تركي بن حميد

[الطائر المهاجر]

سرنا لينبوع الصخا مكرم الجار=اللي سعي لرعيته بالصلاحي

نقاض مايفتل حيول ومكار=يصمت ولو هو يسمع العلم صاحي

جبنا له اللي كنها ظبي الاقفار=مركوب من يروي شباة السلاحي

لافين عنه عند ماقلط النار=ولاني على اللي ينتوي له شحاحي

واقبل لنا بالعلم واقفى الدويدار=وجانا من الفندي جواب قراحي

قالوا جواب لاحكي به ولا صار=الله يعين اهل العقول الصحاحي

جانا بعذر وقلت انا الرب ستار=رزقي على مذري هبوب الرياحي

الرزق ياتي مثل هتاش الامطار=ماله مصك ولاش دونه سلاحي

ان كان تسمع من هل الكذب والعار=ودع بنا رازق خفوق الجناحي

وعدنا على هجن من البعد ضمار=من القفل يشدن النعام المداحي

تودع حصا الرشراش بالدو طيار=الا ونقدع روسهن باللواحي

خذوا عليهن ساعة وقم مغوار=وعن الوعر عطوا بهن السماحي

كم ليلة سرنا على هجن ومهار=نطلب من اللي خزنته ماتباحي

حنا كما حر مراقبه الاوعار=يشهر اليا شاف الجفا عنه وراحي

وحنا مسقية العدو كاس الامرار=ومعشية بالضيق برق الجناحي

ياما نزلنا منزل غب الامطار=السبر ينطش والجهامة ضواحي

كم ذود مصلاح على راعي الاقفار=ناخذ قلايعهن بروس الرماحي

والطرش جاك مشوح عقب ماذار=هج الحلال وغثبروا بالصياحي

وفزوا من المجلس على شبة النار=تناولوا سلم القوايم صحاحي

ولحقوا عيال ماتمالوا بالاشوار=ضارين في نثر الدما بالرماحي

كم خير في مطرد الخيل قد عار=وبيضه عليه يكثرن الصياحي

ياما حديناهم على الميسم الحار=هدات حر تعجب اللي يناحي

وجاني جواد مارج زنيه وسار=بايمان ربع يبعدون المناحي

كان الخطا منكم تقبلنا الاعذار=وان كان منا طالبين السماحي

ما ابيع ديني بالدراهم والافجار=المال يذهب واخر العمر ماحي