كشكول ابومياس

[ابومياس]

مذكرات طفل


الحلقة الحادية عشر




هلا بالجميع طولنا عليكم بس رفيقنا انشغل عنا اليومين اللي راحوا والان

عاود الاتصال بنا وواليكم ماحصلنا عليه :

في احد اجازات المدرسة الصيفية جانا عمي من الرياض

هو والعائلة وكان معاه من ابنائه ولد وبنت الولد دلوع

والبنت بريئة مره كان عمرها اربع سنوات تقريبا

وانا كان عمري تسع سنوات المهم اللي لفت نظري

للبنت لبسها كانت لابسه فستان ابيض قصير وهذا اللبس

ماعمرنا شفناه بالقرية ولابسه شرابات بس ماهم مثل شراباتنا

ذولا طوال مره ( بعدين عرفت انها هيلا هوب ) وكان شعرها

ناعم وسايح اعجبني شعرها تمنيت ان شعري يصير مثل نعومة

شعرها لان شعري مفلفل مو طبيعته من قل ما يمشط

وماعمرنا شفنا الحلاق الحلاقة بالبيت بمقص المنزل

تحصل راس الواحد مبقع جزء رقم واحد وجزء رقم خمسة

يعني تشوف راس الواحد من بعيد مثل لون البقر الهولندي

الابيض والاسود 0 المهم نعود لبنت العم ما اخفيك انها

اعجبتني بس ايش حد الاعجاب ما ادري 0 يمكن شكلها

الناعم لبسها الكشخة وانا كنت لابس ثوب صنع منزلي

مدري كيف هو قايل قدام اطول من وراء 0 كم اطول من كم

يعني شبهه 0 والبنت من نعومتها ورقتها يوم شافت اخوي ذبح

الخرفان قامت تصيح ماهي متعوده على الوحشية وانا يوم شفتها تصيح

ضاق صدري بس هناك شي مهم الآن وهو نبغى نشوي الكلاوي

والقلب عاده مصاحبة لازم نشوويها على طول وناكلها 0

اما اخوها كان ملكع ماهمه شي حتى كان مبسوط على الذبايح

وشاف خروف هرفي صغير وجا لاخوي وقال هذا لازم تذبحه

قال اخوي هاتوه وذبحه 0 طبعا احتفاء بعمي وعائلته

وكذلك سوف يجتمعون اهل القرية لحظور المناسبة0

كذلك وبنت العم كانت معجبة في العصافير واصواتها في الصباح0

راحت ثلاثة ايام تقريبا مده جلستهم عندنا وانا لم يفارق

مخيلتي فستانها الابيض القصير وشراباتها الطويلة وشعرها الناعم 0



وهناك حدث مضحك بالمدرسة 0 يقول : كنا بالمدرسة ولم يكن هناك

اهتمام باللبس الرياضي يعني نلعب بثيابنا 0 وفي مره تعين لدينا مدرس جديد

وكان متحمس فقال لنا لازم كل واحد يجيب لبس رياضة 0

المهم انا واخوي تحمسنا للفكره والله نذهب الى بقاله على الطريق

الذي يصل بين مدينتين وكان عند البقالة محطة وقود المهم شرينا اللبس

واللبس اللي شريناه بيجامة شتوية لونها بني 0 وانت تعرف البيجامة الشتوية

تكون من نوع البدي الضيق 0 المهم من بكرى لبسنا البجايم انا واخوي مطقمين

طبعا من تحت ثيابنا 0

ويوم جينا المدرسة وكل الطلاب يقولون لنا ياحضهم شروا لبس رياضة

المدرس اكيد يبغى ينجحهم 0 وخذ يامدح باللبس وانا واخوي

رافعين روسنا فوووووووووق من قدنا مافيه احد بالمدرسة

جاب لبس بجايم اقصد لبس رياضة مثلنا 0

المهم جاء المدرس وقال جبتوا لبس رياضة كل الفصل قالوا لا الا انا واخوي

ايوه جبنا اللبس قال ممتاز ووانتم لازم تجيبون لبس مثل زملائكم

ياسلام عليكم خلاص انتم درجاتكم كاملة 0 والان بس انتم اللي تلعبون

اما اللي ماجابوا ماراح يلعبوا معكم ابد 0

حنا متشققين من الترفيع 0 قال الاستاذ يالله ياشطار نزلوا ثيابكم وتعالوا للملعب0

والله ننزل الثياب والمدرس بالملعب والطلاب محرومين من اللعب

وكلهم يقولون ياحظهم ياليتنا جبنا مثلهم 0 المهم نزلنا ملابسنا وطلعنا من الفصل

ورحنا للمدرس ويوم شافنا طلعت عيونه وشوي يوم قال لنا فصلكم فصلكم

الله يفشلكم لعنبوا ابليسكم مطقمين لي ببجايم انقلعوا للفصل 0

والله ونرجع انا واخوي وحنا طايحه وجيهنا دخلنا الفصل والطلاب مايدرون وش السالفة0

شوي يوم جاء الاستاذ قال للفصل من يبي يجيب لبس رياضة كل واحد يقول

انا ابغى اجيب مثل لبس فلان وفلان يوم صاح المعلم وقال لالالالالالالالا

مانبي لبس فكونا الله يقلع هالوجيه 0

ومن بعد ذيك البجايم مالبسنا لبس الرياضة الا بالمتوسط0



( يتبع )