بديت باسمك يامزيل همومها = رب الخلايق ناصرٍ مظلومها
علام بالظاهر وما اخفاه الضمير =سبحان عازل ليلها من يومها
سامع دبيب النمل في جنح الظلام = منشي بملقحة الرياح غيومها
محصي جميع الخلق مجري الكاينات= عسى علينا نعمته يدومها
الله يعز الدين واللي له يغار= ويعز عاهلنا الفهد قيدومها
ويهدي لطرق الخير كل المسلمين= عن فتنه الدنيا وكثر صدومها
وخلاف ذا تحية للحاضرين = ماشرف السبار روس رجومها
ذي ندوةٍ يفخر بها من فيه روح=ويثنى على قايم بكل اقسومها
واختص منشينها ولد عبدالعزيز=ولي عهد المملكة زيزومها
عبدالله الضرغام شيال الحمول= مفراصها بخاصها داهومها
وسلمان لى عدوا صناديد الرجال =أمير نجد علاج صعب اسقومها
أبنا الذي لم الشمل بعد الشتات= وخلى الجزيرة يرتزق محرومها
عبدالعزيز اللي جمع دنيا ودين =خيالها حمايها ملحومها
الخيل تبي عقب فرقاه الطراد= والسيف خبي في يدين قرومها
حر تسلسل عارفينه من نزار =الله يلومك يامصقر بومها
للي مكذبني على قولي شهود=ينشد سمان الهجن وين شحومها
وينشد محناة الهنادي والرماح=والصمع عمن طاح عند خشومها
حارب وحيرب دون حكم له وابوه =صفى مشاريها وزال همومها
ياوارد بالقيظ مطوي الطوال= الصوح دلوك لايقص أوذومها
يامن حض بالحفل واللي غايبين=القدس يلحقنا جميعٍ لومها
حنا عرب ماغيرنا يذكر عريب=اجدادنا ساس السلوم سلومها
عار محارمنا تولاها اليهود= وحنا جميع مهتنين بنومها
أما حصل فعلٍ يشيب بالرضيع=مايحيي المسني نفيض غيومها
عمارنا كالزرع قافيها حصاد=لاقدر الله ماتعقب حتومها
بصدقٍ هلموا ياعرب حل الجهاد=زيحو عن أرض العرب جرثومها
هذي فلسطين السليبه في عذاب= ترضون عوراتكم تزاح هدومها
برجوى صناديد العرب ضد العنيد=متى على خيرٍ يورخ يومها
تشتيت اجاويد العرب ظلم عظيم = والله مايجري ولا في حلومها
الذل مايرضاه ممرورٍ يغار= بيعو عزيز النفس بارخص سومها
مانعتبر بالبل قاسية القلوب=يحن رايمها على مريومها
ترى التترف ما يطول للعمار=والله فلا للعبد عن مسقومها
دنياً رحاها بالخلايق تستدير= ماتنتفع بالفهيم ثلومها
سود الليالي غيبها ماحدٍ قراه= طرما بعلها مايعرف علومها
إلى نشدها عن مرضها ماتجيب= قبل طلوع الشمس تاضع تومها
اما تكاتفنا على الباغي جميع = وصرنا عصا وحد بقو عزومها
كلٍ طمع قينا وزاد الغيظ غيظ= قطع الخشوم ولا انقطاع رسومها
ثقال الحمول إلها اليا ثقلت جمال= تصير عليها لو تحس لحومها
شعوى الحروب الطاحنه تبغي قلوب= ماهي قلوب اللي تعض بومها
من وحد الله مايحيله مستحيل= يوري العدى وسط النهار نجومها
من مات فالجنة من المولى جزاه =والحي ياقف في نحور اخصومها
أهل الشرف والدين يرجون الثواب= من غافر الزلات يوم قدومها
هذا الصحيح وغير هذا ما يفيد=من رضى بالهونا ينال ندومها
ديار العرب كثيرها خلي خراب= ماينعمر لين الحشر مهدومها
كان اعلنوها حرب ملقحة العقيم=في وقتها ما طاوعو لرخومها
الحية الرقطا جثت من دون راس= الله يقدي بالخبيث سهومها
ياقادة الإسلام يازبن المريب= لاتنثنوا ياقاطعين خرومها
لي كبرت القاله وراعي الفكر حار= أنتم دليلة بالدجى منجومها
تفاخت الشوفات ماتنبي بخير= مرض عزيزين النفوس هضومها
وين المدرب وين لباس الدروع=وين المفادي وين هو شغمومها
سريا معرب واستعين بالله تعان =ضد الشريعة طيرو ياهومها
بمصفحات تبرد القلب الغليل= يجلى قديمات الغبون هجومها
يهجم بها شروى الحرار معربين=ماخلى على دار الأعادي حومها
ومدافع يبرى لهن مدرعات= وكتاتيب تملا فسيح حزومها
دهات الرجال خيارها بالمعضلات= ماتنثني لى صدرت مرسومها
ماهمب مثل اللي علقومه ماتثيب=ناسٍ بغر الناس كبر جرومها
بعض الدول لوعاهدت بالله تخون=ماتنعرف صدقانها من قومها
الهرج واجد والفعل مامن حصيل=يابعد رايحة النفل عن ثومها
هيهات ياعصر مضى ليته يعود=ما اهبلك ياباغي الثمر من دومها
ياجرح يا اللي مايداويه العلاج= ماجودها يشكي على معدومها
ماأدري متى بالله رحانا تستدير= على ثفال المنحرف ماهومها
الله على الدنيا وما فيها يعين= دنياً يشيب همها مفطومها
تمسخرت فيها الثعالب بالسباع= والحر شاف الهول من فيومها
ماهوب فيها اللي صريح مستريح = ناسٍ شكت من ضيمها ما لومها
الله لا يجزي ردي الناس خير = مذمومها شرهٍ على محشومها
خانك زمان ضحك لك يابوعسيب= ذبحك شومك يامنقل شومها
الصانفات العاديات المغنيات =قزاك من مساك حس رهومها
ياام الكفول ارعي ودوجي ياحلوب=أهلك تنام وروسها بكمومها
ومن بعد ذا ياأديب نرجع للتراث= ونبحث بسيرة لازم وملزومها
أحيي ركيك الشعر والجزل أهلكوه=أختارو الهزلات عن مدسومها
لولا المجامل بالأداب من كل أديب= ضاعت الشعار في ديمومها
أنخى والوم أهل الفكر وأهل العقول=تبحث وتبدي ما أدركه مفهومها
وين الفحولة اللي تحكم ماتحيف=مامون حكمها على محكومها
وين ابن حابس والعريب ابن مناة=وعامر ومازن وابن كعب زعومها
وين ابن يربوع والأضبط مع ذؤيب=والنابغة فنيوا حماة ذمومها
وذي الأصبع ومن كان له ذكر جميل= يوم القبايل زاحم ومزحومها
وين الفرزدق وين ابن عمه جرير= وين الشهم غيلان مرذي كومها
حنا هل الحكم المشرف في عكاظ= وجل المنايا من تميم سهومها
الى رقص شيطانها والضد صال=رماحنا مايعتقه مسمومها
يشهد لنا كسرى وقيصر والوفود= من كل جنس تختلف بنغومها
ذا قول من قوله الى دور صحيح= قبيلة ما ينثني مزهومها
لى قربت رخم الجموع من الجموع = أنشد عربها عن تميم ورومها
وأنشد جموع عنا بالحروب= تنبيك عن قعقاعها صارومها
أفخر بقومي مروية حدب السيوف= قومٍ صعيب ٍ بالحروب هزومها
شهد لهم فيصل وفيين الشبور =تميم وادي بريك يا مضيومها
منا المجدد شيخخ الأسلام الغيور= جلا الظلام اللي بلغ حلقومها
وذريته بعده هل الدين الحنيف= عن رالشريعة ماتزل ختومها
والثاني أهل الجود من عصر الجدود= ربن وذرا من حسته سمومها
وقابوس شيخ عمان فخر البوسعيد=وجده ولد عَمر الندى مرحومها
وأهل الجبل باجا وسلمى يعرفون = وبسدير والعارض ومن بوشومها
وأهل القصيم أفخر بهم عوق الخصيم = لى خايرت ذلانها وصرومها
وأهل الوفا الجبلان درعي في مطير= وعرنة تميم أعران شايل زومها
ومنا الأضبه عند حزات اللزوم= قرينية روس الرباب نتومها
وحويط بن سامي ومن يعزى عليه= فرسانها يشهد لهم مشكومها
وأهل العراق وبرفارس والخليج= ومصر وتونس والديار عمومها
وترثة عبادان آل تميم أهل إيران =يشدون لى حل القضا ملمومها
وفي حضرموت لنا جموع يرهبون= ديارهم صوب الجنوب يمومها
ولنا بفلسطين وبالأردن عزوتين= منهم شكا الطفل الرضيع يتومها
حنا مضر نصطي الى هاب الذليل= صفوة نزار ومعد ياماهومها
منا عتيبه والزعوب ابنا سليم= وهذيل لى عد الفخر ونعومها
والمالكي والباهلي زبن الدريك= والخالدي زند الحروب سقومها
واشراف مكه والعداوين وثقيف=اشعارنا جزل الشعر منظومها
نعرف إلى قرب حفيف من حفيف=لى زججت رقط اليايا سمومها
نرسي كما ترسي مرساة الجبال= جبال مرسيها الولي بخشومها
نارد على شعث النواصي مانهاب=خيل لنا طاعت قبل تعلومها
عدنان مثل طويق شم يزبنون =منا الإمام وغيرنا مأمومها
كم جاهل مغرور زم الشم طول=تاخذه قومي في وسيع حلومها
وقحطان عصمان الشوارب نسل هود=صقورٍ مراقيب العلا ترومها
وباقي القبايل مثلنا ماهمب دون= تعرف بحومات الوغى بقدومها
هذا ويا من له ينمى راس مال= انذرك عن حوت البحر لاهومها
والحكم له ثم لوسود السعود=صفوة ربيعة فرعها وجذومها
ليوث العرين اللي رعاياها ليوث= شعبٍ يزور ديار جاير قومها
تمت وصلى الله على سيد الجميع =الهاشمي ضد الكفر معصومها
والآل والأصحاب موفين الذمام =ماهل وبل من سحاب وسومها