(ن) طيبها المسك والعود
وان ادبرت شفت الكدر من حرفها=تمسي تسيد وتصبح الصبح مسيود