من قول الشاعر عبد الله اللويحان والمناسبة ان واحد من اصدقائه سأله وقال : يالويحان وش كثر عندك من الحلال ؟ قال لويحان عندي ما ساتر لحالي .... فلزم عليه صاحبه فقال لويحان : لو حضي بالريال مثل حضي بالرجال كان انا اليوم من أغنى اهل المملكة وقال لويحان :
أنا صديق الطيبين المناعير = اللي لهم كسب المعالي اعشاقه
حضر وبدو نطاحة الشر والخير = صادقتهم واخذت منهم صداقه
حلالة المشكل كبار المخاسير = ياسعد منهم له عضود ورفاقه
زبن المخيف الى رمته المقادير = بالجاه والا المال والا الحماقه
وآخذ من ارياهم قوي المشاوير = والطيبة ماهيب منهم شفاقه
مانيب اصادق مايلين الدناقير = عيال العفون من الخيوط الدقاقه
اللي مجالسهم نميمة وتعيير = مالي بهم من فضل ربي علاقة
فضل من الباري حسين التدابير = مانيب للاصحاب قطاع ساقه
ورزقي على اللي بالسما ينهض الطير = يكسر على الملواح عقب انطلاقه
ودنياك تمضي بين ورد ومصادير = قد قيل قبلي ما بها راس طاقه