[منيع]

يا ناشـدن عـن عيلتـي لاي الانسـاب=لا بـاس ابعطيـك الجـواب السليـمـي
ان كان من شان الفخر فاصلي تراب=وان كان لجل العـرف مسلـم تميمـي
بلال من سود البشـر ميـر مـا خـاب=وابـو لهـب باقـصـى جهـنـم يهيـمـي
كم واحدن عايش بالادغال مـا عـاب=وكـم واحـدن بايـر وهـو بالقصيمـي
دنـيـا تفـانـت بـيـن بـايـع وجـــلاب=والمـوت مـن بيـن الخلايـق غريمـي
لا ترهي في دنيـاك واتصيـر كـذاب=تـقــول فـاهــم والحقـيـقـه علـيـمـي
ما يفرقك عن جـرذي البيـد والـداب=اليـا وطيـت الـشـرك مــا تستقيـمـي
ما تدري ان النار فـي سبعـة ابـواب=تلقـا لهـا مــع كــل مـدخـل حميـمـي
فيهـا لهيبـن لـو لـمـس جنـدلـن ذاب=وزبانيـه فـي طــوع ربــن عظيـمـي
لهـا زفيـرن لــو لـقـاه الـولـد شــاب=ولهـا شهيقـن مـع سعيـر وضريـمـي
باكـر ولـي العـرش يامـر بالاسبـاب=يعيـد يـوم البـعـث عظـمـن رميـمـي
فـي ماقفـن كايـد بـه الكـل مـا غـاب=فـيـه آدم وحـــوا ومـــارد رجـيـمـي
فيه الخلايق تذعن لعرض واحسـاب=يوضـع بـه الميـزان مـا بـه زعيمـي
يومن شديـدن كلـه صـراخ وارهـاب=يالله عـفـوك فــي زمـانـن يضيـمـي
راجينـك الفـردوس وانهـار واقبـاب=وامجـاور الـرسـل الـكـرام بنعيـمـي
وارضاك يا ربـي رجـا نادمـن تـاب=ما غيـرك اللـي ياقـا عنـا الجحيمـي
شفي كرم عفوك عن حمول الاتعـاب=بيـن الرجـا والخـوف بالـي مقيـمـي
مرات اقول اني علـى الخيـر وثـاب=واحيان اخـاف عقوبتـك يـا رحيمـي
يـا ربـنـا المعـبـود فـكـاك الانـشـاب=يـا خالـق الدنـيـا ومـحـي الهشيـمـي

للشاعر/ يوسف الخليفه
ابوعبدالله