البارحه ماطبق الجفن بالنوم
كثرت هواجيسي وزادت همومي
كني رضيعٍ عن حلا الديد مفطوم
والا غريبٍ حط في حبس رومي
حطوه في وسطه وهو كان مظلوم
لاسلم من سوه ولا داس لومي
ما كتب لك يالعبد باللوح ملزوم
ان ما وصلته جاك لازم لزومي
وانا بدبرة فارض الحج والصوم
راضٍ بتدبير الاله الرحومي
ومن عقب ذا ياراكبين علي كوم
حراير فوقه سوات الرجومي
من فوق مايقطع زما كل مزموم
دوجٍ يلين قاسيات الحزومي
الي اشتغل يقعدك حسه من النوم
مثل الرعد في مدلهم الغيومي
خله مع السكه ولانته بمليوم
لاصرت في ممشاك راعي لزومي
يمشي عقب باكر وباكر مع اليوم
مشي الرخا ماهو بمشي امهمومي
ملفاك قصرٍ فيه للجود ميدوم
داف الشحم تلقاه لوهو معدومي
خوالي اللي طيبهم دايم الدوم
بدرب المراجل ماعليهم اثلومي
في قصرهم ملفا للاصحاب والقوم
لاشح في ماله ردي العزومي
سلم عليهم قبل تعطيهم علوم
سلام احلي من حليب الردومي
واللي بقلبي داخل الخط مرقوم
مني اليهم بالسلام مختومي