[فارس القوافي]

جيتكم بشكي وحــــالي فيه حال = قصّـــتـي قِـــــصّه وطرفي ما يبات
قبل مدّه رحت في سوق الشـــــمال = ودّي اشري لي شماغ امواصفات
يوم جيت السوق شفت احلى غزال = واقفٍ بين الجـــموع الــــــــناطرات
اشّر بـــطرفه وقال اقرب تــــــعال = قلت يالله طــــــالبٍ مـــنك الثــــبات
لابـــسٍ برقع وبجــــفونه ظـــــلال = في عيـــــونه سحر وبرمشه ســـماة
حاجبـــــــينه مثل تقويس الــــهلال = وجنــــــتينه حــــمر توهن يافـــعات
ناظر بعـــينه يمـــــينٍ في شــــمال = قال هات الـــــرقم سرعه هات هات
قلت هاك الرقم يا ســـــــيد الجمال = واحذر عــيونٍ تــناظر حاســـــــدات
ثمّ قفى والنــــــظر يمـــــــــّه توال = واثق الخـــــطوه ومـشدود الــــــعباة
احــــتريت ايّام ما جاني اتــــصال = طال صـبري والـهواجس حاضرات
صرت احــسّب إحتــمال وإحتمال = ضـــاع منه الرقــــم والاّ الزين مات
اتصل فيني عقــــــب شـــهرٍ وقال = انت خـــــالد قلت هاتي لي الصـفات
قال شفتك قبل فتره في الشمــــــال = مير ظرفي ماسمحلي والحيــــــــــاة
قلــــت حيّ الله حبّــــــــاس الدلال = ياهلا والفين مرحب ياغنــــــــــــات
قلت شسمك يامذوّقنــــــــي الهوال = ردّ لي بضحكه وقال اسمي نجـــــاة
قلت اشوفك؟ قال ابد هــــــذا محال = خلّ عندك صبر وابشر بالعطـــــــاة
قلت نصبر دام فالـصبر اعتــــدال = ودّي بشوفة عيـــــــــــونٍ ساحـرات
واستمر الصبر لشهورٍ طـــــــوال = والوصوف الّي تجيــــــني مدهشات
قال زيــــــــني ما تلاقي له مــثال = لو تلف الأرض ما مــثلي فتـــــــــاة
زاد فينـي الشوق واكثرت السؤال = والنظر محـــــروم وش هذي السواة
ثمّ جا الموعد عقب طول احتــمال = من ثلاث سنين واحلامـــــي شتــات
يوم شفته صـابني مثل الهبـــــــال = لا خدود ولا جمال ولا شفــــــــــــاة
انصدمت وقلت يالله فالــــــــحلال = قبل لا تغدي بنـــــــــــا الدنيا فــتات
اثر هالبرقع عذابٍ يــــــــــارجال = زيّن الـــــــشينه وحنـــــــا في غــناة
خلّوا المـــــــستور والّي في كمال = وبطلوا لبس البراقع يا بنــــــــــــات