في مدح طلال الرشيد
طلال لو قلبـك حجـر أو حديـدي=أمداه من حامي وطيس الوغـى ذاب
شبّيت فـي نجـد بنـار الوقيـدي=واحرقت فيه عداك واذريت الأصحاب
وكسيت ملكك ثـوب عـزٍّ جديـدي=وسلّيت حال عداك ياعـز الأقـراب
بحربٍ وضربٍ شاب منـه الوليـدي=مالوم من عـاداك يـومٍ ولا شـاب
تلقى الخطوب بباس ليـثٍ شديـدي=وعزايمٍ عزّت على عمرو وشهـاب
أحيت شجاعة خالـد بـن الوليـدي=وأنسيـت قـالاتٍ لأبازيـد وذيـاب
لو كان عمرو بـن معـد الزبيـدي=حيٍّ لجا بحماك يا زاكي الأنسـاب!
حيثـك وفـيٍّ بالوعـد والوعيـدي=غيـثٍ وليـثٍ حضرمـيٍّ وقـلاب
صميـدعٍ عنتيـت عـيٍّ عنـيـدي=شهـمٍ وفـيٍّ هيلعـيٍّ ووهّــاب
شفقٍ على الدانـي حليـمٍ رشيـدي=طفقٍ على الجاني جـريٍّ وحـرّاب
روّح لابن شعـلان علـمٍ وكيـدي=إنه بشهر الصوم ضيـفٍ لحطـاب
وأوفى لهم وافي الذمـام الوعيـدي=وعنى لهم في خمسة آلـف قـرّاب
سردٍ وحـردٍ كالدبـى يـوم قيـدي=وأتعب طويلات الجلامد على الـداب
واقفوا عنـه خـرّام سـك أويـدي=وتبدلوا عـن دارهـم دار الأجنـاب
خيّم علـى (مـارد) ورد الرديـدي=وتم الجواب وعزّب الجيش معـزاب
ضرَب وخرّب كـل قصـرٍ مشيـدي=كن الصواعق والرعد حسّ الأطواب
دمّر وجمّـر ناعمـات الجرديـدي=وأهفى مقام القوم والنوم له طـاب
بفجريّة كنه ضحـى يـوم عيـدي=بدريّة ويعَز بـه مـن بالأصـلاب!
وهو على اللي مثل عنق الفريـدي=أو قارحٍ مثل الفهـد يوثـب وثـاب
يقلط على الجمع المشهّـر وحيـدي=كالموت لأرواح الملابيـس نهّـاب
يدوسهـم دوس البغـال الحصيـدي=عسى عليه من الولي عز وحجـاب
أنساهـم الماضـي بفعـلٍ جديـدي=وأودع مصاعيـب يقـادون بكتـاب
صاروا له الحكـام مثـل العبيـدي=وأسقى سراج العز كمن دم الأرقاب!
بالغت في مدحـه ولا صـح بيـدي=ولا أحصي خصالْ أعجزت كل حسّاب
يقصر عنه فهمـي وينفـد نشيـدي=ومن الثنا لي خاطرٍ ما بعـد طـاب
يـاولاد عمـه كاسبيـن الحميـدي=شمّر ينابيع الصخا حصن الأطـلاب
يا ما هفا يأيمانهـم مـن عقيـدي=ولا جنّبوا عن قالةٍ خـوف طـلاب
قوم إلى ركبوا على حـرد الإيـدي=شفت القلايـع كالحراذيـن هِـرّاب
وصلوا على الشافع بيوم الوعيـدي=محمد المختـار وآلـه والأصحـاب