[ماجد الزيد]

غابت الجوزا وفزّ الليل في قلب المعنّى =والقمر ماكنّ نوره غير شيب براس شايب
القنيب الي بصدر سهيل ياهو صوت ونّا = والليالي سرمديّة تهزم جيوش وكتايب
يا قمر سلّم على عيون الاصيلة ذيك عنّا = قل لها روحي وقلبي والجسد سقم وعطايب
لو تسنّالي اردّ الوقت ! لكن ما تسنّا = غلطة المؤمن بعشر آلاف من سود النوايب
والله انّ الحبّ جبري في عيوني ما يكنّا = مثل نجم الصبح لا بانت ويلا غابت كرايب
والله إن البعد آذاب العظم بي والقلب حنّا = مثل من قفّت حياته شوف عينه بالركايب
وين من لا شفت عينه (نال قلبي ما تمنّا) = وين من لا بان وجهه يمتلي صدري سحايب
ضحكته ، صدق الطفولة والطهر ، منه تحنّا = وطيبته ، ماكنه الا أعظم السبع العجايب
والله ان قلبي تمنّا قربه ومعْه يْتهنّا = وذا خفوقي من فراقه صارت قصوره خرايب
واوجودي وجد قيس الي خفت نوره وجنا= ما يلام الي عشق له مهرة ٍ تسوى قرايب
وا حطام ضلوع من حظّه مع الغالي تدنا=واعذابه كل ماليله سدل شاف الحرايب
الخلا منّا وبيدا والوحوش السود منّا = والفراغ الي يطوّقني ملا قلبي نكايب
واوجودي وجد عود ٍ كل من حوله تفنّا = الاهل والمال والعزوه وفي صدره لهايب
يالهنوف الي غلاها من دمي الصافي تبنّا =راسخ ٍ مثل الجبال البيض ماني منْه طايب
(كن ما بالارض حيّ ٍ) يوم ايماني تدنّا = كل خلق الله حولي بس احسّ انْهم طلايب
سامحيني ماقصدت اجرح شعورك لو بظنّا = من ندم قلبي تمنيت الفنا ماني بهايب
العواصف في كنيني ضروسها تصر وتزنّا = والخيام تْشلّعت وسباعة البيداء نحايب
آه من حر الجوى ونيران فقد ٍ يسعرنّا = والوقود الروح وضلوعي مثل جمر الحطايب
الخناجر فیـّۓِ خفوقي منْك واحساسك تجنّا =سامح الله طعنتين ٍ تودع القلب النصايب
ما تمنيت الفراق ولا بغيت انّه يسنّا = لكن الصبر ونهبته من عشيرك بالنهايب
الوفاء براسي تسلطن فیـّۓِ خفوقي كم تغنّا = لين ما صارت عليّ عمامته ترخي الذوايب
رح بمان الله يا اغلا حب ولا تحكي بأنّا = لا تقول انّا وكنّا صارت الدعوة نشايب
واوجودي وجد من شاف القبور الي جْهزنّا = واقبلوله بالتعازي بعشرة اخوان وحبايب
وش يعزيه بصوابه يوم حزنه ما تونّا =جمرة بقلبه تولّع منها نحور الهبايب
اظلم الكون بعيونه والنجوم اتناثرنّا =كوّرت شمس الصباح وباكي الاشراق .. شايب }
ليت قلبي لا تمنّا نال كل ماهو تمنّا =كان ماشبّ الوتين وكلّ ضلع ٍ بيّ ذايب