[بنت القصيد]

ياطير ياللي ترتفع واتطير واتشق السما=واتخلي الارض الوسيعه كل ما ملّيتها
ياطير وقف واستمع واحفظ حقوق الانتما=انته بحاجه للسما ونا السما خلّيتها
عندي على الارض الوسيعه مرتعن لجلي زما=تروا من اعدودي حلوقن بالرضا بلّيتها
باقف على رمضا تواريخ الحقيقه طالما=نفوس بعض الناس علّتني ولا علّيتها
الوقت عيا .. ليه ؟ مدري ! لكن الدعوا كما=سم المزون اللي تَحَدّر كل ما علّيتها
وش حيلة اللي كل ما تشرب تورّد للضما=ياطير علمني مدام الذاكره فلّيتها
بعض العيون اللي تقدّيني ولو فيها عما=ابرك من ايدين البصير اللي علي ولّيتها
هاك اليدين اللي على الماقف تبا فك الحما =ماكون بنتن للحَرَار ان كان ما شلّيتها
بحر الزمن ياطير أزرا بي ولو قدمي طما=غبّ البحور النادره في ذمّتي دلّيتها
عاين بصدري يوم جرحي كل ما يبرا دما=والمشكله كبرت ونا ببطي ولا حلّيتها
غصن الجروح اللي على صدري من الضيقه نما=تسقيه دمعات المحاجر كل ما هلّيتها
لاكنّ انا عندي يقين ان كان هالوضع احتما=سيوف صبري للزمن لا ضامني سلّيتها
ياطير عوّد للسما جونا مهاوين الرما=حرّيّتك لو ارخصوها جيتهم غلّيتها
ناديت لك ودي أفضفض للسما واهل السما=لا واهنيّك تشلع مْن آلارض لا ملّيتها