ياقرب بنده والتميمي مع عثيم
0000000حذفة عصا للي يريد السياحه
فيها البضايع نظمت زين تنظيم
0000000وفيها التمشي بين الاسياب راحه
الجو بارد و السما لبدت غيم
0000000كنك بوسط الشام جالس بواحه
ومن راح للخارج يبي يلحقه ضيم
0000000واخص منهم كل من به شفاحه
وسياحة الداخل تحطمك تحطيم
0000000السعر ( ماينطال ) بابها وباحه
السلام عليكم ورحمة الله وبركاته
الله حيهم كلهم من اول يوزر الى اخر يوزر ياالربع تراني حالف لاحد يقوم انا خابركم
مثلي ( ذبحني الحر مايرحم ) الله يعييننا اذا جانا طباخ الاوادم مدري طباخ التمر
خاصة الضعوف اللي مثلي مالهم حيله ولا احتيال من الهروب منه ( العين بصيره واليد قصيره )
وش تسوي ؟ خاصة اذا شفت اقاربك و اصدقاك ( اللي خذو من شركات التقسيط علشان يسافرون )
ففي مثل هذه الحالة لابد انك تحاول الإستمتاع وتقول لنفسك وربعك اللي هم مثل حالتك
ترى عندنا اماكن سياحيه ممتازه
عندنا بنده واجيان وهيبر بنده والعثيم لعنبو بليسكم اذا رحنا من نخليهن له ؟ هاه علموني بس
تبون تمشون ؟ تبون البراد والجو الزين ؟ اتحداكم تجيبون لي ديرة مثل جوبنده؟
مالكم الا عقب ماينتصف العصر نتواعد يوم نروح لبنده ويوم للعثيم وكل يوم في سوق مثل ها الاسواق
ابد راس مالها عربية تاخذها من عندهم ولا منك بغيت تطلع خلها متسانها وتوكل على الله
وبعدين يا الربع (وشو له) تسافرون وتقطعون صلة الرحم اللي ومر الله بوصلها
ابه لاتستغربون حنا ترانا معد نشوف ربعنا مثل منول
( وش بلاحن اي وش السبب ) بلانا >> توهق معد يدري وش يقول
بلانا والله مدري كل واحد يسأل نفسه عن ها السؤال
المهم اقعدوا الناس ماتعرس الا في العطلة فهي احسن فرصه تشوف فيها جماعتك وربعك
وبها الطريقه وين يضيق صدرك معه؟
ففي هذه المناسبه احب اعطيكم سالفة قديمه صارت لشباب اعرفهم
كانوا اربعة اصدقاء طاحوا في العروض اللي يقدمها كنتاكي وبيتزا هت وفي روايه( بيتزا هوت)
الخلاف لفظي ولكن بسببه احيانا قد يمتد الى تطاول الأيدي بينهم ماعلينا
المهم عزموا الروحة لمه ويوم وصلوه وكل واحد منهم طاقته النفاضه من الجوع قام واحد
ومدري وين جاه ( الورع الديني معه ) مدري من الجوع ؟
وقال يا الربع ترى اللي نبي نسويه فيه غبن
رد عليه القائد المحنك وقال ورى ماتنثبر هذولي عارفين حسبتهم وين غبن معه؟
المهم وهم عند باب المطعم بغوا يتطاقون هذا يقول حرام وهذا يقول الله واكبر هالحين هذا حرام
وفعلك ذاك وفعلتك ذيك مهوب حرام ولا هذا حنا نغص بالما ونجرع البعارين
المهم اتفقوا يكلمون شيخ يفتي لهم
وخذ جواله هاللي يقول حرام ودق على الشيخ وقام يقول ياشيخ الغبن وعدم معرفه الطرفين ومدري وش بعد؟
وبينما هم على ذا الحاله الا واللي جمبه يخمط الجوال وقال ياشيخ عفا الله عنك
ترانا طاقنا الجوع وحنا قاطعين لنا درب مهوب سهل وحنا هاليحن عند باب المطعم هها ندخل ولا نعود لبيوتنا؟
قال الشيخ انتم الان عند باب المطعم ؟ قالوا كلهم ايـــه ايـــه قال لهم الشيخ دامكم عند الباب
فادخلوا وكلوا وهذه المسأله تبحث فيما بعد >> شوفوا الناس اللي تعرف تسأل
وبعدها اقتحموا المطعم وخذ ياطلبات سوبر سبريم وحلومي وخضار وكان التركيز
على الرقيقه ومن يوم ينتصفون في البيتزا يطلبون علشان مايخلصون الا وجايهم الطلب الثاني >>خبره طويله في محافل المأكولات
وصاروا على هالوزنيه حتى كان جمبهم ثلاثة مصاريه اصغر واحد منهم مايدخل مع الباب
ومع ذلك ما ابلوا مثل مابلوا اخويانا المهم مادروا الا وهذا مدير المطعم جايهم
ويقول لهم يااخوان هذي فلوسكم واللي كلتوه بلاش بس تكفون تفضلوا برا
والظاهر صوروهم وعمموا على جميع الفروع ان العرض لايشمل أصحاب هذه الصور
وبعد هذه الحادثة جلسوا يتناقشون في وضعهم وما الواجب فعله
فقال أحدهم مالكم الا صالات الأفراح تلقون العشيات الزينه والمفاطيح لحم طازج يا الله من فضلك مهوب مثل المجمد الله يرزقنا شكر النعمه >> ابد مهموب يسنتر في تفاحه
رد عليه صاحب مقولة الغبن وقال له هذي تعد سرقه وتبينا نصير طفيليين ؟
رد عليه الأول وقال انت هالحين اذا مريت حول باب القصر مهب يقولون لك الله حيه يامرحبا
تفضل الله يحييك قال الا بلا قال الاول خلاص اجل وين طفيليين ووين سرقة معه؟
وانت ماسمعت ب( لك او لأخيك الذئب ) حنا نقول لك او يكب في الزباله
فإذا علمت انه بيكب في الزباله وجيت وتعشيت معهم تؤجر على هذا
فبعدها اقتنعوا واتفقوا فيما بينهم أنه كل ليلة على واحد يعني يعزمهم في قصر عروس
ويعلمهم مكانه ومشت امورهم وصاروا كل يوم في قصر عاد كل واحد ينتقد عزيمة الاخر ويمدح عزيمته >> مصدقين انفسهم
فكل واحد يقول اجل بالله عزيمتك ذيك زينه ؟ وحنا ماتعشينا الا الساعه 12
والثاني يرد عليه على الأقل احسن من اللي عازمنا عند ناس جايين للقصر ( بتكاميل )
يرد اخر الصراحة كلش ولا عزيمة فلان اجل مافي القصر احد(ن) ابيض الا حنا
ويوم قلطنا الاويجينا المعرس ويقعد معنا الا بيقعد,, نقول يابن الحلال مافيه مكان
ويقول طالبكم تفسحون لي,,
يحلفون ان ابو العروس يبي يدخلة على العروس وهو يقول طالبك تصبر شوي
المهم في حدى الزواجات ويوم دخلوا القصر الا ويلقون ربع واحد من هالشله
وذا الواحد معد يدري وش يقول لهم انتم من اهل المعرس والا من اهل العروس
ماش صارت قديمه واحتاروا وش لون يصرفون رفيقهم من الورطه
الا والمحنك منهم قال بس عز الله اللي مهوب لاحقكم ضيم وانا معكم
قالوا وش نسوي قال لاتسوون شي خلوا الباقي علي ويروح يمسك سرى
مع اللي صافين يبون يسلمون على المعرس ويوم وصله الدور سلم على المعرس
وقام يحبب المعرس وصور معه عدة صور ثم رجع وقعد مع ربعه
وقال هالحين ابن امه يحاتسيك اويقول لك شيء
الين جت ذيك الليله وكالعادة دق عليهم اللي عليه الدور وقال ترى الليلة في قصر ليلتي
لاتخلونا ويوم دخلوا القصر تفاجأ واحد منهم الا وهذا عرس ولد عمه على اخته
ولا هذولي كل جماعته جايين عن بكرة ابيهم وهذا ابوه وعمه واخوانه مرتزين عند الباب
مايستفاد من الموضوع
1- يقولون ان المعرس اللي سلم عليه ابو الشباب وسور معه عدت صور
من بكره وراه اهله واهل مرته وماعرفوه واخرتها اتهم زوجته ان لها علاقه معه
وبالاخير طلقها
2- تجد الكثير ممن اذا عزمه قريبه ولزم عليه تهرب منه ولم يأتي اليه بحجة انه مرتبط
واظن ارتباطه مهوب بعيد عن اللي مادرى عن عرس اخته اللي ذكرته في الموضوع انفا
ارجو من الإخوة كتابة بعض المواقف التي صارت لهم بالصيف سواء داحل المملكة او خارجها