السلام عليكم ...
استراحة محارب بعد
كابوس الاختبارات الآثم
خرجنا من تلك المعمة
بهذة المشاركة المتواضعة .
شقائق النعمان
سر ياقلم وابدع جميل المثايل = لأم العيون ، اللي هدبهن مراييش
مع الكلام اللي حوته الرسايل = سلا مي ، لعذب الثنايا المباهيش
شهلا العيون الناعسات الشعايل = وشقر الحواجب باريتها المناقيش
لامن طرت لي هل ّ دمعي همايل = مسايله من فوق خدي تراشيش
تعبت أنا أحاول بشتى الوسايل = لاكن على كثر التعب ، ماحصلّيش
يابري حالي لامشت في تمايل = من فوق كبدي مثل طرق الشواكيش
في مشية ٍ مثل البكار الأصايل = حدر النجايب مع اخروج ٍ منافيش
الساق مبري مثل غصن الفسايل = مع نا بيات ٍ لا تثنّت ، مداقيش
والطول فارع مثل ركز النقايل = ورسمة خضابٍ ٍفي يديها نقاريش
بروض الصدر خط ٍتوسط وشايل = مايستر الملبوس خلف الكراميش
داير مدار وما حوى ،، للسوايل = قالب حلا . وامجمّل ٍ بالمراقيش
تنقض على الأمتان سود الجدايل = في لونهن مثل الليال المغاطيش
تارد على الأرداف روس الثلايل = وامخصّر ٍمحزوم مثل المهابيش
تلبس حرير ، ومرهيه بالخمايل = ما قللت من قدرها ، بالدناديش
ماشفت انا في حسنها بالحمايل = بين العرب أوعند حمر الطرابيش
لو كان في المليون ، قلة قلايل = حول الحلايا مابهن من عراميش
فرق الثرى عن الثريا دلايل = في حسنهن عن حسنها أم العكاريش
لو خيّروني قلت ما ارضى بدايل = لو كان نقوة للبني ، الفرافيش
ما اطيع فيها كل ما قال قايل = بنعقة غراب البين ونفث الخفافيش
أهل الحسد ما منهم إلاّ الفشايل = بالهرج رنّانة ، سوات القراقيش
بالنّم ، ما خلّوا قصير ٍ وطايل = لا شك أنا ، مالي ومال الحرافيش
حبي لها مع دورة الدم جايل = بنبضة خفوقٍي بالعروق المراعيش
ما هوب حب ٍ بالخدع والحبايل = ولا مكايد ، من سوايا الدراويش
حب ٍ دفين ٍ له بجوفي نثايل = شقائق النعمان ، حوله ، مفاريش
ياوجدعيني وجد راعي الرحايل = ساعة لفى يم الضعون المعاطيش
الوقت قيض ومستعر بالقوايل = وهو دريك ، وما يجيد المطاريش
أشوف من قد ذوّقتني الهوايل = خلّت عقول الناس منها مرابيش
لاحلّت بدار ٍ ، سقتها المخايل = التين والأعناب ، فيها معاريش
ماقد مشت درب الردى والرذايل = وما سفّهتها الزبرقة والزراكيش
بنت الرجال ، مكرّمين الخصايل = هانت ذياب ٍ،، لابسين ٍ دشاديش
وقفت على وضح النقا بالفعايل = راياتها بيضاء ، ولاهن مغابيش
ياليتها ، تكسب بحالي جمايل = نعيش ، ونبعد عن حياة التهاميش
وإلاّ العدو ، لابد له يوم زايل = يموت واهمومه بصدره ، مدافيش
مثل الحنش يموت ختل وتحايل = والسم وسط أنيابه اللي مناهيش
مودتي لإصغاءكم
محمد بن عمار