جار الزمان وشب بالقلب تنور
جار الزمان وشب بالقلب تنور=وقت الخطا مدبر ولا فيه حيلة
دمعي تحدر من على الخد منثور=دايم على الخدين يجري مسيله
ابات ليلي بالمصيبات مقهور=ليال ذقت الضيم ما هي بليله
من ضيم وقت هدم الدور وقصور=منكف على العالم بجيشه وخيله
لو كان له فضل على النفس مشهور= خلوه يوم انكف عنهم حصيله
ركب الرديف وحولوا راعي الكور= وقاموا يرونه في النفوس الثجيله
لو كان ينطح له بما فات طابور= اليوم مسكين وحاله نحيله
محد يقول اعليت ياالليث ماجور= وقت تغير دار دور بديله
لا عاد شان الوقت والحظ مدبور= الليث وندخ والقطو رز ذيله
الهر يفرس من حمامه وعصفور= ماتشتهي نفسه لزوم يجي له
من لول عند المناعير محقور = واليوم له يمنى عليهم طويله
كم واحد حر كريم ومنهور = يفرح بوجه الضيف عينه خليله
صار له زمان به تعاكيس وكتور= في حالته عقب المعزه ذليله
ياحيف طاح وخاطره طلق مكسور= ماله صحيب صافي يشتكي له
والحر شوره لو حكى فيه بالخور = ما شوف منهم واحد يصطفي له
كم ليث باتع من ردى الحظ ماسور = من شاف حاله قال واعزتي له
يغلي بقر من ردى الوقت ويفور= امن الوجاش ليت ربي يزيله
يوم الردي بتفاه والطيب مثبور= وقت الخطا ساعة نفوس رزيله
قالوا بعض ناس على الطيب خايور= الكدش حطت بالخيول الأصيله
يامن يبرز لي ظلامه من النور = وقت تغير والمساعي قليله
لو يرجع اللي قد مضى دور منذور = ومن الفرح كلن يبرد غليله