ابيات للشاعر الكبير/ محمد الاحمد السديري رحمه الله
ان جا ينادمني وضيعن من الناس = صديت عنه وقلت منتب نديمي
ماهوب كبرن وكل ناسن لها اجناس = وعندي عزيز النفس دايم حشيمي
للكبر والله ما توشحت بلباس = بكتب التواضع ناجح بتعليمي
انادم اللي رفقته ترفع الراس = وياقف معي دايم بوجه الخصيمي
ان كبرت القاله والارياق يباس = يظيم عدوانه ولا يستظيمي
وعندي ليا شفت المناعير جلاس = انا لهم بايات فكري كليمي
ولاقارب الخايب ولا كل بلاس = اللي على نقل النمايم فهيمي
نشدتني تقول بالقلب هوجاس = قلت اي نعم مافيه حين سليمي
يابومحمد كن ماعندي اوناس = اليا خفق فكري بشين عظيمي
اغيب كني وسط ظلمات الادماس = واناجي الرب العظيم الكريمي
اناجي الخلاق قطاف الانفاس = الواحد اللي فوق عرشه مقيمي
عزالله اني بالهواجيس غطاس = وعزي لمن هو في بحرهن يهيمي
يا بندر الجبرين يا معرب الساس = اخلصت لك حيثك حليمي
العالم الله ماهرجنا بالاجناس = والله بما يخفى فهيمن حكيمي
ولادن في جلساتنا حافة الكاس = ولا نخوض بكل هرج ذميمي
واللي نوده قطعت عنه الارماس = ذكراه مثل احلام ليل بهيمي
وقت النضا قفا وقفن الافراس = وحتى زهور الورد صارت هشيمي
والنمر مخلد عقل ماهوب فراس = والبوم عقب الذل صبح عديمي
وديك الدجاج معلق فيه الاجراس = والصقر في صكات وقته سقيمي
وابوحقب حصل بالايام نوماس = الحر غاب وصار عقبه زعيمي
وين الرجال مروية كل عباس = اهل المهار اللي تعط الرهيمي
اقفوا كما غيم تقفاه نسناس = ولاحدن بهالدنيا مقيمن مديمي
كم واحدن في لجة العيب غطاس = يفوت عمره في ظلاله بهيمي
من الذهب لوهو خزن طرم الاكياس = جن من كريم وحرم منها اليتيمي
بواسطة منيع