خل الهوى
خل الهوى ياللي عليك الهوى دار=عاكس هواك ودار بالوجه شلي
ماعاد تنصى لو تخايـر تخايـار=سفينتك ماعـاد تقـدر تعلـي
وينك ووين مدني اليوش باشـار=عدل هبوبه والشـراع متعلـي
ليت الليالي الغبر يعطنـي إنـذار=كان أتودع من ليال مضن لـي
لاشك راحت هاك الأيام تذكار=تذكار وإلا ذوقهـن ماحصلـي
واللي فقدت من الحلاوي والأثمار=مادامت لغيري لجل تتصـل لـي
ياالقلب هود واسترح صار ماصار=اللي مضى ياقلب خلـه يولـي
اليوم لو تمشي على هاك الآثـار=تراك مثل اللي مشـى مايدلـي
يوم إن لي في موسم الحب مقدار=وأنا لي الوقت العقيـد متحلـي
ياما تبادلنـا المحبـة بالأسـرار=مع كل مجمول كلامـه يسلـي
وياما عنـى للـي حوالـي زوار=مـن جيتـه جيراننـا مايملـي
يكسبه بس المطالـع بالأنظـار=واشارة منها الحشـا يستخلـي
واليوم شفت من المحبيـن تغيـار=مجيهم ماهو غـلا حشمـة لـي
حتى الحبيب اللي لناكان مختـار=مجنب غيري وأنـا صافـي لـي
اليوم أشوفه عقب ذاك الوفا بـار=الله وأكبر ماأسـرع انكارخلـي
بدل حبيبي مشرب البرد بالحـار=وأشغل فواد من عنـاه متخلـي
وخلى طبيب الحب بدواي محتار=ياوين أبا ألقى للمحبة دوى لـي
والصاحب اللي بدل الحلو بأمرار=يمكن جفاه وصدته خيـرة لـي