هذا زمان اظهر حلالك يعاديك=وتقوم له من عقب هذا تسول
لا قمت تذكر ما مضى من حسانيك=في حال الأول قال الأول تحول
حنا عيال اليوم عطنا ونعطيك=نقد بنقد وخل ما فات الاول
ذا اخر زمانك بتشوف المماليك=قامت ترفع والضواري تحول
وعن الـمعاني اقر ذا البيت يكفيك=ركب الرديف وراعي الكور حول
وأهل الغنا والجود صارو صعاليك=وأهل الفقر والبخل قامت تمول
يا ما تشوف من العجب ما يعنيك =إن متع الله في حياتك وطول
اكـذب وتلقــى لك مع الناس تسليـك =وإصدق وتتــرك لو تكون السِّموّل
فالحُر ما ضاقت عليه المساليك=لولا الضرورة والحرم والمعول
ولا يغرك كل زول يحاكيك=تحسبه صديق وهو قطوٍ يغول
يضحك بوجه لك وبالنصح يوريك=وهو على العـثره يرز المطول
وأحذر صديقك قبل تحذر معاديك=أن كنت عاقل فاليالي تدول
حسب لدرب ما مشوا فيه اهاليك=فالمرجله بالقمبزه ما تظول
اقنع بقسم الله وما كان معطيك=وبالماقف الي يتعبك لاتطول
وترى صديقك من بنفسه يواسيك=ويواصلك في مرزقه والمخول
ويسر وجهه لك وأن سمع كلمة فيك=واذا ضربت قال تنصار الاول
وأصدق صديقك ما حصل في تمانيك=فلا تخيل لك جهام تزول
تحسبه من هو بواهج القيض يسقيك=وهو سراب في هجير تبول
خف الأله وعامل الصدق ينجيك=في ساعة يخزى بها من تقول
كم صادق ينجى بضيق المساليك=وكم كاذب اومأ كراعه وشول
ثم أطلب الله مثل ما قيل في ذيك=يفرجْ لنا في ذا الزمان المهول
أسمع نصيحت واحدٍ ما يهفيك=واعبر على مركب زمانك ونول
وأحذر على نعمتْك من فعل اياديك=ترى النعم عند المعاصي تزول
وأزكى السلام التام من غير تشكيك=عليك يا تالي الرسل وانت الأول