ليت الزمان يعود واخبره ماصار= واشرح له الموضوع من غير تقصير
واقول راح الود وتغير الجار = والناس من عقب المواتر نسوا السير
باعوا الحلال وبدلوا كل تذكار= واهل الزراعه بطلوا الزرع والبير
عاداتهم متغيره مثل الاحجار=حل الجشع فيهم ومافيهم الخير
ماتت كرامتهم ورى فتنة القار=باعوا الشرف واستلهموا هفوة الدير
من بعد راح القدس لحقته الانبار=واولادكم رقصوا لشيخ الخنازير
عجوز شمطاء كافره تحكم الدار=تامر وتنهى والعرب تنقع الزير
نتبع هوى الكفار مانبني اشوار= الي تقوله رايس اصبح مقادير
مابيننا فيصل ولا بيننا ابرار = نكذب نصدق كذب في كل تعبير
صار الجهاد ارهاب والدين غرار=والفحش صار احسان والذل تحرير
احلف برب البيت في صدق الاخبار=انا لصرنا مضحكه عند جنقير
واحلف برب البيت مابيننا انصار=وانا من الذله كما ريشة الطير
واحلف برب البيت انا على الطار=نرقص لواشنطن وبرلين والعير
هذا كلام الصدق عند ابن منشار=والي يحلل ضعفنا صابه الضير
والله لو من قالها قبل بالعار = ليوصمونه بالخيانه معا الغير
ماحد تصور ماجرى من تحدار=كانوا يعدون العدد والتقارير
ياويلنا اصحى القطر ماعدبه امطار=وسلط الكافر علينا بتبرير
الله لو يرجع زمان اهل الانظار=ليحسبونا مالعجم ننفخ الكير
لارواحكم يابطالنا قلت الاشعار =ياهل المروه وينكم يالمناعير
شوفوا الخلف ضيع صلاته بالاسحار=شارد عن الواقع تقل كيس جرجير
اعراض ألامه تنتهك شوف الانظار=والارض محتله وفيها طوابير
الروم جونا تحت رايات واسرار=كل الامم متكالبه والهوامير
لو قلتها في عصركم يوم الاسوار=لكان قلتم ذا تجنن وتزوير
حنا العرب مانقبل الظيم ياضار= وكان قلتم لي على مين ياصغير
حنا تبعنا الغرب في حفرة الفار =حتى بجحر الضب صرنا معاصير
نلبس ولا نصنع وناكل مالامصار=وان حد تهرج قالوا الرزق تكرير
لابارك الله بالكسل بين الاشرار=صرنا طعام اجحوش لاهل التدابير
مابيننا للباس قوه ومقدار = اما معا المحتل مثل العصافير
ياحيف لو تدرون بافعال غدار=واقلوب بين ضلوعنا كالفرافير
لتاتبروا من نسبنا يالاقمار= لا مانشرفكم ترونا مخاسير
كنتم جبال وكنتم الناس الاحرار=وكان التواضع نهجكم ياغنادير
كنتم رجال الحرب للحق ثوار= هاماتكم فوق السحب يامغاوير
اما الخلف فطوالها تغدي اقصار=ماعندهم غير الطرب والقوارير