كشكول ابومياس

[ابومياس]

مذكرات طفــل


الحلقة الثامنة


عدنا لكم من جديد لنتابع حديث صاحبنا فيقول :

بعد عودتي من منتجعات خوالي وقضاء برهة من الزمن بها

وتغيير اللون اقصد الجو 0 عدت الى قريتي وبها اكملت بقية الاجازة

وبعد الاجازة المدرسة << كاني جايب شي جديد

بدينا بالدراسة والان انا بالصف الرابع وفي هذا الصف بالذات حدثت قصة

بطولية لايقدم عليها الا الشجعان وقصة هذا الحدث هي :

كان عندنا في المدرسة اربع معلمين ثلاثة شبه مواظبين على الدوام اما الاخر

فننا لانراه الا نادرا يعني مثل مايقول المثل ( بالسنه حسنه ) وكان يدرسنا التاريخ والجغرافيا

وهناك معلم الله يذكره بالخير ويحسن اليه يضرب كل من لم يحفظ وبالذات الفقة

وفي يوم من الايام قلت لاحد زملائي وكان عددهم اثنان طبعا هذا عدد الفصل كله حنا ثلاثة

انا واخوي وواحد من القرية من الجماعة نبي نضرب المعلم مثل مايضربنا

قال اخوي خلاص الطالب اللي يضربه المعلم وهو مايضربه مو برجال

ونسيت ان اخوي دافور ويحفظ والضرب فيني وفي زميلنا الثاني

قلت خلاص المهم اتفقت انا وبالذات كان اتفاقي شبه عهد مع زميلي الثاني

خلا ص خلاص ضربناه ضربناه الله لايعوق 0

بدأت الحصة الاولى وكنا في فصل الشتاء ومطلعين طاولاتنا الثلاثة الى سور المدرسة بالشمس

على شان نتقي لسعة البرد في الفصل مافيه لاكهربا ولاغيرة

قال المعلم حفظتوا قلنا نعم قال لاخوي قم سمع لي شروط الصلاة وجاء اخوي الدافور

شروط الصلاة كذا وكذا وانا بنفسي اقول اخس يالجبان 0

ممتاز وانتم حافظين ايوه قم وقام زميلي الثاني هاه ماهي شرووط الصلاة

شروط الصلاة شروط الصلاة والله يوم جلس يخور قال له وماغص يمغص بطنك يالثور

ليش تقول انك حافظ وانت لوحٍ مسمر على جدار0 خلك واقف 0

والله وياقف مثل ماقال زي اللوح المسمر على الجدار

هاه وانت حفظت قلت لا قال لي لوا يلوي بطنك قم جب لي العصاء والله قام اخوي

ومن النذاله جاب له الخيزران 0 قلت انا في نفسي ضاربينك يالمدرس ضاربينك

قال لخويي افتح يدك والله الاثول وهو يفتح يده ويعطيه الساخن

وجاء دوري خوي ماضربه ولاشي قلت اكيد يبغاه اذا جاء يضربني يضربه

المهم كان واقف ماجلس لان المعلم ماقاله اجلس هاه افتح يدك فتحت يدي

والله يضربني العصاء الاول وخويي ماحرك شي والثاني والثالث والرابع والخامس والسادس

وبعدين كان ضرب زمان عدد زوجي مافيه فردي عدل بين اليدين

يوم خلص من ضربي كان عندي على الطاولة كتاب العلوم الدينية وكان بعده عني اقل من متر

والله وانا اعطيه الكتاب على وجهه واطالع لخويي يوم جلس الحيوان قلت توهقت يابو الشباب

يعني بس انت اللي مسوي فيها بطوله الجبان خويك وجلس ان وش يفكك من المدرسين

وخصوصا ان المدرس اللي كان يغاب دايم حاظر ذاك اليوم وكان جلاد

فيوم ضربت المدرس كان يقول له اكسر ظهرة ياساتر الله لايحطني بين يديه

هذا ماعنده ظرب هذا عنده تمويت 0 المهم المدرس بس اكتفى ان قال لي اجلس قلت اكيد ناوي نيه والله وانا اصيح

والظاهر شكله يوم شافني اصيح رحمني 0 سكت ودرسنا درس جديد

وانا خايف انهم يقولون انتهت الحصة لاني ما اضمن المعلم الشرير ذاك وش يبي يسوي فيني

خلصت الحصة وشوي يوم جاني الشرير قال لي وراك تضرب معلمك قلت مدري

قال الان تروح وتعتذر له قلت بالحال والله ماتشوف الا غباري للادارة يا استاذ ان غلطان

قال اقول رح غسل سيارتي قلت لو تبيني كل يوم اغسلها بس الفكه من هالتوهيقة

والله واجيب سطل الموية وكانت باردة جمدت يديني من بردها نصف ساعة والسيارة تلمع 0

وبعدها حرمت اتفق مع جبنا ورعاع 0 وحرمت اسوي فيها بطولات ما لامها داعي

رضى عني الاستاذ الله يجزاه بالخير وانا شديت حيلي وصرت دافور احسن من اخوي 0



( يتبع )