[طوفـــان]

بسم الله الرحمن الرحيم

مساكم الله بالخير والعوافي وكل علمٍ غانم


:: قصيـدة ::

متواضعة رغم طرح الكثير والكثير من الشعراء قصائدهم قواهم الله، تضامناً ودعماً للشعب السوري الحر ،،،

أقول ،،

الصبر ياهل الشام والوقت دوار=لابد مايكسى الحُطام الخضارا
الظلـم له يـومٍ وللحـق نصـار=وللدين عزه والله المُستجارا
طالت يدين الفُسق واستاسع الثار=والجور خاصم في وضوح النهارا
روس النفاق كبار بانت وهي كثار=ياوين حاصدها بحزم وجسارا
ياوين من يرجِع لنا حرمة الدار=ياوين حاميها رعبها الدمارا
شمس المهابة روحت خلف الاستار=من عقب ماهي بازغة ماتدارا
ياهل العقول النيرة ياهل الافكار=ياهل الحمية والشرف والوقارا
شدوا وثاق البذل من فوق الامهار=وسوقوا جحافلكم بكل اقتدارا
وياحاكمين العُرْب والله محتار=مذهول واضرب باليمين اليسارا
ليه التهاون والتعامي بالانظار=والدين واحد والجسد والشِعارا
الى متى والحال في جرف منهار=صرنا سوات المرتعد وسط غارا
قبل امس في غزة غدا ليلها نار=صهيون سابيها عيانا جهارا
حتى العراق اللي تعزوت بالاحرار=راحت وهي تبكي قهر وانكسارا
واليوم دور الشام ينخر بها فار=فارٍ يُقاد وخلفه الفين فارا
صرنا نسايرهم ونقبل بالاشوار=والجرح مايبريه جلسة حِوارا
ماتجتمع ياخوان نيران وامطار=وماقد خبرنا بالصخر من ثِمارا
إن ماتحدنا ضد باغي وفجّار=رحنا مثل من راح وأصبح أثارا
تكفى يابو متعب ترى صدنا عار=أوقد فتيل الحرب واقدح شرارا
اما نعيش أحرار ونبيد الأشرار=ولا ممات العز خير انتصارا
هذه مشاعر يعربي قال الاشعار=من ديرة التوحيد دار العمارا

وسلامتكم ..


أسأل الله أن يفرج كربتنا وأن ينصرنا على النصيري عار الشام وأن يُرينا فيه عجيب قدرته وأن يجعله عبرة لكل معتبر ، وأن يتقبل موتانا في الشهداء ، اللهم آمين اللهم آمين ،،


والسلام عليكم ورحمة الله وبركاته