راشد الخلاوي رحمه الله تعالى اشهر من علم على رأسه نار , وسبحان من وضع حب هذا الرجل في قلوب الاجيال جيل بعد جيل , ولا ارى الا ان الله رفع ذكره لصدقة وبيض سريرته ونقاءة ولما حمل شعره من الفضائل , وهذا مايحتاج اليه الشعراء في هذا الزمان وفي كل زمان , الحديث عن راشد الخلاوي يقودنا تلقائيا الى الامير منيع بن سالم
ومنيع بن سالم من ذرية الملك العادل أجود بن زامل ،منيع بن سالم بن زامل بن سيف بن أجود بن زامل العقيلي الجبري الخالدي أخر حكام الدولة الجبرية وكان آخر من حكم الأحساء منهم ، وقد ذكره الخلاوي في جل قصائده ان لم يفرده بالمدح من اهل جيله فكيف كانت الصحبة وكيف أبتدئت ؟
اولا راشد الخلاوي اختلف في نسبه الكثير من البشر ! وهذا لايهمنا حقيقةً لان الرجل بذاته كان رحمه الله أعجوبة زمانه وما تلاه بالخلق والوفاء والشعر والى غير ذلك مما يعجز متتبعوه ان يبلغوه .
هناك من قال انه من القبليه الفلانيه ومن قال أنه ومن قال أنه !!!!
استشهد بقوله عندما اوصاه خليله الامير منيع بن سالم (أن إذا وقعت في شراكك ظبية تحمل ملامح محبوبتي ميثاء فإعتقها , وقد حدث ذلك وعندما وقعت الظبية في شراكه اعتقها وانشد يقول :
وذكرت وصاةٍ من منيـع بـن سالـم=وغيري الى من جاع ينسـى الودايـع
شبيهـة ميـثـاء (يالصليبي)خلـهـا=ولو كـان بايـام الضفـاري وجايـع
وخليتهـا لعيـون ميـثـاء عتيـقـة=عتيقـة صليبي(ن)طويـل الـذاريع
وراحت تخب الجري من فرحت(ن)بها=لها ولـد(ن) بيـن السليليـن ضايـع
ومن قال انه خالدي أستشهد بقوله :
منيع المسمى وانت ادرى بما جرى=وجدي وجده في معاليـك صالبـه
وقد يحمل هذا البيت على النزارية لا على الالتقاء في الخالدية
ومن قال انه قبيلي وكفى ولم يحدد من اي القبائل استشهد بقوله :
مضى مامضى لي فالمنيعي وقومه=وعدنا القوافي في الخلاوي وشاذبه
يقولون عيابـي :صليب(ن)قبيلتـي=على غير برهـان دليـل وكاذبـه
على اني اسمي بالخلاوي دليلهـم=فـلا اكـد المذمـوم الا زلايبـه
خـلاوي حـال لاخـلاوي قبيلـه=والانجاس ماتخفى عليها صلايبـه
على ان المهم او مايهمنا قصته مع منيع بن سالم رحمهما الله وكيف وصل اليه
وما الاسباب التي جعلته يتخلوى ويترك اهله وربعه
يقول الخلاوي رحمه الله تعالى
على ماجرى فكرت واحترت بالورى=ماقال بعض الناس عنـي وفـاه بـه
فياجاهل(ن)بي لـي حكـاة وقصـة=واسباب جات بهـا مـن الله نايبـه
فـلا عابـنـي الا عــدو مـلـدد=فاسمع حبـاك الله ماجـاك واجبـه
جـار لـنـا فــي الله لله طـيـب=عفيف الورى مستمسك الدين جانبـه
سطا به من الانـذال كلـب مطـرق=مدري خليع اوْله مرمـات خاربـه
فساقتنـي الاقدار(يـاحـي حيّـهـا=ولا الجار فوق الخد يوطى بغاربـه
ونادى ونـادى اننـي جـار راشـد=وربات دار الجـار تبكـي ونادبـه
فلما رايت الجار فـي حالـة البـلا=من جور كلب الحي والدم سال بـه
تنحى زنادي عن فوادي وقـال لـي=من لايعـز الجـار لاعـز جانبـه
وجتني على جاري لـك الله غيـره=كما غار اسد الغاب وازور حاجبـه
وضربت من فاجا قصيري بضربـه=بمصقـل يابـى تلامـي مضاربـه
فاجـاه يمنـى لليمـانـي تزيـنـه=واودعت ظامي الخد لدمـاه شاربـه
هذي حكاة لمـن تخلـوى وغـرب=وفي كل خـد نـاخ فيهـا نجايبـه
وفي كـل دار دارب فـي امورهـا=وركب البحور وشايفٍ من عجايبـه
فعلى ماسبق قالوا ان الخلاوي فارق قبيلته والله اعلم
لكن بعد تخلويه التجى الى الامير منيع بن سالم رحمه الله تعالى وجاوره
فاحسن الامير نزله وقدمه , وما ذلك الا لكرم خلق الامير وصاحبه ,فكان ماكان بينهم
من حسن معشر ووفاء لاتشوبه شائبه , وقد كان منيع بن سالم كريم المعشر سخي الكف
لايبقي من ماله شي يستعين به على نوائب الدهر , فانتبه الى ذلك راشد الخلاوي ونصحه
ولكن غلب طبع الامير منيع على ان يحتفظ بشي للزمن , وكان الامير يعطي راشد الخلاوي
ويحثي على المال , الا ان راشد كان يبقي بعض المال ويدخر لمنيع نفسه وكانه يعلم بان الدنيا
ستدور رحاها على الامير منيع رحمه الله تعالى , فحدث ذلك كما توقع راشد , عند ذلك سمع راشد
ماحدث مع منيع بن سالم .وساوردها بالقادم من السيرة ولكن لنسير بتوقيت جيد معها
ونرجع من جديد للامير منيع ابن سالم والخلاوي الله يرحمهم جميع
مثل ماسبق وقلت انه كان بينهم ود حقيقي ووفاء وخوة صادقة
اراد بيوم من الايام الامير منيع ابن سالم انه يختبر اخلاص راشد الخلاوي
ومدى صدقه ووفاءه , فمره راشد ومعه ولده يطلب الامير حاجه , الا ان الامير الله يرحمهم رد راشد خايب
ولا اعطاه حاجته انصرف راشد وولده من الحساء وبعث الامير بصحبتهم رجل من اتباعه دون علمهم بانه مرسول من طرف الامير منيع , وهم بالطريق وقم يالولد وهو يقول:
عنينا وعنيناك يا ناق فاصبري=إلى بارقٍ ماتنثر الما مخايله
فلامه ابوه راشد وعنفه ورد عليه بهذا البيت على نفس الوزن والقافيه
إلى من رفيقٍ شح علينا بمالـه=ذكرناه باللي قد مضى من جمايله
يوم سمع المرسول من طرف الامير منيع وهو يعطيهم العلم ان الامير منيع يبي يختبر صدق راشد
ووفاءه وفعلاً نجح راشد بامتياز , وهذا ماخلد ذكره , لانقول راشد موافق فعله ولا نزكي على الله احد
لكن من خلال سيرته , الشاهد انه عاد راشد يم الامير منيع بن سالم واجزل له العطاء وحفظ له عهده وصداقته
فشل صداقات راشد الخلاوي مع الجميع !!!! الا مع الامير منيع بن سالم الجبري الخالدي لماذا ؟
لنسمع من راشد نفسه رحمهم الله تعالى :
يقول :
وكم حارب(ن)يلقاك في ثوب صاحب=شفق(ن)عليك ومُظهر الود جانبـه
ويقول لك حال الرضا هـاك دونـك=وفــي مـلامــاك راغـبــه1
متملق(ن)يغـري غشيـم(ن)بـوده=ويعرفه اللي غاص بحر التجاربـه
راشد ابتلي كما ابتلي غيره في كل زمان ومكان -بمن يسمون أنفسهم أصدقاء -أبتلي الخلاوي بهم
-لاكثرهم الله- فعبر عنهم في الثلاثة الابيات السابقة ثم اردف قائلاً
زمان(ن)به المامون فـالنـاس نـادر=قليل الذي صاحب ولا خـان صاحبـه
الـى قلت:هـذا طيـب الفـال فالـح=وثيق(ن)شفيق(ن)صالح(ن)بي تصاحبه
تلقـاه فـالطاعـات فسل(ن)وكاسـل=وعلى الدون سرحان الغضا مايواثبه 2
ثم ذكر شاعرنا الامير منيع بن سالم مقصودنا من هذا البحث لنتعرف اكثر عليه وعلى راشد الخلاوي ونتتبع الشعر النبطي في عصرهم حيث قال:
لساني وانساني ونوري وناظـري=وجودي وماجودي من الخلق قاطبه
وروحي وريحاني وراحي وراحتـي=(منيع)الذي من كل ماطاب طايبـه
فتى طال بالعليا على شامخ الـذرا=وكثير الورى من عين علياه شاربه
فتى مايرى في مقعد الذل منصـب=امـا سنـام العـز والا نصايـبـه
وقوله ايظاً في الامير منيع بن سالم :
وهو عقي القوم لـولاه ماغـزوا=ولا نسفـوا باكوارهـن الجواعـد
ودليل عوص الناجيات الى اختفت=معالمهـا والنابـيـات الفـرايـد
والى بغى ينوي على العزم وانتوى=اخذ راي الف(ن)وانتقى منه واحد
ياطـول مايـارد بهـم جاهلـيـة=يفجا الشّبا عن كوكب(ن)ماه بـارد
ويشيد بصداقته لمنيع ويقول:
ليدري منيع انني عنه مـا اتقـي=ولا الروح عني فيه للموت هايبـه
افديه بالـروح العزيـزه ومالهـا=وفي كل نوب(ن)ناب فالروح زاهبه
وما الخل الامن غـدى دون خلـه=فـي كـل ماعنّـاه وادى لواجبـه
ولا مقصدي منه العطا لا والـذي=بنى السماء واهمى هوامي سحايبه
الى ان قال"
تحظـي منـيـع بالـعـلا والمـعـزة=ياخير من يرفـع لـه الكـف طالبـه
كفاني مـن الدنيـا منيع(ن)همومهـا=حباني وصان الوجه عما يشـان بـه
هو الصاحب الصافي وذخري وعدتـي=منيـع ظنـوي فيـه ماهـي بخايبـه
فلله دره مـــن منـيـع(ن)مـدرب=حليم(ن)وأوّاب(ن)رعـى الله حاجبـه
يلقـاك بالبشـرى ويبـداك بالـنـدى=ويغنم نجيـب الخـال حاجـات طالبـه
قريب(ن)من التقوى بعيد(ن)عن الهوى=نعيم(ن)لمـن دانـاه نار(ن)لحـاربـه
فلولا منيع(ن)نـور عينـي وناظـري=قتلت الهوى والقيـت عنـي ربايبـه
ولـولا منيع(ن)فوقهـا عفـت مابهـا=فـلا رغبتـي فـالـدار الا لجانـبـه
ومن حـب شي(ن)بـي لازم يطيعـه=وينقـاد لـه قـود النضَـاة المداربـه
1ملاماك مصاحبتك
2 فسل : دنيء ساقط
ونتوقف الى هنا حتى نعود اليكم من جديد
أرجوا ممن لديه اضافة ان يرسلها لي على الخاص ليتم تنظيم وترتيب الطرح في سيرة الخلاوي أبرز شعراء النبط على الاطلاق وممددوحه منيع بن سالم ويقول اهل الادب والتاريخ لولا الله ثم المتنبي لخفي ذكر الحمداني ولولا الله ثم الخلاوي لخفي ذكر منيع بن سالم , فكما يعلم الجميع هناك حقبة من تاريخ الجزيرة العربية لاتزال معتمه بعض الشيء تحتاج منا نحن أبنائها ان نتتبع تلك الرسوم ونقف على الاطلال لنحفر بالعمق خلف كنوز الادب في جزيرة العرب