يسند على الأمير سعود بن محمد
ياعذلين القلب لاتمحنونه=خلو عصى الراي ياصل مناهيه
بالعذال ياعذال لاتجرحونه=أخاف من نصح عن الرشد يعميه
القلب مايرضى أنكم تنصحونه=لاتنصحون القلب عن حب غاليه
حب المودة صايبه تجهلونه=مامنكم اللي ذاق مره وحاليه
اللي يود القلب ماتفهمونه=وجرح الموده مابكم من يداويه
جرح المودة جايرات طعونه=وين الطبيب اللي يعرفه ويبريه
ياليت طّراد المها يذكرونه==وياسعود قّواد الجوازي يحاليه
عسر على طلابه الي يبونه=يعطي البياح وشرد الصيد تتليه
عليه قلبي كاثرات شطونه=ويلوج وسط الصدر من حر كاويه
قلب الخطا ياسعود ياعظم كونه=يكفيه من جور الهوى ربع مافيه
الزين لو تبعد علينا ضعونه=يكبر غلاه وكن عيني تراعيه
ياجب علي اني عن الشك أصونه=وبالهرج عند الناس ياسعود ما اطريه
أدري عليه من العدا يشمتونه=وأخاف من هرج يضره ويوذيه
لا واهني أقرابه اللي يجونه=وأنا الى جيته عدوى حواليه
عليه روحي بالفواد مغبونه=وفاتن ثلاث سنين والروح ترجيه
ياسعود غني لابته يبعدونه=ناس تحلف به وناس تناحيه
البغض وسط قلوبهم يضمرونه=وفي مقرن الحجان تظهر مواريه
ويقفون السلم دوني ودونه=وعندك خبر قلب تولع بغاليه
أخاف من حبل الرجا يقطعونه=واشرب عذاف السم من كدره وصافيه
صبرت لين الصبر فاتت حتونه=واليوم كظم الصبر ماني بقاويه
عزالله ان الصبر غبن ومهونه=وأن كان ممدوح العواقب لراعيه
ياسعود فعل الخير ماتفعلونه=وتفزع لمن ضاعت حياته وتنجيه
ياسعود مدولي حبال المعونه=ترى رفيقك جاير الحب طاويه
أنت الذي راجيك تقضي ديونه=والليل الاسود ماتعوقك ضواريه