ديوان مرشد البذال

[الطائر المهاجر]

قصيدة لمرشد البذال يناجي بها احد ابنائه الصغار أثناء مرض أمه



الورع عيا لا يوافق علـى النـوم=قـام يتهشـم ويتـزايـد عويـلـه
ادوج به وسط الدكاكيـن واحـوم=ادور اللي يشتهـي واشتـري لـه
واذا نشدته قـال ماعنـدي علـوم=يقول ابي امـي والسوالـف قليلـه
مالي على شيلـه جـلاده وتعلـوم=مير الدهر خلانـي اليـوم اشيلـه
ياعبيد لو أمك بهـا قـوة عـزوم=الورع والله ماعترض فـي سبيلـه
انـك لتلقانـي مكفـي ومحشـوم=وهـي بشوفاتـه بصيـر دليـلـه
ياعبيد انا يابوك ضايـق ومهمـوم=أضحك وفي كبدي سـوات المليلـه
أضحك واوسع خاطري وابعد لحوم=واطلب عسى تالي العواقب جميلـه
شكواي للي يفرض الحج والصـوم=والا البشر ياعبيـد ماينشكـي لـه
ماجور ياللي بالطبيب أمس واليـوم=الله يجيرك جعـل ماهـي طويلـه
ياصاحبي لوكان بالبيـع والسـوم=كان اشتريـك وتشتريـك القبيلـه
لاشك مادبر علـى العبـد مقسـوم=حيل الله أقوى مـا باليديـن حيلـه
ياعبيد أنا يابـوك مانـي بمليـوم=الغبـن غبـن منقضـات الجديلـه
بعض النسا ياعبيد تقنيهـن القـوم=واللي كسبها قـال عنـدي حليلـه
لي صاحب في وقتنا اليوم معـدوم=اليا فقدته ويـن ابـا القـى مثيلـه
عذروب خلي شارةٍ فيـه مرسـوم=يتبع غضب نفسه ويرضـي قبيلـه
والجار يبطي ماشكى منـه مثلـوم=ولاهي علـى رواد بيتـي بخيلـه
ولاهي من اللي تطرق النزل وتحوم=دايم على الفرقـان يومـي شليلـه