تركي بن حميد

[الطائر المهاجر]

خط القلم واكتب لنـا يـا سليمـان = اكتب لنا جعلـك تطـب الجنانـي

جعلك تطوف البيت مع كل الاركان = وتصلي الجمعـه بهـا دور ثانـي

هـذا محمـد مانبيعـه بالاثـمـان =عبـد مطـوع شاعـر مطربانـي

قم كيف الطبخه ترى بان لي شـان= مشتان في شـان وشـان عنانـي

بريه من سـوق صنعـا ونجـران =يعبـا لهـا بالهيـل والزعفـرانـي

نخسر لها لو كان تغلـي بالاثمـان =لا هابها خطـو الصبـي الهدانـي

بصين يبدي فيـه ذربيـن الايمـان = بكفـوف ظفـران قـروم ذهانـي

يا راكب فوق سلسـات الاقـران = فج العضود وساسهن من عمانـي

فج العضود وفخوذهن تقـل بيبـان = وساع الزغون موخرات الثفانـي

ملفاك من يروي شبا مقدم الـزان = عيد الركاب اللي بها الحيل وانـي

شيخ نشا بالطيب من روس قحطان = عاداتهم فـك النشـب والعوانـي

مطلوبكم يا شيخ بـه زود حقـران = والذل ما يرضي عريب المجانـي

لو ان مطلوبكم على مثل ما كـان =خفـت مداريجـه علينـا وهانـي

ادري كلامي عن عـدو وسفهـان = لزازة المجلس وجيـه الحصانـي

للهرج ميـدان وللرمـي نيـشـان = ومفتاح صندوق الضمير اللسانـي