وكان عالما فلكيا
سبك لك نجوم الدهر بالفكر حاذق = حوى وأختصر مضمونا بأمر خالق
ترى أول نجوم القيض سبع رصايف = كما جيب وضحا ضايع الدرك دالق
او نعل شاخ والتويبع تبيعها = في برجها الجوزاء كما الدال دالق
يرفع بها عاهات الاثمار عشبها = تغدي من سموم الحر مثل الحرايق
سته وعشرين بها الحر بسطه = نهاية قصر الليل عشرة دقايق
عقب تطلع الجوزاء كشلفا شمالها = نظيم تلالا كالدراري لواهق
تبرى لها الهقعه وبالهنعه أنتهت = تهب السمايم فيه والظل سايق
سته وعشرين والسرطان برجها =يصلح بفصله كل حلو وحادق
ويظهر ذراع الليث هو والمرزم الذي = كما مشعل الساري بنوره يشاعق
يرفرف بنوره كل مابان واختفى =- كما عين عمهوج غنوج لعاشق
ويبين لك نجم الكليبين بعده = هي النثره اللي كالعيون الروامق
دليل على ظهو الكليبين أماره = اذا غربن عنه النسور العتايق
رياح وسموم وقيل تظهر به أفه = لبعض الثمار وبعض الاشجار صافق
سته وعشرون ترى الليث برجهن = يقف ظلها قدم وتغور الخرايق
ويظهر لك النجم اليماني وطرفه =يتقلب كدرة خاتم بيد مايق !
ينشر قماش الصوف والجوخ لايقع = به الدود في مثنى مطاويه خارق
ومحسوبة أربع نجوم بنجمه = مع الجبهه الزبره لها الصرف لاحق
واذا مضى منهن ثلاثين ليله =تواسى نهاره هو وليله مطابق
وعشر ويبدي المزن ينشي مغرب =مغاتير ذيدان حداهن سايق
واثنى عشر باقي سهيل وبعدهن =تظهر نجوم الوسم صرم الحدايق
واثنين وخمسين ترى أنجوم أربعه = أولهن العوى كما اللام لاهق
والسماك مع غفر كما القوس وصفه = وزباناه نجمين كرمح معانق
تكثر عواصفها بها الظل سبعه =وعن الفصد والسهل نهونا الحواذق
ويروجهن بالقوس والجدي ينتهي =كثير به الماطر حقوق البوارق