يقولون لي وش ديرتك قلت فوق طويق = بنجد العذيّه نجمةٍ فوق الاقماري
لها في جبين الدهر بصمه من التوثيق = بمجد انكتب في صفحته غصب واجباري
والى من طلب مني اسمها قلت بالتدقيق= تراها الحرّيق درة الكون للساري
فتاريخها المشهود ما احتاج للتحقيق = حروفه ذهب مطبوعه بكل آثاري
سلوم الشهامه والكرم لونها تعتيق = وفي العمق نبع المرجله يسقي الجاري
بها رجال هم ربعي وعضدي بلا تفريق = فكلٍ مثل درعي على هول الاقداري
وانا سيفها البتّار وقت الرخاء والضيق = فهي من عطتني المرجله رمز وشعاري
تبينا نصون العهد ونصدقه تصديق = على حبها بالفعل في عزم واصراري
تبي مجدها السالف بغصن الزمن توريق= تعود لطبيعتها ملاذٍ للاحراري
شياهين مسكنها بعال الجبال شهيق = ولا ترتضي بالقاع او تحت الاشجاري