[الطائر المهاجر]

منازل كن الرياح عصفتها=ما عاد يلقى عقب اهلها علامات
كن السنين الموحشات سهجتها=ولا عاد فيها للمقيمين لذات
عيني بعد طول الفراق عرفتها=وتذكرت وقت مضى فايت فات
عين مشاهي ودها خالفتها=وصادف لها في بعض الايام ميلات
وقت رماها والمصايب رمتها=بافراق من يضحك ولو قلت له هات
روحه بذلها لوهله ما ارخصتها=يتبع حسناته علينا حسانات
اخذ من الجما العنود ارقبتها= وبه من حلاياها عيون ولفتات
حورية كن المها مرضعتها=وكنه يجريهن عليها قرابات
كن الغزال ام الغزيل غذتها=العفو مالي من خطرها سلامات
أن سلهمت بعيونها واطرقتها=منهن سهوم الموت للقلب عجلات
يمناي بالكف الشمال اصفقتها=واحسرتي ضيعت روحي وحاجات
نفس مخاليب الفراق خطفتها=تاهت بها ما بين الأحيا والاموات
عن من نوده بالفراق ابعدتها=الأمر لله والمقادير عجلات