البارحه ماذقت ماذاقو الناس
مجمع ٍ بالصدر هم وهواجيس
كني عليل مسهره ضرس الاضراس
والا فطيم فاقدٍ لذة الديس
لادك في قلبي من الهم هوجاس
حطيت فوق النار زين المحاميس
وحمست مايجلي عنا الهم وعماس
بنٍ من النيبار يجلا الحواسيس
يشبه خضاب منقشت زرق الالعاس
اللي تخضب كفها بالقراطيس
اسهر علي الدله وماصب بالكاس
وتاخذ علي هجوس بقعا مراويس
اسباب من عينه كما عين قرناس
عين الحرار من الوحوش القرانيس
تنهظت للجول بالقفر غطاس
وعقب الطرب حطت عليهم نواعيس
لا وهنى من هرجه عقب الارماس
علي ظهور مرودمات النسانيس
هجن ٍ لفا من يم ديرة بني ياس
بواطن تزها جديد الملابيس
يشدن ريمٍ ذار من حس الاوناس
بيدا بداويه عليهن عواسيس
اخذلهن مع جلعد الدو مرواس
من حس صفق مضوربات النواديس
يلفن علي كنها ضبي الاطعاس
عندي ولو تلبس ثيابٍ هداريس
وذاك لو يلبس جديدات الالباس
كن الذهب فوقه نحاس وتفاليس
اهرجه عقب المغيبه من الراس
ماهو بحبرٍ فوق صاف القراطيس
واقول له ياصاحبي عدم الاجناس
خذ هرجة اللي ماهرجلك بتنجيس
وياك تاخذ هرجة اشرار الانجاس
اللي تودى الهرج مثل الاباليس
وصلاة ربي عد ماصلو الناس
علي تبيٍ سيس الحق تسييس