وين ابن جدعان شوفوا لي مكانه=ولاعرفتوا وين بيته علموني
والله اني لاصله واسكن وزانه=وكل ماضقنا تناولنا الحوني
شاعراً بيطار بالمعنى تكانه=جازلي قافه وغيره مايهوني
لكن ان الشعر قصة عنفوانه=عند شاعر لاكتب هيض اشجوني
كل شاعر يطوي البيداء حصانه=والهدف في راس شاعر وش يكوني
غير توضيح الحقايق والأدانه=عند ناسً ماعطاه الله عيوني
يابن جدعان اليالي والأمانه=تجبر الأنسان مايقدر يخوني
طحت في ناسً هدفها دان دانه=ولاعسرت اهدافهم زادت جنوني
كل واحد صايراً عنتر زمانه=والبلاء ياصاحبي مايستحوني
لاتقول العلم هاك العلم عانه=ودنا نكويه من فوق المتوني
ماكتبت الشعر من باب الميانه=ماكتبته غير للي يدركوني
كل حرفً بالقصيده له كيانه=وعند ابن جدعان كايدها يهوني
وفالنهايه اقبل اجزل امتنانه=شاعراً ماقال بالشعر اسعفوني

مبتداي بذكر ربي جل شانه= عالم الاسرار لأمره يسجدوني
كل ما فالكون من انسه وجانه=ما خلقهم غير لجله يعبدوني
وبعد ذكر الله وشكره وامتنانه= ما نغير ظن شرهين الظنوني
من قصدنا ما لقى فينا مهانه=نحتم الميقاف ونسد الديوني
الشجاعه عز والذله جبانه= والوفا للي مقامه ما يهوني
والقصيد العذب نطمع في سمانه=واكثر العالم بهزله يقنعوني
يا زميل الشعر تبشر بالأعانه=انت في مملك وما اقدر تموني
في مجال الطيب لك مني ضمانه= معك اسد النوب وافك الحصوني
دبلماسية قصيدي في حصانه=عن هل الاسفاف وارغاب البطوني
عاسفه عسف النظا بالخيزرانه=وحافظه بين الرموش ابوسط نوني
يوم عشاق الكمنجا والكمانه= عزفهم غْير مسارات الفنوني
مالهم في صفحة اهل الشعر خانه=بس من باب التمني يمتنوني
خل في بالك سعه واهل الاهانه=يندمون مع الحسايف والغبوني
جدول اهل الشعر شعرك في بيانه= عند راع الصنف واللي يفهموني
والغشيم اللي يطول في لسانه=ما يشره في ثقيلات المنوني
فالمواقف لا وقف عشره ثمانه=والقبايل عن مثيله ينتحوني
جاك مردودي وبيت اخوك عانه= في فيافي نجد تحميه الركوني
في عفيف الخير ما يبغا ابانه= بيت كامل للضيوف اللي يجوني
اسسه جدعان ما وفر سمانه=ثم دخيل الله حجا اللي يزبنوني
ثم فلاح اللي عطا منهج اخوانه=اصغر اللي يا عدون ويا قدروني
وفي زمان الخير للطيب مكانه= جعل حكام الجزيره يسلموني
والسلام اختام واصحاب الذهانه=يكشفون الناس من ضحك السنوني