الله يكفـي شـر ميـلات الأيــام = وليلٍ غطا الضلعان يوقـظ نيامـه
العام وسنيـن عديـده ورى العـام = موت الإهانـه صايبـاتٍ اسهامـه
سنين خلت راعـي الخلـف قـدام = الحر قـل مـن الدبـور احترامـه
وقتٍ بـه المخـدوم للخـدم خـدام = بالناس اخس الناس يسمـع كلامـه
النذل مفطـر و الأجاويـد صيـام = عصـرٍ ترقـت بالنمايـم لئـامـه
هذا زمانٍ فيـه مـن طـاح ماقـام = يهلك ظمأ والمـي موجـود أمامـه
دنياً كفا الله شرهـا كلهـا أوهـام = مسكين من طاريه هيـض غرامـه
المستحي مـن حيفهـا ورده حيـام = والمفتري تشـرب قـراح حيامـه
يادار وين مقطعة روس الأصنـام = أهل السيوف الحدب وأهل الزعامـه
أخبارهم نسمع بها مثـل الأحـلام = الكـل منهـم بالـيـاتٍ عظـامـه
وجدي عليهم وجد مضهود الأيتـام = أبـوه ميـت ومتوليـه ضـامـه
يا لايمي في ذم الانـذال مـا نـلام = اللـوم يلحـق كاسبيـن المـلامـه
خطو العرب بالمجتمع مثـل النعـام = فيهـم سخافـاتٍ وفيهـم غشامـه
تعيـف ماتلقـا للأسـرار كـتـام = دراشـمٍ كــلٍ بـدبـرة مـدامـه
يابايع الليمـون مـن كـم الاقيـام = الليـم سعـره زاد مـدري علامـه
خلايق ماعـاد تحصـى بالأرقـام = أبا العيـوب اليـوم هبـت ولامـه
الخابـر الله عالـم مـا بالارحـام = منهم رجال الحرب عنـد التحامـه
هامة مضر حنا ليـا زام مـن زام = انشـد جمـوع مسيلمـه واليمامـه
لا فللت يوم اللقا خضـر الاعـلام = ماغيرنا في مارثـة مضـر هامـه
الطاغي الباغـي ندوسـه بالأقـدام = من غـره الشيطـان حنـا كعامـه
رجالنا دايـم علـى راسـه وسـام = يومٍ كثير النـاس ضيـع وسامـه
ماهي هرابيـدٍ علـى قـرع دمـام = غنا بها المملوك يرضـي عمامـه
ياعالمٍ فـي جوهـا طيرهـا حـام = تبغي السلامه مار مامـن سلامـه
لابد مـا يحكـم عليهـا بالاعـدام = فـي ساعـةٍ كـل يلبـس خطامـه
سهيل جنح الليل نور علـى الشـام = ياخارفين الغرس قـرب صرامـه
عقب الهدير وزوم نفـسٍ ودرهـام = رغى البعير اللـي طويـلٍ سنامـه
تدبيـر خـلاقٍ لأسـرار عــلام = دار الفلك لك زرفلـي يـا نعامـه
ماطاب لـك يالادمـي ذاك مـادام = لابد مـن قبـرٍ وحيـش ظلامـه
أوسع اذراع فيها تكفن مـن الخـام = وايحاسبك مـولاك يـوم القيامـه
الـدايـم الله واحــد مـاحـد دام = كـل مـرده لـو بقـى لانعدامـه
أكبر خطا وأكبر غلط وأكبر اجـرام = خلط الحلال اللي حـلال وحرامـه
ترى الجهل لبيوت الاجـواد هـدام = يتيـه دايـم صاحبـه بالمهـامـه
كم جاهلٍِ حطـوه للسطـح مـرزام = الاتبخنـتـه لقـيـتـه فـدامــه
ياصاحبي لا يخدعك كبر الأجسـام = مافـاد بالخرتيـت كبـر الجسامـه
المشتبه صاحي تحطه لـك احـزام = محزمك شيال الفشق فـي حزامـه
تراك في وقـتٍ هلـه فيهـم هيـام = من طاح يوكل مادري بـه جلامـه
الا توطـاك الدهـر رزوا اعـلام = وحطوا على رجم التشمـت علامـه
امخادعيـه تاخـذ المكـر بالـزام = بهم علـى الدنيـا الدنيـه بحامـه
جيـلٍ بعضهـم للمفاريـد مريـام = من ركب كور العاج عاف المسامه
الحر لامن شـاف مايكرهـه شـام = والبـوم مالـه نيـةٍ عـن هدامـه
ياللي بسـوق المجـد للجـود روام = انذرك عن بيت الـردى والرخامـه
احرص على الدسمه إلاصرت سوام = والا الهلامـه ماتفيـدك هـلامـه
خلك على طرق الجزيـلات جـزام = مايكسب الهزلات من بـه شهامـه
الغرسـه المستنسلـه ذات الأكمـام = أحرص علـى تلقيحهـا ياوسامـه
تلقا نماها عنـد تنكيـس الاعـلام = إلا اختلط وبل الرصاص وعسامـه
ياعارف الحـا لاعدمنـاك والـلام = الخبز مبطـي طافـح فـي ايدامـه
يذكر كبار الحوت بالبحـر عـوام = واللي يحرس العيس غلـق دوامـه
الذيـب غـب حيافتـه للغنـم نـام = يامواسله وش جـاه طـول منامـه
ياحارس البستان عن كـل صـرام = من طاول اطول منه طويت خيامـه
حجـام سابـاطٍ تــولاه حـجـام = شهادتـه فـي دراستـه للحجامـه
ياضامر السرجوف يامرودع وشام = عليك من شـارات سـاره علامـه
ريميةٍ ترعـى نواويـر الاوسـام = بالعنـق خناقـه وبالخـد شـامـه
بالليل صور لي خيالـه بالأحـلام = عرضه نقـي مافـك زولٍ لحامـه
بنت الذي جده على الحـرب مقـدام = وأبـوه مـروي بالملاقـا حسامـه
ليثٍ بطل علـى الطوابيـر هجـام = إلاغطـا الشـم النوايـف كتـامـه
شم عن ردي الناس ياصخيف الاقدام = ياكامل الأوصاف زاهـي زمامـه
ذا قول من قيلـه ينشـف للأقـلام = من كادي اصلي ومسـك ٍ ختامـه
هذا وصلى الله علـى سيـد الأنـام = محمـد المختـار مامطـر غمامـه