ابو وفى ماعنه خفى

خخخخخخخخخخ أقول ماشاء الله عليك روايتك فيها تجتمع جميع الروايات الشاذ منها والمتواتر وعلى طاري المتواتر عندي لك قصة لثلاث خبول رايحين يم اليونان ..

يسولف علي أبوعرب يقول رحنا لليونان ومعتمدين على ذاك المصري الي ذيبان من جد يتكلم انجليزي <- طبعاً يقصد يوناني بس خانه التعبير خخخخخخخخخ

المهم الرجل يقول دخلنا الديرة ولين عطية المصري يتحراهم قال اركبوا ويطير بنا يقول يم فندق يقول أول ماشفناه تروعنا على الباب سلاسل ويطلعون وهم شوي بيزحفون كنهم في حرب يقول طقتنا ام الركب قلنا وش القصه قال المصري ماتشيلوش هم دا إقراء روتيني أمني <-- يقول وقلنا أفا ونلتفت على خوينا الي مودينا يقول ونغسل شراعه بس مانظف خخخخخخ قصدي ما اهتم المهم..

يقول وندخل ونتسبح ونغير وننام يوم اصبحنا الصبح ونطلع للسطح ونتعلق بحدى ذا الجدران ونطل ويقول لين ذولاك الحمران العطران صفران العلابي معهم ذيك الدرابيل والأجهزة ويراقبون ولا ندري وش يراقبون ونذكر الله ونخاف ونحول ..
بعدها يقول طلعنا نتمشى مع المصري ويقول أغرب بلد في العالم مافيها ريحة الرجال قال الي بالشارع حريم ويقول طبعاً أنا فاتحين ثمومنا أول مرة نطلع من السعوديه رحنا لليونان يقول ونمر من عند ذيك البنت تنظف قدام باب بيتها ويقول البنت جميلة قال خويي بلغة عربية فصيحه يابن عبدالله أنظر لهذه الفاتنه طبعاً باستهبال رد الثاني عليه قال والله أنها لجارية اشتريت من بغداد أو الكوفة <-- طبعاً هذا ماهو مسلسل تاريخي بس الشباب يقالهم يستهبلون لأنهم آمنين أنهم في بلد ماحد عارف لغتهم لكن المفاجأة التفت البنت عليهم وقالت : مرسيه على الكلام الحلو <-- طلعت لبنانيه ويقومون أبو عرب وخويه وشقوا الشعيب وهجوا خخخخخ

يقول من المواقف ذيك الديرة كل ماجلسنا قدام التلفزيون ارتعنا مافيه ألا حوادث قتل وتفجير والمصري يترجم لهم... يقول أبوعرب اثرنا طحنا في ديرة عصابات لبنانيه وايطاليه وروسيه وحنا متوهقين يقول المشكلة شكلنا مميز وكل مامرينا مع شارع كل الناس تطالعنا وقالهم المصري عادي بس يستغربون ثلاثة رجاجيل يمشون مع بعض لأن عدد الرجال عندهم قليل تلقى أكثر الي يمشون بالشوارع بنات يقول وحنا لا نعرف لغة ولا شيء

المهم يقول بغينا نصرف ويودينا المصري لشخص يقول أنه يصرف صرف حلو ويقول ويوم جينا ولين هذا الي مودينا له رئيس عصابه وحوله ثيران كبر الجبال أجسام ويقول مدري من الي أخطأ فينا دخل يده في جيبه يقول يوم امتلا وجهي مسدسات يقول وارفع عيوني فيهم قلت أفا تكفون ياعيال الشايب ماهيب هي حنا سياح خخخخخخخ يقول ويترجم المصري ويفتشونا مالقوا سلاح يقول واصرفوا لنا وطلعنا حسبي عليهم

ويقول طلعنا من عندهم ماتشيلنا رجلينا ونروح للفندق ونجلس هناك وأنزل أنا وواحد من خوينا والثاني نام في غرفته يقول ونلقى صاله كبيرة وحلوة وفيها كرسيين كبار اكبر من الكراسي الباقيه يقول وننصى الكرسيين ونجلس عليها من تقريباً العصر ونسولف يقول فيه حاجه غريبه تحصل أن ذا القاعه كل شوي يزود عدد الناس فيها يقول شوي يوم امتلت ناس وحنا أنا وخويي ماغير نحش فيهم نقول شف وجه ذاك شف عيون ذاك ونضحك شوي قام يتراطنون ويتكلمون وزاد الرطن لين قاموا شوي وبيطاقون وابو عرب يقول لخويه أول مرة أشوف خواجات ينازقون على بعض خخخخخخخخخخ واضحك وخويي يقول والله مشكله خخخخ بس ماتلاحظ أن الناس مجلسين عن يمينا ويسارنا قال ابوعرب يخسون والله مانقوم يجلسون ولا يطامرون يقول شوي وفيه ولد مرسم بدلة وبنت لابسه أبيض دخلو وقعدوا يعاينونا شوي قال ابو عرب لخويه شكله عرس تدري بنقعد نشوف وشلون ثقافة الشعب اليوناني الشقيق في مسألة الأعراس ,,,

يقول ابوعرب وذولا الرجال والمرة طولوا يشوفونا ثمن جلسوا مقابلنا على الكراسي شوي ألا جاء المصري ميت ضحك ويكتم ضحكته قال أيه يا ابوعرب مالك جالس كدا أوم أنت وصاحبك فزحتونا قال ابوعرب ليه وش فيه ياعطيه قال دي الكراسي الي انتم جالسين عليها بتاعت العرسان يجلسوا عليها يقول وانتبهنا اثرنا جالسين صدق على الكراسي الكبيرة وننقز ونحرك للغرفة وانا مستحين بس متعجبين من الاخلاق الي عندهم ماقومونا من محلاتنا

يقول آخر يوم لنا رقينا السطح وطلينا لين خويانا الي كانوا يراقبون الي شفناهم أول ماوصلنا في نفس محلاتهم قال واحد خويانا الظاهر ذولا المخابرات الامريكيه جالسين يراقبون احد يقول وحركنا للمطار ونزلنا في مطار جده ...

طبعاً يابووفى الدروس المستفادة أخليك تستنتجها خخخخخخخخخخخخ

تحياتي ..