الصدور اوساع والرجل امحدوده

[محمد بن عمار]

اضع لكم هذه المساجله
بيني وبين الشاعره المبدعه // عزوة اخواني ..
اتمنى ان تنال على رضاكم ...
.,
,.
.,

..,,..اتى الصوت من عزوه..,,..


ياوجودي وجد من قفو بذوده=صبح يومً تنخر الحما عظامه
والمصيبه قدم عينه راس عوده=طاح دون البل ..راح الذود امامه
او كما اللي للصفاة اليوم قوده=واغتيال اهل الزعامات اتهامه
ماقبلو حلفه ولا حضرو شهوده=واصدرو حكم اغتيال اهل الزعامه
مفسدن فالارض وعروقه جحوده=عبرةٍ للناس قاموا في عدامه
ذا وجودي وسط خفاقي وجوده=يوم جاء للحزن في وجهي علامه
من عشيرن زاد عن غيره وزوده=بالفعول وبالكلام وبإحترامه
والشجاعه كان حانت ماتكوده=يرعب الاخصام حماي الجهامه
ماحدٍ ياطا حماه ولا حدوده=غير ظيف الله ومقراه الكرامه
ريح حبه في ضميري هب نوده=اتنفس من نسيمه ببتسامه
دون قاصر فالرجاجيل امحدوده=ماحدٍ غيره ملا عيني مقامه
لن قلبي ماحدٍ يقدر يسوده=غير هو ساده وشيدبه خيامه
يوم حبه صال واجتاحت جنوده=قلبي اللي مارضخ لهل الفخامه
قلت مايحكم العرين الا اسوده=يوم ولد الاش تحداه الرخامه
ارضخ لحبه ولو جارت بنوده=ماعليه من هوا النشمي ملامه
والمصيبه ماعتبرني من عدوده=يوم لعدود الهوا ورد حيامه
ولا غرابه يوم حبي مايروده=ماخبرنا الحر يلطف بالحمامه
قلت اسندها بعد طول صدوده=بنت ساس المرجله راع القرامه
مكرم الضيفان من طيبه وجوده=ابلجن ماصد عن ضيفه وضامه
يوم نجد تخاف من ليله فهوده=قاسمين يعشق الليل وظلامه
وبنته اللي فالمزايين امحموده=زين خلق وعز نفس ورفع هامه
شاعره والشعر تقطف من وروده=ماتلد العين في عود الثمامه
لو ماني مهرةٍ طبعي شروده=من زعلكن ياخواتي واصتدامه
وادري ان الشعركن بصمه وجوده=كان قلت بكل ماملك من صرامه
ماخلف بخوت فالشعر وردوده=غيرها من جنس لباس اللثامه
جعلها تسلم من العين الحسوده=جادلٍ قادت شعيلان بخطامه
جاك قافي والحشاء زادت لهوده=فيه حربٍ كنها حرب الرغامه
من عشيرن فالحشاء ثور فروده=وشوفته هي غاية القلب ومرامه
لاعشقت اعشق ولا عندي بروده=قامت بصدري بعد غاب القيامه
جاك قافي وانتظر منك ردوده=ياعسا من ردك احضى بالسلامه

..,,.. وكان الصدى مني ..,,..


نوّر اربوع الهجوس وهب نوده=وانثنى غصن القوافي للزعامه
يوم عيّنت القلم قايد يقوده=يطبع ابوجه الورق اجزل علامه
والقصيد اصبح ترى مودي بموده=يحتمي بي لا بغى عزّة مقامه
لاعني من ضيقة الوقت وصدوده=فيض من جور الكدر ويّا الندامه
الصدور اوساع والرجل امحدوده=تسلك ادروبن تجي منها مضامه
والمضام اللي يصفقها خدوده=لا يساوي راسه ابراس النعامه
قوم فزّ اليوم ياوجه النكوده=لا تقابل خال همّك او عمامه
لا بدا بك ضيم همّك لا تزوده=دوم خلّك رافعٍ للعزّ هامه
لا تقيس ازنودك اليوم ابزنوده=بعض عرضان المناكب كالغشامه
جاك من فيض القوافي ياودوده=قافن ايقنّد مطانيخٍ نشامه
مرحبا في برق شعرك مع رعوده=يوم جاني تالي الليل ابظلامه
جاي هاجوسك يبيّن لي ضهوده=وابشري باللي تخفّفلك الآمه
ابشري يابنت عودٍ فاض جوده=بنت رجالٍ علا طيب وشهامه
بالكرم والعز يامكثر شهوده=شيخ قومٍ سعد من ياطى رخامه
شاعره تاطى على الكايد تكوده=والجزيل اليوم قلّدها وسامه
تحكرين القاف ترقين ابسنوده=ما يهمّك كلّ حاسد وش كلامه
ارحبي والقاف فكّينا قيوده=ما يعوق القيد لو زادو لحامه
هاجسي دامه نوى يحشد حشوده=ماحدٍ يقدر على كربة حزامه
ما يهمّه كلّ قولٍ به نقوده=ناظره ما لدّ غير اللي أمامه
اسمعي والهرج شيّدنا شيوده=والغرام اليوم صدّينا سهامه
يوم قلبك صابه العشق وجحوده=واجد اللي من محبّتهم يتامه
ياكثر ما يجحد العاشق وعوده=مانقول الا الله ايجيب السلامه
الغرام احلام والدنيا زهوده=والعشير اللي دفن قلبه هيامه
لا يفكّ احبال بالعشق امعقوده=مايفيد الحبّ والشوق ووئامه
غير خفّاقٍ نما بالحب عوده=مثمرٍ بالوصل مع زود احترامه
دام قلبك بالهوى باحت سدوده=عزّتي لك يوم شدّيتي خطامه
يوم جيتيني من العشق امهدوده=تطلبين العون منّي في غرامه
الغرام اليوم مامنّه مفوده=عايفينه مانبي نعرف نظامه
هقوتي بك بالهوا بنتٍ رشوده=دام قلبه صدّ جعله للعدامه
لا يهمّك صدّه وقلّة ردوده=سمّح الله درب قلبه في مرامه



السلام عليكم ...

الله

الله

الله

ياسلام عليك وعلى عزوة
وسلمت يمينك ياخت الرجال
صوت وصدى رناااااااااااااااان
تحياتي لشموخكن
محمد بن عمار