بكل الحب والشوق اعود إليكم بعد غياب
متمنياً ان ترقى متوضعتي إلى بعض ذائقتكم
مع التحية لجميع رواد الفطاحلة ’
صباح الخير ياللي ماخذه عقلي صباح الخير= انا ضيعت نفسي اسألك بالله لقيتيني؟
تري من يوم ما قلتي صباح الخير وانا طير = تعشمت السفر ويقنت بالترحال من حيني
أكيد إني معك راحل وشاركتك خطوط السير = أمانة لا لقيتني بحق الله رديني
تري ما عاد لي قلباً قوي يتحمل التأخير = أيا عقلي تردينه أيا كلّي تشلّيني
انا لك غير وانتي يا عيوني في عيوني غير = أذوب بصوتك اللي لا تكلمتين يغريني
تشتت كل تفكير وفكري ضيع التفكير = أفكر وين وارحل وين منك يا عناويني
أنا من يوم ما شفتك وحالي يعجز التصوير= أفتّح تبصرك عيني وغمض تسكني عيني
انا ودي اعبر لك ولكن عاجز التعبير = يوصف لك معاناتي وجريك في مياديني
انا مثل الدخيل اللي تربع في وجوه الخير = لعلك أو عساك اتسددي يالطامعة ديني
وإذا ما تؤمني بالحب والإحساس والتأثير = عليّ الشاهد الله بعد هذا ما تشوفيني